ສະພາແຫ່ງຊາດຫວນຄືນມູນເຊື້ອວັນລັດຖະທໍາມະນູນ

ທ້າຍອາທິດຜ່ານມາ, ສະພາແຫ່ງຊາດ ຈັດປາຖະກາຖາ ຫວນຄືນມູນເຊື້ອວັນປະກາດໃຊ້ລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ (15 ສິງຫາ 1991-15 ສິງຫາ 2023), ໂດຍການປາຖະກະຖາຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ ແລະມີສະມາຊິກພັກ, ພະນັກງານ-ລັດຖະກອນ ອ້ອມຂ້າງຫ້ອງວ່າການສະພາແຫ່ງຊາດເຂົ້າຮ່ວມເພື່ອໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນ ທົ່ວຫ້ອງວ່າການສະພາແຫ່ງຊາດ ກໍາແໜ້ນກ່ຽວກັບຄວາມໝາຍ, ຄວາມສໍາຄັນ ແລະເນື້ອໃນຂອງລັດຖະທໍາມະນູນແຫ່ງ ສປປ ລາວ ເພື່ອເພີ່ມທະວີຄວາມເຄົາລົບລັດຖະທໍາມະນູນ ແລະລະບຽບກົດໝາຍຢ່າງຖືກຕ້ອງ, ເຂັ້ມງວດ ແລະເພື່ອເປັນການເສີມຂະຫຍາຍມູນເຊື້ອແຫ່ງຄວາມສາມັກຄີໃຫ້ເປັນປຶກແຜນແໜ້ນໜາຂອງປະຊາຊົນບັນດາເຜົ່າ, ຊັ້ນຄົນ ແລະເພດໄວພາຍໃຕ້ການນໍາພາຂອງພັກ.

ທ່ານ ຈະເລີນ ເຢຍປາວເຮີ ໄດ້ຍົກໃຫ້ເຫັນຄວາມສໍາຄັນຂອງລັດຖະທໍາມະນູນແຫ່ງ ສປປ ລາວ ວ່າ: ວັນລັດຖະທໍາມະນູນແຫ່ງຊາດ ແມ່ນເຫດການປະຫວັດສາດທີ່ມີຄວາມໝາຍສໍາຄັນຍິ່ງ, ເປັນການຢັ້ງຢືນຜົນງານອັນຍິ່ງໃຫຍ່ໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະສ້າງສາພັດທະນາປະເທດຊາດ, ເປັນການຢືນຢັນເຖິງເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຕໍ່ສາກົນ, ທັງເປັນຂີດໝາຍໃນການຫັນແນວທາງປ່ຽນແປງໃໝ່ອັນມີຫລັກການຂອງພັກເປັນກົດໝາຍພື້ນຖານຂອງລັດເຮົາ ແລະຫັນໄປສູ່ການຄຸ້ມຄອງລັດ-ຄຸ້ມຄອງ ສັງຄົມດ້ວຍກົດໝາຍ, ສືບຕໍ່ສ້າງ ແລະປັບປຸງລະບອບປະຊາທິປະໄຕປະຊາຊົນຕາມທິດກ້າວຂຶ້ນສັງຄົມນິຍົມບົນພື້ນຖານລັດຖະທໍາມະນູນ ແລະກົດໝາຍ.

ພາຍຫລັງປະເທດຊາດໄດ້ຮັບການປົດປ່ອຍມານີ້, ປະຊາຊົນລາວບັນດາເຜົ່າໄດ້ພ້ອມກັນປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະສ້າງສາພັດທະນາປະເທດຊາດໂດຍສະເພາະແມ່ນການດໍາເນີນພາລະກິດປ່ຽນແປງໃໝ່ເພື່ອຂຸດຄົ້ນ ແລະເສີມຂະຫຍາຍກໍາລັງແຮງສັງລວມຂອງຊາດເຂົ້າໃນການສ້າງ ແລະ ບູລະນະລະບອບປະຊາທິປະໄຕປະຊາຊົນ, ສ້າງປະຖົມປັດໄຈກ້າວຂຶ້ນສູ່ລະບອບສັງຄົມນິຍົມ ແລະ ມາໃນໄລຍະໃໝ່ນີ້ຊີວິດຂອງສັງຄົມໄດ້ຮຽກຮ້ອງໃຫ້ລັດເຮົາຕ້ອງມີລັດຖະທໍາມະນູນ. ລັດຖະທໍາມະນູນນີ້, ແມ່ນລັດຖະທໍາມະນູນຂອງລະບອບປະຊາທິປະໄຕປະຊາຊົນຢູ່ປະເທດເຮົາ ຊຶ່ງໄດ້ຮັບຮູ້ຜົນງານອັນຍິ່ງໃຫຍ່ທີ່ປະຊາຊົນເຮົາຍາດມາໄດ້ໃນພາລະກິດຕໍ່ສູ້ປົດປ່ອຍຊາດ,ປົກປັກຮັກສາ ແລະສ້າງສາປະເທດຊາດ,ກໍານົດລະບອບການເມືອງ, ເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ, ກໍານົດສິດ ແລະພັນທະພື້ນຖານຂອງພົນລະເມືອງ, ລະບົບການຈັດຕັ້ງກົງຈັກລັດໃນໄລຍະໃໝ່. ລັດຖະທໍາມະນູນສະບັບນີ້ແມ່ນໝາກຜົນລວມຍອດແຫ່ງສະຕິປັນຍາ ແລະການປະກອບຄວາມເຫັນຂອງປະຊາຊົນໃນທົ່ວປະເທດທີ່ສ່ອງແສງເຖິງເຈດຈໍານົງອັນຍາວນານ ແລະ ຄວາມຕັດສິນໃຈຢ່າງແຮງກ້າຂອງວົງຄະນະຍາດແຫ່ງຊາດ ທີ່ຈະພ້ອມກັນສູ້ຊົນຈົນບັນລຸຈຸດໝາຍສ້າງປະເທດລາວໃຫ້ເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະວັດທະນະຖາວອນ.
ທີ່ມາ: ສພຊ

แชร์