ຂະບວນຂົນສົ່ງໃບພັດກັງຫັນລົມຊຸດທໍາອິດ ໂຄງການໄຟຟ້າພະລັງງານລົມ ມາຮອດແຂວງເຊກອງ

ຂະບວນການຂົນສົ່ງໃບພັດກັງຫັນລົມຊຸດທໍາອິດຂອງໂຄງການມອນຊຸນວິນ ພາວເວີ້ ຫລືໂຄງການໄຟຟ້າພະລັງງານລົມເດີນທາງມາຮອດແຂວງເຊກອງ ແລະມີພິທີຕ້ອນຮັບຢ່າງເປັນທາງການໃນວັນທີ 12 ສິງຫາ 2023 ນີ້, ໂດຍມີທ່ານ ເຫລັກໄຫລ ສີວິໄລ ເຈົ້າແຂວງເຊກອງພ້ອມດ້ວຍການນຳເມືອງດາກຈຶງ, ເມືອງລະມາມ, ຂະແໜງການກ່ຽວຂ້ອງຂັ້ນແຂວງ ແລະບໍລິສັດເຂົ້າຮ່ວມ.

ໃນໂອກາດນີ້, ທ່ານເຈົ້າແຂວງເຊກອງກໍ່ໄດ້ກ່າວຕ້ອນຮັບ ແລະຍ້ອງຍໍຊົມເຊີຍທຸກພາກສ່ວນເປັນຕົ້ນແມ່ນບໍລິສັດ, ຄະນະຮັບຜິດຊອບການຂົນສົ່ງ ແລະຂະແໜງການກ່ຽວຂ້ອງຂອງແຂວງທີ່ໄດ້ເອົາໃຈໃສ່ສ້າງເງື່ອນໄຂອໍານວຍຄວາມສະດວກດ້ານໆ ເຮັດໃຫ້ການຂົນສົ່ງໃບພັດກັງຫັນລົມຂະບວນທໍາອິດອັນເປັນປະຫວັດສາດຂອງປະເທດລາວ ກໍຄືແຂວງເຊກອງ ມາຮອດມາເຖິງຈຸດໝາຍດ້ວຍຄວາມເປັນລະບຽບຮຽບຮ້ອຍ ແລະປອດໄພ. ທັງໝົດນັ້ນ, ສະແດງໃຫ້ເຫັນເຖິງຄວາມເອົາໃຈໃສ່ຢ່າງຈິງໃຈຂອງບໍລິສັດເຈົ້າຂອງໂຄງການກໍຄືບໍລິສັດຜູ້ພັດທະນາໂຄງການເພື່ອເຮັດໃຫ້ການປະຕິບັດກິດຈະກໍາຕ່າງໆຂອງໂຄງການໄຟຟ້າພະລັງງານລົມສໍາເລັດຕາມເປົ້າໝາຍແຜນການທີ່ວາງໄວ້.

ໂຄງການໄຟຟ້າພະລັງງານລົມຕັ້ງຢູ່ເຂດເຊື່ອມຕໍ່ລະຫວ່າງເມືອງດາກຈຶງແຂວງເຊກອງ ແລະເມືອງຊານໄຊແຂວງອັດຕະປື, ເປັນໂຄງການໄຟຟ້າພະລັງງານລົມແຫ່ງທຳອິດຂອງປະເທດລາວ ແລະເປັນໂຄງທີ່ໃຫຍ່ທີ່ສຸດໃນຂົງເຂດອາຊີຕາເວັນອອກສ່ຽງໃຕ້, ມີເສົາກັງຫັນລົມ 133 ຕົ້ນ. ໃນນີ້, ຕັ້ງຢູ່ເມືອງດາກຈຶງ 110 ຕົ້ນ ແລະ ຕັ້ງຢູ່ເມືອງຊານໄຊ 23 ຕົ້ນ, ມີກຳລັງການຕິດຕັ້ງທັງໝົດ 600 ເມກາວັດ ໂດຍໄດ້ເລີ່ມລົງມືກໍ່ສ້າງໃນເດືອນເມສາ 2023 ແລະຄາດວ່າຈະສໍາເລັດຕາມແຜນທີ່ວາງໄວ້ໃນປີ 2025 ມີເປົ້າໝາຍສົ່ງໄຟຟ້າອອກຂາຍໃຫ້ປະເທດຫວຽດນາມເປັນຫຼັກກັບໄລຍະສັນຍາເປັນເວລາ 25 ປີ.​

ໂຄງການນີ້, ເປັນໂຄງການຍຸດທະສາດຂອງພັກ-ລັດຖະບານ ກໍຄືແຂວງເຊກອງ ແລະເປັນໂຄງການພະລັງງານສະອາດລົດກາສກາກບອນ, ບໍ່ທໍາລາຍສິ່ງແວດລ້ອມ, ຊ່ວຍສ້າງຄວາມໝັ້ນຄົງ ແລະສະໜັບສະໜູນພາລະກິດສໍາຄັນລະດັບໂລກທີ່ມີເປົ້າໝາຍການປ່ອຍກາສກາກບອນເປັນສູນໃນປີ 2050.

ຂ່າວ: ແຂວງເຊກອງ

• 14/08/2023