ເຈົ້າໜ້າທີ່ອອກຫຼາຍຂໍ້ຫ້າມຕໍ່ຜູ້ຂັບຂີ່ຊ້ວງປີໃໝ່

 ເພື່ອເຮັດໃຫ້ການສະເຫຼີມສະຫຼອງສົ່ງທ້າຍປີເກົ່າ-ຕ້ອນຮັບປີໃໝ່ລາວ ພສ 2562 ມີຄວາມສະຫງົບປອດໄພ, ມີບັນຍາກາດເບີກບານມ່ວນຊື່ນ ແລະປາສະ ຈາກໄດ້ຜົນເສຍຫາຍທາງສຸຂະພາບ, ຊີວິດ ແລະຊັບສີນທີ່ເກີດຈາກອຸບັດເຫດຕາມທ້ອງຖະໜົນເຈົ້າໜ້າທີ່ໄດ້ອອກຫຼາຍຂໍ້ຫ້າມສໍາລັບຜູ້ຂັບຂີ່ໃນປີນີ້.

ທ່ານ ພັນໂທ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດຈະລາຈອນກົມໃຫຍ່ຕໍາຫຼວດກະຊວງປ້ອງກັນຄວາມສະຫງົບຖະແຫຼງຕໍ່ສືມວນຊົນວ່າ: ປີໃໝ່ລາວ ພສ 2561 ຜ່ານມາທົ່ວປະເທດມີອຸບັດເຫດເກີດຂຶ້ນເຖີງ 287 ລາຍ, ພາຫະນະເປເພຈໍານວນ 490 ຄັນ, ຄົນໄດ້ຮັບບາດເຈັບຈໍານວນ 528 ຄົນ, ຄົນເສຍຊີວິດຈໍານວນ 39 ຄົນ, ຍິງ 6 ຄົນ, ສ້າງຄວາມເສຍຫາຍທາງສຸຂະພາບ, ຊີວິດ ແລະຊັບສີນຂອງລັດ, ຂອງລວມໝູ່ ແລະຂອງພໍ່ແມ່ປະຊາຊົນບັນດາເຜົ່າຢ່າງມະຫາສານ.

  ສໍາລັບປີນີ້ເພື່ອເປັນເພີ່ມທະວີວຽກງານປ້ອງກັນ ແລະຈັດສັນຄວາມເປັນລະບຽບຮຽບຮ້ອຍໃນການສັນຈອນໄລຍະການສະເຫຼີມສະຫຼອງປີໃໝ່ລາວປີ 2019 ເຈົ້າໜ້າທີ່ຕໍາຫຼວດຈາລາຈອນໄດ້ອອກຫຼາຍຂໍ້ຫ້າມຕໍ່ຜູ້ຂັບຂີ່ປະກອບມີ: ການນໍາໃຊ້ລົດ-ໃຊ້ຖະໜົນທຸກຄັ້ງຜູ້ຂັບຂີ່ລົດຕ້ອງປະຕິບັດກົດລະບຽບຈາລາຈອນ ຢ່າງເຂັ້ມງວດ, ກ່ອນຈະນໍາໃຊ້ລົດເມື່ອດີນທາງໄກຕ້ອງກວດກາລົດສະພາບຕິກເນັກ ແລະຄວາມພ້ອມລົດໃຫ້ຮັບປະກັນຄວາມປອດໄພເປັນຢ່າງດີ, ຜູ້ຂັບຂີ່ລົດຕ້ອງປະຕິບັດຕາດກົດ, ປ້າຍສັນຈອນ, ແລະເຄື່ອງໝາຍການສັນຈອນຢ່າງເຂັ້ມງວດ, ຫ້າມໃຊ້ລົດໂດຍສານ,ບັນທຸກສິນຄ້າ,ຜູ້ໂດຍສານເກີນກໍານົດ ແລະ ຊ່ວງຊີງເອົາຜູ້ໂດຍສານຢ່າງເດັດຂາດ, ລົດຂົນສົ່ງໂດຍທາງໄກຕ້ອງມີໂຊເຟີຂັບສໍາຮອງທຸກຄັ້ງເວລາເດີນທາງ, ຜູ້ຂັບລົດໃຫຍ່ຕ້ອງຮັດສາຍແອວນີລະໄພເພື່ອຮັບປະກັນຄວາມປອດໄພໃຫ້ຜູ້ຂັບຂີ່ ແລະຜູ້ໂດຍສານ, ຫ້າມນໍາໃຊ້ລົດກະບະບັນທຸກຜູ້ໂດຍສານໃສ່ກະບະ ຫຼື ນັ່ງຝາທ້າຍກະບະ, ຜູ້ດື່ມສິ່ງມືນເມົາຫ້າມຂັບລົດ (ຖ້າກວດກາເຫັນເຈົ້າໜ້າທີ່ຈະໄດ້ກັກໄວ້ຊວງເມົາແລ້ວຈິ່ງອະນຸຍາດໃຫ້ໄປ ຫຼື ໃຫ້ຍາດພີ່ນ້ອງ,ໝູ່ຄູ່ມາຮັບເອົາເພື່ອຄວາມປອດໄພ, ຫ້າມເອົາຖັ່ງນໍ້າໃສ່ລົດຫົດ ຫຼືສາດໃສ່ກັນຕາມເສັ້ນທາງ, ຫ້າມຫຼີ້ນນໍ້າຢູ່ເສັ້ນທາງ ຫຼື ອັດລົດຫົດນໍ້າຕາມທາງ, ຜູ້ຂັບຂີ່ຫຼືຜູ້ຊ້ອນທ້າຍຕ້ອງສວມໃສ່ໝວກກັນກະທົບ (ຖ້າກວດພົບຈະໄດ້ກັກໄວ້), ຫ້າມຂັັບຂີ່ລົດຈັກເປັນຂະບວນ ແລະແຂງຂັນຕາມເສັ້ນທາງ,ຫ້າມເອົານໍ້າ ແລະນໍ້າກ້ອນໃສ່ຖົງຢາງ ແລ້ວດຶກໃສ່ກັນໃນເວລາລົດສັນຈອນ ແລະຫ້າມຜູ້ປົກຄອງປ່ອຍເດັກນ້ອຍທີ່ອາຍຸບໍ່ເຖີງກະຖຽນຂັບຂີ່ລົດຈັກ.

 ສະນັ້ນທ່ານ, ພັນໂທ ກົງສີ ສຸວັນນະຕຸ້ມ ຈິ່ງຝາກຮຽກຮ້ອງມາຍັງພໍ່ແມ່ປະຊາຊົນ, ຜູ້ປົກຄອງ, ອໍານາດການປົກຄອງໃຫ້ຍົກສູງຄວາມຮັບຜິດຊອບເປັນເຈົ້າ ການໃນການປະຕິບັດກົດໝາຍເພື່ອຄວາມເປັນລະບຽບຮຽບຮ້ອຍ ແລະການຫຼຸດຜ່ອນການເກີດອຸປະຕິເຫດ.

ຂ່າວ: ວົງມະນີ      

แชร์