ກະຊວງພະລັງງານ ແລະບໍ່ແຮ່ ຊ່ວຍເຫຼືອຜູ້ປະສົບໄພນໍ້າຖ້ວມຢູ່ແຂວງຄໍາມ່ວນ 100 ລ້ານກີບ

ໃນວັນທີ 11 ສິງຫານີ້ ທີ່ຫ້ອງວ່າການແຂວງຄໍາມ່ວນ ກະຊວງພະລັງງານ ແລະບໍ່ແຮ່ ໄດ້ມອບເງິນຈໍານວນ 100 ລ້ານກີບ ໃຫ້ກອງເລຂາຄະນະກໍາມະການຄຸ້ມຄອງໄພພິບັດຂັ້ນແຂວງເພື່ອນໍາໄປຊ່ວຍເຫຼືອຜູ້ປະສົບໄພພິບັດນໍ້າຖ້ວມພາຍໃນແຂວງຄຳມ່ວນ ເປັນກຽດມອບໂດຍ ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະບໍ່ແຮ່, ຕາງໜ້າຮັບໂດຍທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີຄະນະກໍາມະການ, ພະແນກການກ່ຽວຂ້ອງຮ່ວມເປັນສັກຂີພິຍານ.

ໂອກາດດັ່ງກ່າວ, ທ່ານເຈົ້າແຂວງຄໍາມ່ວນຍັງໄດ້ມອບໃບຍ້ອງຍໍຂອງແຂວງ, ພ້ອມທັງສະແດງຄວາມຂອບໃຈ ແລະຮູ້ບຸນຄຸນມາຍັງຄະນະນໍາກະຊວງພະລັງງານ ແລະ ບໍ່ແຮ່ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້, ທັງນີ້ເພື່ອເປັນການແບ່ງເບົາຄວາມທຸກ ໃຫ້ກັບບັນດາຄອບຄົວຜູ້ທີ່ໄດ້ຮັບຜົນກະທົບ ແລະເປັນກໍາລັງໃຈໃຫ້ເຂົາເຈົ້າໃນການສູ້ຊົນຜ່ານຜ່າບັນຫາອຸທົກກະໄພໃຫ້ຜ່ານພົ້ນໄປດ້ວຍດີ.

ສຳລັບຜູ້ທີ່ສົນໃຈປະກອບສ່ວນສາມາດເຂົ້າຮ່ວມການບໍລິຈາກໄດ້ທີ່ຫ້ອງວ່າການແຂວງຄຳມ່ວນ ຫຼືຕິດຕໍ່ທາງກອງເລຂາໄດ້ທີ່ເບີໂທລະສັບ 020 22157273 ແລະ ເບີ 02052223499.
(ຂ່າວ-ພາບ: ມະນີວັນ)

แชร์