ມຽນມາ ອົບພະຍົບປະຊາຊົນ 60.000 ກວ່າຄົນ ບັນຫານໍ້າຖ້ວມຄັ້ງໃຫຍ່

ສຳນັກຂ່າວຕ່າງປະເທດລາຍງານຈາກນະຄອນຫລວງ ຢ້າງກຸ້ງປະເທດມຽນມາ ເມື່ອວັນທີ 13 ສິງຫາວ່າ: ກະຊວງສະຫວັດດີການ ແລະສັງຄົມ, ການບັນເທົາທຸກ ແລະການຕິດຕັ້ງຖານໃໝ່ຂອງມຽນມາໄດ້ລາຍງານຜົນກະທົບຈາກສະພາບອາກາດທີ່ປ່ຽນແປງເກີດຂຶ້ນເມື່ອທ້າຍເດືອນກໍລະກົດທີ່ຜ່ານມາຊຶ່ງເປັນອິດທິພົນຂອງກະແສລົມມໍລະສຸມຢ່າງຮຸນແຮງເຮັດໃຫ້ເກີດຝົນຕົກຢ່າງໜັກ ແລະນໍ້າຖ້ວມຄັ້ງໃຫຍ່ໃນຫລາຍພື້ນທີ່ຂອງປະເທດ. ສະນັ້ນມຽນມາ ຕ້ອງອົບພະຍົບປະຊາຊົນ ກວ່າ 60.000 ຄົນ ອອກຈາກທີ່ຢູ່ອາໄສ ແລະມີຜູ້ເສຍຊີວິດຢ່າງໜ້ອຍ 5 ຄົນ. ຢ່າງໃດກໍ່ຕາມ ປະມານ 1 ໃນ 3 ຂອງຜູ້ອົບພະຍົບໄດ້ຮັບອະນຸຍາດໃຫ້ກັບໄປຍັງທີ່ຢູ່ອາໄສ.

ສຳລັບພື້ນທີ່ໄດ້ຮັບຜົນກະທົບຢ່າງໜັກຈາກໄພທຳມະຊາດໃນຄັ້ງນີ້ລວມເຖິງລັດຍະໄຂ່, ລັດມອນ, ລັດກະຫຣຽງ, ພາກພື້ນມະເກວ ແລະພາກພື້ນພະໂຄ. ນອກຈາກນີ້ ຍັງມີລາຍງານເຫດດິນເຈື່ອນເປັນໄລຍະທາງ 61 ແມັດ ເປັນສິ່ງກິດຂວາງເສັ້ນທາງການສັນຈອນຕາມຮ່ອມພູໃກ້ເມືອງມຽວດີ ຊຶ່ງເປັນໜຶ່ງໃນຕົວເມືອງການຄ້າຊາຍແດນ ທີ່ສຳຄັນທາງຕາເວັນອອກຂອງມຽນມາ ແລະອື່ນໆ.

แชร์