ກະຊວງ ຖວທ ໂຮມຊຸມນຸມສະຫລອງວັນສື່ມວນຊົນ ແລະການພິມຈໍາໜ່າຍ ຄົບຮອບ 73 ປີ

ພິທີໂຮມຊຸມນຸມ ສະເຫລີມສະຫລອງ ວັນສ້າງຕັ້ງສື່ມວນຊົນ ແລະການພິມຈໍາໜ່າຍ ຄົບຮອບ 73 ປີ (13/8/1950–13/8/2023) ໄດ້ຈັດຂຶ້ນໃນວັນທີ 11 ກໍລະກົດນີ້ ທີ່ຫໍວັດທະນະທຳແຫ່ງຊາດໂດຍການເປັນປະທານຂອງທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ (ຖວທ).

ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ໄດ້ຍົກໃຫ້ເຫັນປະຫວັດ, ມູນເຊື້ອຂອງສື່ມວນຊົນ ແລະການພິມຈໍາໜ່າຍ 73 ປີ ແຫ່ງການເຕີບໃຫຍ່ຂະຫຍາຍຕົວ ຂອງການເຄື່ອນໄຫວວຽກງານສື່ມວນຊົນ ແລະ ການພິມຈໍາໜ່າຍ ທີ່ຜ່ານມາ, ລວມທັງຜົນງານທີ່ພົ້ນເດັ່ນ ຂອງການເຄື່ອນໄຫວວຽກງານ ສື່ມວນຊົນ ແລະ ການພິມຈໍາໜ່າຍ ປະຈໍາປີ 2022-2023 ເຊິ່ງໃນຂົງເຂດສື່ມວນຊົນ ໄດ້ເອົາໃຈໃສ່ ໂຄສະນາ ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ, ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ວຽກງານຈຸດສຸມຂອງລັດຖະບານ; ໄດ້ໂຄສະນາເພື່ອສະກັດກັ້ນ ການແຜ່ລະບາດຂອງພະຍາດຕ່າງໆ ເຊັ່ນ: ໂຄວິດ-19, ພະຍາດທີ່ເກີດຂຶ້ນຕາມລະດູການ ແລະ ການປ່ຽນແປງຂອງດິນຟ້າອາກາດ. ນອກຈາກນີ້, ໂທລະພາບແຫ່ງຊາດລາວ ຍັງໄດ້ມີການປັບປຸງ, ຄ່ອຍຫັນປ່ຽນຈາກລະບົບອານາລ໊ອກ ເປັນລະບົບດີຈີຕອນ ເທື່ອລະກ້າວ; ສາມາດຂະຫຍາຍຕາໜ່າງໂທລະໂຄ່ງ ລົງສູ່ທ້ອງຖິ່ນທົ່ວປະເທດ; ໄດ້ໂຄສະນາຕອບໂຕ້ຂ່າວບິດເບືອນ, ການໃສ່ຮ້າຍປ້າຍສີຂອງກຸ່ມຄົນບໍ່ດີຢ່າງທັນການ. ຂະນະດຽວກັນ ກໍໄດ້ຈັດຕັ້ງສໍາມະນາ, ຝຶກອົບຮົມບຸກຄະລາກອນສື່ມວນຊົນ ທັງຮູບແບບອອນລາຍ, ຮູບແບບເຊິ່ງໜ້າຢ່າງຕໍ່ເນື່ອງຄຽງຄູ່ກັບການຫັນຈາກລະບົບອະນາລັອກ ໄປສູ່ລະບົບດິຈິຕອນເທື່ອລະກ້າວ. ພ້ອມດຽວກັນ ກໍໄດ້ປັບປຸງບັນດານິຕິກໍາລຸ່ມກົດໝາຍໃຫ້ມີຄວາມສອດຄ່ອງກັບການພັດທະນາເສດຖະກິດ, ວັດທະນະທໍາ-ສັງຄົມ ໃນແຕ່ລະໄລຍະຢ່າງເປັນລະບົບຕໍ່ເນື່ອງ.

ສຳລັບຂົງເຂດການພິມຈໍາໜ່າຍປະຈຸບັນທົ່ວປະເທດມີໂຮງພິມ 79 ແຫ່ງ ແລະສຳນັກພິມ 17 ແຫ່ງ, ມີຮ້ານຈຳໜ່າຍປຶ້ມ-ສິ່ງພິມ ເກີດຂຶ້ນຢ່າງຫລວງຫລາຍ, ມີອົງການຈັດຕັ້ງທີ່ເຄື່ອນໄຫວວຽກງານພິມຈຳໜ່າຍເປັນຕົ້ນສະມາຄົມການພິມ, ສະມາຄົມນັກປະພັນລາວ, ສະໂມສອນນັກຂຽນໜຸ່ມສິນໄຊ, ສະໂມສອນສະແຫວງສິນ ແລະ ສະມາຄົມຫ້ອງສະໝຸດລາວ. ສັງລວມແລ້ວການຈັດພິມ ປີ 2022-2023, ສາມາດອອກທະບຽນພິມປຶ້ມໄດ້ທັງໝົດ 583 ຫົວເລື່ອງ, ຈໍານວນພິມ 2.847.819 ຫົວ ໃນນີ້, ມີປຶ້ມຄວາມຮູ້ທົ່ວໄປ 18 ຫົວເລື່ອງ, ຈຳນວນພິມ 17.725 ຫົວ; ປຶ້ມປັດຊະຍາ 13 ຫົວເລື່ອງ, ຈຳນວນພິມ 18.710 ຫົວ; ປຶ້ມສິນທຳ 6 ຫົວເລື່ອງ, ຈຳນວນພິມ 8.500 ຫົວ; ປຶ້ມສັງຄົມສາດ 49 ຫົວເລື່ອງ, ຈຳນວນພິມ 36.440 ຫົວ; ປຶ້ມແບບຮຽນພາສາຕ່າງປະເທດ 144 ຫົວເລື່ອງເປັນຕົ້ນ.

ທ່ານ ວັນສີ ກົວມົວ ໄດ້ໃຫ້ທິດຊີ້ນຳ ໂດຍເນັ້ນໃຫ້ສືບຕໍ່ເພີ່ມທະວີວຽກງານສຶກສາອົບຮົມດ້ານການເມືອງ-ແນວຄິດ ໃຫ້ບຸກຄະລາກອນສື່ມວນຊົນ ແລະການພິມຈໍາໜ່າຍໃຫ້ທົ່ວເຖິງ, ແຂງແຮງ ແລະຮອບດ້ານ; ກໍາແໜ້ນແນວທາງຂອງພັກ, ນະໂຍບາຍ, ລະບຽບກົໝາຍຂອງລັດເພື່ອຮັບປະກັນໃຫ້ແກ່ການຮັບໃຊ້ໜ້າທີ່ການເມືອງຂອງຕົນ ສົມກັບເປັນອາວຸດອັນແຫລມຄົມຂອງພັກ, ເປັນນັກຮົບເວນຍາມປ້ອງກັນທັດສະນະ ແລະແນວທາງຂອງພັກ-ລັດ; ເພີ່ມທະວີການນໍາພາຫາງສຽງສັງຄົມ ກໍຄືປະຊາຊົນໃຫ້ທົ່ວເຖິງ, ເລິກເຊິ່ງ ແລະເປັນລະບົບຕໍ່ເນື່ອງ; ແກ້ໄຂບັນຫາສິ່ງອຸດຕັນ, ການເຂົ້າເຖິງແຫລ່ງຂໍ້ມູນຂ່າວສານໃຫ້ດີຂຶ້ນກວ່າເກົ່າ. ພ້ອມດຽວກັນນີ້ຕ້ອງສຸມໃສ່ບັນຫາຕົ້ນຕໍເຊັ່ນ: ຫັນການເຄື່ອນໄຫວວຽກງານຖະແຫລງຂ່າວ-ສື່ມວນຊົນ ແລະ ການພິມຈໍາໜ່າຍໄປຕາມທິດຂ່າວສານທັນສະໄໝ, ວ່ອງໄວທັນການ ກາຍເປັນກະບອກສຽງທີ່ແຫລມຄົມຂອງພັກ, ເປັນເວທີແຫ່ງການສະແດງຄໍາຄິດຄໍາເຫັນທີ່ສ້າງສັນຂອງສັງຄົມ, ສ້າງພື້ນຖານນິຕິກໍາ ໃຫ້ມີການຄຸ້ມຄອທີ່ເຂັ້ມງວດຕາມກົດໝາຍ; ເອົາໃຈໃສ່ສົ່ງເສີມໃຫ້ສະມາຄົມວິຊາຊີບ ທີ່ກ່ຽວຂ້ອງກັບສື່ມວນຊົນ ແລະການພິມຈໍາໜ່າຍ ໄດ້ເຂົ້າຮ່ວມເຄື່ອນໄຫວທັງພາຍໃນ ແລະຕ່າງປະເທດ ແລະ ມີນະໂຍບາຍຊຸກຍູ້ພະນັກງານອາວຸໂສບໍານານທີ່ມີຄວາມຮູ້ ແລະບົດຮຽນໃຫ້ປະກອບສ່ວນຖ່າຍທອດຄວາມຮູ້ ແລະ ເຮັດວຽກຄົ້ນຄວ້າຜ່ານໂຄງການຕ່າງໆ, ສົ່ງເສີມຜູ້ປະກອບການຜະລິດ ແລະ ບໍລິການທາງດ້ານ ຖວທ ຜ່ານນະໂຍບາຍ ແລະ ກົນໄກທີ່ສອດຄ່ອງກັບລະບຽບກົດໝາຍທີ່ກ່ຽວຂ້ອງ; ສ້າງລະບົບທີ່ຢູ່ໃນການຄຸ້ມຄອງຂອງລັດໃຫ້ມີຄວາມເຂັ້ມແຂງ, ສາມາດປະຕິບັດບົດບາດ ນໍາສະເໜີການຕົກລົງບັນຫາສໍາຄັນຕ່າງໆຂອງລັດ ໄດ້ຮັບການສື່ສານຢ່າງເປັນລະບົບຕໍ່ເນື່ອງ, ຖືກຕ້ອງ, ວ່ອງໄວໄປເຖິງທຸກເປົ້າໝາຍໃນສັງຄົມ.

แชร์