ເສັ້ນທາງເມືອງພູຄູນ ເສຍຫາຍ 10 ຕື້ກີບ ຍ້ອນໄພທຳມະຊາດ

ນັບແຕ່ເກີດມີຝົນຕົກຕໍ່ເນື່ອງມາແຕ່ເດືອນກໍລະກົດ ຈົນເຖີງປະຈຸບັນເຮັດໃຫ້ສະພາບເສັ້ນທາງເຂດເມືອງພູຄູນ ແຂວງ​ຫລວງພະບາງ ພົບຄວາມຫຍຸ້ງຍາກຫຼາຍ ໂດຍສະເພາະເສັ້ນທາງຫຼວງແຫ່ງຊາດເລກທີ່ 7 ແລະ ເສັ້ນທາງຫຼວງແຫ່ງຊາດເລກທີ່ 13 ເໜືອ.

ທ່ານ ແສງດາວ ຫຼວງວິເສດ ຫົວໜ້າຫ້ອງການໂຍທາທິການ ແລະຂົນສົ່ງເມືອງພູຄູນ ໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງແຂວງຫຼວງພະບາງ ໃນວັນທີ 12 ສິງຫາ 2023 ນີ້ວ່າ: ປະຈຸບັນການສັນຈອນຜ່ານເສັ້ນທາງຫຼວງແຫ່ງຊາດເລກທີ່ 7 ແຕ່ເມືອງພູຄູນ ຫາແຂວງຊຽງຂວາງ ແລະເສັ້ນທາງຫຼວງແຫ່ງຊາດເລກທີ່ 13 ເໜືອ ແຕ່ເມືອງກາສີ ແຂວງວຽງຈັນຫາເມືອງພູຄູນ ແລະເມືອງຊຽງເງິນ ແຂວງຫຼວງພະບາງ ແມ່ນເກີດມີດິນເຈື່ອນ ແລະດິນຍຸບຫຼາຍຈຸດເຊີ່ງບໍລິສັດຮັບເໝົາການແກ້ໄຂໄພພິບັດສຸກເສີນໄດ້ເອົາໃຈໃສ່ແກ້ໄຂເບື້ອງຕົ້ນເພື່ອບໍ່ໃຫ້ການສັນຈອນຕິດຄັດ, ສຳລັບເສັ້ນທາງຫຼວງທ້ອງຖີ່ນແມ່ນໄດ້ຮັບຜົນກະທົບຫຼາຍຈຸດບາງຈຸດສາມາດສັນຈອນໄດ້ພຽງລົດຈັກ, ເຊີ່ງຄະນະນຳຂອງເມືອງໄດ້ມອບອຸປະກອນ ແລະ ລະດົມໃຫ້ປະຊາຊົນພ້ອມກັນແກ້ໄຂເບື້ອງຕົ້ນໂດຍນຳໃຊ້ແຮງງານປະຊາຊົນພາຍໃນບ້ານ, ພ້ອມນີ້ໄດ້ປັກເຄື່ອງໝາຍໄວ້ທຸກຈຸດທີ່ມີຄວາມສ່ຽງຂະເກີດອຸບັດຕິເຫດ, ເພື່ອເຮັດໃຫ້ການສັນຈອນມີຄວາມປອດໄພຫົວໜ້າຫ້ອງການໂຍທາທິການ ແລະຂົນສົ່ງເມືອງພູຄູນໄດ້ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນຈົ່ງເພີ່ມສະຕິລະວັນຕົວໃນການສັນຈອນເພື່ອບໍ່ໃຫ້ເກີດອຸບັດຕິເຫດ.

ທ່ານ ແສງດາວ ຫຼວງວິເສດ ໃຫ້ຮູ້ຕື່ມວ່າ: ນອກຈາກສະພາບເສັ້ນທາງທີ່ໄດ້ຮັບຜົນກະທົບ ໄດ້ມີເຮືອນຂອງປະຊາຊົນຖືກດີນຍຸບໄປທັງຫຼັງ ຈຳນວນ 3 ຫຼັງ ແລະຍັງມີຄວາມສ່ຽງອີກຫຼາຍຫຼັງ ມາຮອດປັດຈຸບັນໄດ້ປະເມີນມູນຄ່າເສຍຫາຍເບື້ອງຕົ້ນ ສຳລັບເຮືອນຂອງປະຊາຊົນມີ 5 ຕື້ກວ່າກີບ, ສ່ວນເສັ້ນທາງມີ 10 ຕື້ກວ່າກີບ, ສຳລັບແຜນການແກ້ໄຂໄລຍະຍາວ ຈະມີການເກັບກຳຂໍ້ມູນຜົນກະທົບໃຫ້ລະອຽດ ແລະຈະປະກອບເອກະສານເປັນການແກ້ໄຂແຕ່ລະໂຄງການ ແລະແຕ່ລະໜ້າວຽກໃນຂັ້ນຕໍ່ໄປ.

• 14/08/2023