ບໍ່ແກ້ວ ອະນຸຍາດໃຫ້ເອກະຊົນສໍາປະທານໂຄງການພັດທະນາ ສວນສາທາລະນະໜອງຖານ

ເມື່ອບໍ່ດົນມານີ້ໄດ້ມີພິທີເຊັນສັນຍາສໍາປະທານໂຄງການພັດທະນາສວນສາທາລະນະໜອງຖານ ເມືອງຫ້ວຍຊາຍ ລະຫວ່າງ ອົງການປົກຄອງແຂວງຕ່າງໜ້າໂດຍທ່ານ ຈອມແພງ ວິໄລສານ ຫົວໜ້າພະແນກແຜນການ ແລະການລົງທຶນແຂວງ ກັບ ທ່ານ ຫລ້ານ້ອຍ ໄຊຍະວົງ ອໍານວຍການ ບໍລິສັດ ຫົວຂອງພັດທະນາ ອະສັງຫາລີມະຊັບ ຈໍາກັດຜູ້ດຽວ ໂດຍມີທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂຄງການພັດທະນາສວນສາທາລະນະໜອງຖານ, ມີເນື້ອທີ່ທັງໝົດ 40 ເຮັກຕາ, ປະກອບມີ 20 ໂຊນ, ຈະໄດ້ພັດທະນາກິດຈະກໍາການທ່ອງທ່ຽວຂອງແຕ່ລະໂຊນ ໂດຍສະເພາະແມ່ນກິດຈະກໍາໂຮງແຮມ, ອາພາດເມັ້ນ, ຄອນໂດ, ຣີສອດ, ສູນການຄ້າ, ຮ້ານອາຫານ, ຮ້ານນວດ-ສະປາ, ກິດຈະການທາງນໍ້າທ່າເຮືອນໍ້າທ່ຽວ, ສູນບໍລິການອອກກໍາລັງກາຍ ແລະກິດຈະກໍາອື່ນໆ ທີ່ແຂວງສົ່ງເສີມ ແລະລັດຖະບານອານຸຍາດ ໂດຍຮູບແບບການລົງທຶນຂອງເອກະຊົນພາຍໃນ 100% ມູນຄ່າການລົງທຶນທັງໝົດ 10 ລ້ານໂດລາສະຫະລັດ, ມູນຄ່າທຶນຈົດທະບຽນ 3 ລ້ານໂດລາສະຫະລັດ.

ໂຄງການດັ່ງກ່າວຈະກາຍເປັນແຫລ່ງທ່ອງທ່ຽວ, ເປັນສະຖານທີ່ພັກຜ່ອນ, ເປັນບ່ອນອອກກໍາລັງກາຍທີ່ຕິດພັນກັບສູນການຄ້າ, ສວນສະໜຸກ ແລະ ກາຍເປັນແຫລ່ງທ່ອງທ່ຽວຂອງແຂວງທີ່ໂດດເດັ່ນ, ທັງເປັນການດຶງດູດນັກທ່ອງທ່ຽວພາຍໃນ ແລະຕ່າງປະເທດໃຫ້ເຂົ້າມາທ່ຽວຊົມແຂວງບໍ່ແກ້ວໃຫ້ຫລາຍຂຶ້ນໃນອະນາຄົດ, ທັງເປັນການສ້າງລາຍຮັບໃຫ້ປະຊາຊົນພາຍໃນແຂວງບໍ່ແກ້ວ.

ໃນໂອກາດນີ້, ບໍລິສັດ ຫົວຂອງພັດທະນາ ອະສັງຫາລີມະຊັບ ຈໍາກັດຜູ້ດຽວ ຍັງໄດ້ມອບເງິນສົດ 100 ລ້ານກີບ ໃຫ້ອົງການປົກຄອງແຂວງເພື່ອເປັນການປະກອບສ່ວນພັດທະນາແຂວງບໍ່ແກ້ວຕືມອີກ.
ຂ່າວ: ຄໍາເພັງ ສີສະຫວ່າງ

• 14/08/2023