ເຈົ້າໜ້າທີ່ຕໍາຫຼວດ ຈັບຕົວ 2 ຄູ່ ຜົວເມຍ ພ້ອມຂອງກາງຢາບ້າຈໍານວນ 77,436 ເມັດ

ໂດຍປະຕິບັດຕາມວະລະແຫ່ງຊາດວ່າດ້ວຍການສະກັດກັ້ນ ແລະແກ້ໄຂບັນຫາຢາເສບຕິດໃຫ້ໜົດໄປຈາກສັງຄົມລາວສະນັ້ນໃນຄັ້ງວັນທີ 14 ກໍລະກົດ 2023 ຜ່ານມານີ້ ເຈົ້າໜ້າທີ່ຕຳຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ລົງເຄື່ອນໄຫວປະຕິບັດໜ້າທີ່ວິຊາສະເພາະຢູ່ທີ່ຂອບເຂດບ້ານນາຊູ ເມືອງກາສີ ສາມາດກັກຕ້ອງເປົ້າໝາຍຄ້າ-ຂາຍຢາບ້າ ໄດ້ຈໍານວນ 4 ຄົນ ຢູ່ບ້ານນາຊູ, ເມືອງກາສີ, ແຂວງວຽງຈັນ ພ້ອມຂອງກາງຢາບ້າຈໍານວນ 68 ຖົງ ເທົ່າກັບ 13,600 ເມັດ, ເງິນກີບທະນາຄານ 178 ລ້ານກີບ ແລະໂທລະສັບ 2 ໜ່ວຍ , ແລະອີກຄູ່ຜົວ-ເມຍ ພ້ອມດ້ວຍຂອງກາງຢາບ້າຈໍານວນ 63,836 ເມັດ, ເງິນກີບທະນາຄານ 16 ລ້ານກີບ ແລະໂທລະສັບ 3 ໜ່ວຍ ມາທໍາການສືບສວນ-ສອບສວນ.

ຜ່ານການສືບສວນ-ສອບສວນຂອງເຈົ້າໜ້າທີ່ວິຊາສະເພາະຄູ່ຜົວເມຍໄດ້ໃຫ້ການສາລະພາບວ່າ: ຢາບ້ານັ້ນແມ່ນຢາບ້າຂອງພວກກ່ຽວແທ້ຈິງ. ປະຈຸບັນເຈົ້າໜ້າທີ່ພະແນກສະກັດກັ້ນ ແລະຕ້ານຢາເສບຕິດຫ້ອງຕໍາຫຼວດ ປກສ ແຂວງວຽງຈັນ ພວມດໍາເນີນການສືບສວນ-ສອບສວນ ພວກກ່ຽວທັງ 4 ຄົນ ເພື່ອຂະຫຍາຍຜົນຫາກຸ່ມແກ້ງເຄືອຄ່າຍ ແລະຜູ່ຮ່ວມຂະບວນການມາລົງໂທດຕາມລະບຽບກົດໝາຍຂອງບ້ານເມືອງໃນຂັ້ນຕໍ່ໄປ.
ຂ່າວ ປ້ອງກັນຄວາມສະຫງົບ ແຂວງວຽງຈັນ: ຈັນດາລາ

แชร์