ເຈົ້າຄອງນະຄອນຫຼວງວຽງຈັນຊີ້ນຳ ຍທຂ ເລັ່ງສ້ອມແປງເສັ້ນທາງຕ້ອນຮັບກອງປະຊຸມອາຊຽນປີ 2024

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ລົງພົບປະຊີ້ນຳວຽກງານຢູ່ພະແນກໂຍທາທິການ ແລະຂົນສົ່ງ ນະຄອນຫຼວງວຽງຈັນ (ຍທຂ ນວ) ເມື່ອບໍ່ດົນມານີ້, ເພື່ອກຽມຄວາມພ້ອມຕ້ອນຮັບກອງປະຊຸມສຸດຍອດອາຊຽນທີ່ ສປປ ລາວ ຈະຮັບກຽດເປັນເຈົ້າພາບໃນປີ 2024.

ໃນໂອກາດນີ້, ທ່ານເຈົ້າຄອງນະຄອນຫຼວງວຽງຈັນ ກໍໄດ້ໃຫ້ທິດຊີ້ນຳພ້ອມທັງເນັ້ນໃຫ້ພະແນກ ຍທຂ ນວ ແລະ ຂະແໜງການກ່ຽວຂ້ອງເອົາໃຈໃສ່ຈັດຕັ້ງປະຕິບັດແຜນການໃນຕໍ່ໜ້າໃຫ້ສຳເລັດຕາມແຜນການ ເປັນຕົ້ນ ໃຫ້ສືບຕໍ່ຕິດຕາມກວດກາຢ່າງເຂັ້ມງວດ ແລະ ຂຶ້ນແຜນແກ້ໄຂດ່ວນໃນການສ້ອມແປງເສັ້ນທາງ ແລະອະນາໄມຮ່ອງລະບາຍນໍ້າໃນຊ່ວງໄລຍະລະດູຝົນເດືອນສິງຫາ-ກັນຍານີ້ ເພື່ອແກ້ໄຂການສັນຈອນໃຫ້ໄປ-ມາສະດວກ ໃຫ້ໜ່ວຍງານປົກປັກຮັກສາເສັ້ນທາງ ເລັ່ງຕາບຂຸມທີ່ເກີດຂຶ້ນຕາມເສັ້ນທາງ ແລະແກ້ໄຂຈຸດນໍ້າອັ່ງນໍ້າຂັງຕາມເສັ້ນທາງສາຍຫຼັກເສັ້ນທາງເມືອງຮັບຜິດຊອບ ແລະເສັ້ນທາງຮ່ອມທາງຊອຍທີ່ນອນໃນຂອບເຂດບັນດາບ້ານຮັບຜິດຊອບເອົາໃຈໃສ່ສ້ອມແປງເສັ້ນທາງຕາມແຜນລົງທຶນຂອງລັດ ໃຫ້ສຳເລັດທ້າຍເດືອນທັນວາ 2023 ນີ້ ພ້ອມນັ້ນຕ້ອງໄດ້ສືບຕໍ່ສ້ອມແປງກໍ່ສ້າງ ແຕ້ມເສັ້ນການສັນຈອນ ແລະ ອື່ນໆຕາມແຜນທີ່ໄດ້ກຳນົດເພື່ອຕ້ອນຮັບກອງປະຊຸມອາຊຽນທີ່ຈະຈັດຂຶ້ນຢູ່ ນວ ໃນ 2024 ໃຫ້ສໍາເລັດຕາມແຜນການທີ່ວາງໄວ້.

ສຳລັບການຈັດສັນເສັ້ນທາງຕົວແບບເພື່ອຮັບໃຊ້ວຽກງານດັ່ງກ່າວໄດ້ກຳນົດເອົາຖະໜົນລ້ານຊ້າງເປັນຖະໜົນຕົວແບບທີ 1 ແຕ່ 3 ແຍກໄຟອໍານາດຫໍຄໍາ ເຖິງ ວົງວຽນປະຕູໄຊ, ຖະໜົນສຸພານຸວົງເປັນຕົວແບບທີ 2 ແຕ່ປ້ອມໜ້າສະໜາມບິນ ເຖິງ 4 ແຍກໄຟອໍານາດຫຼັກ 1 ຖະໜົນເສດຖາທິລາດແຕ່ 4 ແຍກໄຟອໍານາດຫຼັກ 1 ເຖິງ 3 ແຍກໄຟອໍານາດຫໍຄໍາ, ຖະໜົນໄກສອນພົມວິຫານແຕ່ຄ້ອງສັນຕິພາບ (ປະຕູໄຊ) ເຖິງຫໍປະຊຸມແຫ່ງຊາດ ຫຼັກ 6 ຫ້າມລົດຈອດຊະຊາຍຕາມແຄມທາງໃນຊົ່ວໂມງຮີບດ່ວນ ເພື່ອລະບາຍການສັນຈອນ ແລະອື່ນໆ.
ຈາກ: ວຽງຈັນໃຫມ່

แชร์