ຊາຍຈີນ ຖືກດຳເນີນຄະດີ ຍ້ອນຈ້າງສາວລາວເຕັ້ນໂຊຜ່ານສື່ອອນລາຍ

ເມື່ອບໍ່ດົນທີ່ຜ່ານມາ, ໄດ້ມີເຟສບຸກ ແລະຕິກຕ໋ອກເຜີຍ ແຜ່ຄິບວີດີໂອກ່ຽວກັບຄົນຈີນ ໄດ້ລະດົມຂົນຂວາຍເອົາຍິງສາວຫຼາຍຄົນມາໄລ້ສົດເຕັ້ນໂຊລົງສື່ສັງຄົມອອນລາຍ. ຕໍ່ກັບເຫດການດັ່ງກ່າວ, ກົມຕໍາຫຼວດສະກັດກັ້ນ ແລະຕ້ານການຄ້າມະນຸດໄດ້ເກັບຂໍ້ມູນຕົວ, ມາວັນທີ 28 ກໍລະກົດ 2023 ໄດ້ປະສານສົມທົບກັບພະແນກຕໍາຫຼວດສະກັດກັ້ນ ແລະ ຕ້ານການຄ້າມະນຸດ ແຂວງໄຊຍະບູລີ ເຂົ້າກວດຄົ້ນເຮືອນເຊົ່າແຫ່ງໜຶ່ງ ຢູ່ເມືອງ ແລະ ແຂວງໄຊຍະບູລີ ພົບເຫັນຍິງສາວ 8 ຄົນ ແລະຊາຍສັນຊາດຈີນ 2 ຄົນ ຊື່: ທ້າວ ຕວນ ຈີເຫວີນ ອາຍຸ 33 ປີ ແລະທ້າວ ຫລີວ ຊີກົ່ວ ອາຍຸ 18 ປີ ພ້ອມອຸປະກອນຕ່າງໆທີ່ນຳໃຊ້ເຂົ້າໃນການໄລ້ສົດ, ຈຶ່ງໄດ້ກັກຕົວມາດຳເນີນຄະດີ.

ຜ່ານການສອບສວນເບື້ອງຕົ້ນທັງສອງໄດ້ຮັບສາລະພາບວ່າ: ໄດ້ມາເຊົ່າເຮືອນຫຼັງງດັ່ງກ່າວຢູ່ເມືອງ ແລະແຂວງໄຊຍະບູລີ.ຈາກນັ້ນ, ໄດ້ປະກາດຮັບເອົາຍິງສາວຜ່ານສື່ອອນລາເພື່ອມາໄລ້ສົດເຕັ້ນໂຊຜ່ານແອບຕິກຕອ໋ກ. ໂດຍມີທີ່ພັກອາໄສໃຫ້ ແລະ ເງິນເດືອນ1.000.000 ກີບ/ເດືອນ, ຖ້າຜູ້ໃດເຮັດວຽກໄດ້ດົນ ຫຼືໃນເວລາທີ່ໄລ້ສົດມີຄົນທີ່ເຂົ້າມາເບິ່ງສົ່ງຂອງຂັວນໃຫ້ຫຼາຍ, ຄົນນັ້ນຈະໄດ້ຮັບເງິນເພີ້ມຕາມຈຳນວນຂອງຂັວນ ປະມານ1.000.000ກີບ ຫາ 1.500.000ກີບ/ເດືອນ.ສ່ວນລາຍຮັບຂອງທ້າວ ຕວນ ຈີເຫວີນ ໄດ້ຈາກການໄລ່ສົດ ປະມານ 100.000.000ກີບ ຫາ 150.000.000ກີບ/ເດືອນ. ໃນການໄລ້ສົດແມ່ນເຮັດສອງຄັ້ງຕໍ່ມື້, ຄັ້ງທີໜື່ງເລີ້ມແຕ່ເວລາ13:00 ຫາ 17:00 ໂມງ, ຄັ້ງທີສອງເລີ່ມແຕ່ເວລາ19:00 ຫາ 00:00 ໂມງ ແລະໃນການໄລ້ສົດແມ່ນທ້າວ ຕວນ ຈີເຫວີນ ແລະ ທ້າວ ຫລີວ ຊີກົ່ວ ເປັນຄົນຖືກ້ອງ ພ້ອມທັງບັນຍາຍເປັນພາສາຈີນ ແລະ ໃຫ້ຍິງສາວປະຕິບັດຕາມຄຳແນະນໍາຂອງພວກກ່ຽວ, ເດັກຍິງທີ່ມາເຕັ້ນໂຊນັ້ນ ສ່ວນໃຫຍ່ມີອາຍຸຕໍ່າກວ່າ 18 ປີ.ການກະທໍາດັ່ງກ່າວ ແມ່ນຂັດຕໍ່ກົດໝາຍ ແລະ ວັດທະນະທໍາຂອງຊາດ, ຕໍ່ກັບຄະດີດັ່ງກ່າວ ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ພວມສືບຕໍ່ສອບສວນຂະຫຍາຍຜົນນໍາເອົາພັກພວກທີ່ຮ່ວມກັນກະທໍາຜິດມາດໍາເນີນຄະດີຕາມລະບຽບກົດໝາຍຂອງ ສປປ ລາວ.

ດັ່ງນັ້ນ. ຈຶ່ງຮຽກຮ້ອງມາຍັງພໍ່ແມ່ປະຊາຊົນ, ພະນັກງານ, ທະຫານ, ຕໍາຫຼວດຈົ່ງເອົາໃຈໃສ່ສຶກສາອົບຮົມລູກຫຼານຂອງຕົນເອງໃຫ້ມີສະຕິລະວັງຕົວເພື່ອບໍ່ໃຫ້ກຸ່ມຄົນບໍ່ດີມາຕົວະຍົວະຫຼອກລວງເອົາລູກຫຼານຂອງຕົນເອງໄປເຄື່ອນໄຫວໃນສິ່ງທີບໍ່ດີ. ກໍລະນີພົບເຫັນພຶດຕິກໍາດັ່ງກ່າວໃຫ້ໂທຫາກົມຕໍາຫຼວດສະກັດກັ້ນ ແລະຕ້ານການຄ້າມະນຸດ. ເບີໂທສາຍດ່ວນ 1300 ແລະເບີໂທວອດແອບ 020 22881300.

ຂ່າວ: ຮອ ນັນທະໄຊ ສິງຮັກ

แชร์