ກອງປະຊຸມເຈົ້າໜ້າທີ່ອາວຸໂສອາຊຽນ ກະກຽມໃຫ້ແກ່ກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ຄັ້ງທີ 8

ກອງປະຊຸມເຈົ້າໜ້າທີ່ອາວຸໂສອາຊຽນກະກຽມໃຫ້ແກ່ກອງປະຊຸມລັດຖະມົນຕີອາຊຽນວ່າດ້ວຍບັນຫາຢາເສບຕິດ ຄັ້ງທີ 8 ຈັດຂຶ້ນໃນວັນທີ 10 ສິງຫານີ້ ທີ່ໂຮງແຮມລາວພລາຊາ ນະຄອນຫຼວງວຽງຈັນ ສປປ ລາວ ໂດຍການເປັນປະທານ ແລະກ່າວເປີດກອງປະຊຸມຂອງ ທ່ານ ພົນຕີ ສົມວັນ ສາຍລ້ອງພາ ຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ທັງເປັນຫົວໜ້າຄະນະເຈົ້າໜ້າທີ່ອາວຸໂສວ່າດ້ວຍບັນຫາຢາເສບຕິດ ສປປ ລາວ ພ້ອມດ້ວຍ ບັນດາຫົວໜ້າ ແລະຄະນະເຈົ້າໜ້າທີ່ອາວຸໂສວ່າດ້ວຍບັນຫາຢາເສບຕິດຈາກ 10 ປະເທດສະມາຊິກອາຊຽນ ແລະເຈົ້າໜ້າທີ່ອາວຸໂສວ່າດ້ວຍບັນຫາຢາເສບຕິດຈາກກອງເລຂາອາຊຽນເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອປຶກສາຫາລື, ຄົ້ນຄວ້າ, ພິຈາລະນາ ແລະຕົກລົງຮັບຮອງເອົາບັນດາເນື້ອໃນ ແລະເອກະສານສໍາຄັນຕ່າງໆ ທີ່ຈະນໍາເຂົ້າໄປລາຍງານຢູ່ໃນກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດ ຄັ້ງທີ 8 ທີ່ ສປປ ລາວ ເປັນເຈົ້າພາບຊຶ່ງຈະຈັດຂຶ້ນໃນວັນທີ 11 ສິງຫາ 2023 ນີ້.

ໂອກາດນີ້, ທ່ານ ພົນຕີ ສົມວັນ ສາຍລ້ອງພາ ກ່າວວ່າ: ຕະຫຼອດໄລຍະ 2 ປີຜ່ານມາ, ບັນຫາຢາເສບຕິດຍັງເປັນສິ່ງທີ່ທ້າທາຍ ແລະເປັນໄພຂົ່ມຂູ່ຕໍ່ຄວາມສະຫງົບ, ຄວາມໝັ້ນຄົງ ແລະຄວາມເປັນລະບຽບຮຽບຮ້ອຍໃນສັງຄົມຂອງບັນດາປະເທດສະມາຊິກອາຊຽນ. ກອງປະຊຸມໃນຄັ້ງນີ້ເປັນກອງປະຊຸມທີ່ສໍາຄັນເພາະຈະໄດ້ພ້ອມກັນຄົ້ນຄວ້າກະກຽມ ໃຫ້ແກ່ກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດຄັ້ງທີ 8 ຊຶ່ງເປັນເວທີປຶກສາຫາລືກຳນົດບັນດາເນື້ອໃນ ແລະ ທິດທາງແຜນການໃນການຮ່ວມມືເພື່ອແກ້ໄຂບັນຫາຢາເສບຕິດໃຫ້ມີປະສິດທິພາບ ແລະປະສິດທິຜົນ. ໃນກອງປະຊຸມບັນດາຫົວໜ້າ ແລະຄະນະເຈົ້າໜ້າທີ່ອາວຸໂສວ່າດ້ວຍບັນຫາຢາເສບຕິດຈາກ 10 ປະເທດສະມາຊິກອາຊຽນໄດ້ຮ່ວມກັນຮັບຮອງເອົາວາລະກອງປະຊຸມພ້ອມທັງຮັບຟັງການລາຍງານສະພາບທີ່ພົ້ນເດັ່ນຂອງກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍບັນຫາຢາເສບຕິດຄັ້ງທີ 44 ແລະ ກອງປະຊຸມອື່ນໆທີ່ປິ່ນອ້ອມ ລາຍງານໂດຍຫົວ ໜ້າຄະນະເຈົ້າໜ້າທີ່ອາວຸໂສວ່າດ້ວຍບັນຫາຢາເສບຕິດປະເທດມຽນມາ, ຈາກນັ້ນຫົວໜ້າຄະນະເຈົ້າໜ້າທີ່ອາວຸໂສ ວ່າດ້ວຍບັນຫາຢາເສບຕິດປະເທດສິງກະໂປ ໄດ້ລາຍງານຄວາມຄືບໜ້າກ່ຽວກັບການກະກຽມຖະແຫຼງການຮ່ວມອາຊຽນ ທີ່ຈະໄປລາຍງານຢູ່ກອງປະຊຸມເຈົ້າໜ້າທີ່ລະດັບສູງຂອງຄະນະກຳມະການຄວບຄຸມຢາເສບຕິດສາກົນ ຄັ້ງທີ 67 ໃນປີ 2024 ພ້ອມທັງປຶກສາຫາລືກ່ຽວກັບການສົ່ງມອບຖະແຫຼງການຮ່ວມອາຊຽນທີ່ຈະໄປລາຍງານຢູ່ກອງປະຊຸມເຈົ້າໜ້າທີ່ລະດັບສູງຂອງຄະນະກຳມະການຄວບຄຸມຢາເສບຕິດສາກົນ ຄັ້ງທີ 67 ຕື່ມອີກ.

ນອກຈາກນີ້, ຫົວໜ້າຄະນະເຈົ້າໜ້າທີ່ອາວຸໂສ ວ່າດ້ວຍບັນຫາຢາເສບຕິດ ສປປ ລາວ ໄດ້ລາຍງານກ່ຽວກັບ ການກະກຽມກອງປະຊຸມລັດຖະມົນຕີອາຊຽນວ່າດ້ວຍບັນຫາຢາເສບຕິດຄັ້ງທີ 8 ແລະ ຫົວໜ້າຄະນະເຈົ້າໜ້າທີ່ອາວຸໂສ ວ່າດ້ວຍບັນຫາຢາເສບຕິດຈາກປະເທດໄທ ກໍໄດ້ລາຍງານຄວາມຄືບໜ້າໃນການກະກຽມບົດລາຍງານການດໍາເນີນງານຂອງເຄືອຂ່າຍການຕິດຕາມຢາເສບຕິດອາຊຽນປະຈຳປີ 2022. ໃນໂອກາດດັ່ງກ່າວບັນດາຫົວໜ້າ ແລະ ຄະນະເຈົ້າໜ້າ ທີ່ອາວຸໂສ ວ່າດ້ວຍບັນຫາຢາເສບຕິດຈາກ 10 ປະເທດສະມາຊິກອາຊຽນຍັງໄດ້ຮັບຮອງເອົາວາລະກອງປະຊຸມ, ແຜນເຄື່ອນໄຫວກອງປະຊຸມ, ຮ່າງຖະແຫຼງການຂອງກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດຄັ້ງທີ 8,ຮັບຮອງເອົາຖະແຫຼງການຮ່ວມອາຊຽນທີ່ຈະໄປລາຍງານຢູ່ກອງປະຊຸມເຈົ້າໜ້າທີ່ລະດັບສູງຂອງຄະນະກຳມະການ ຄວບຄຸມຢາເສບຕິດສາກົນຄັ້ງທີ 67 ໃນປີ 2024, ຮັບຮອງເອົາການກໍານົດວັນເວລາ ແລະສະຖານທີ່ຈັດກອງປະຊຸມລັດຖະມົນຕີອາຊຽນວ່າດ້ວຍບັນຫາຢາເສບຕິດຄັ້ງທີ 9 ທີ່ປະເທດຟິລິບປິນຈະເປັນເຈົ້າພາບໃນປີ 2024, ປຶກສາຫາ ລືບັນຫາຕ່າງໆກ່ຽວກັບຢາເສບຕິດ, ພິຈາລະນາ ແລະຮັບຮອງເອົາບົດລາຍງານກອງປະຊຸມເຈົ້າໜ້າທີ່ອາວຸໂສອາຊຽນກະກຽມໃຫ້ແກ່ກອງປະຊຸມລັດຖະມົນຕີອາຊຽນວ່າດ້ວຍບັນຫາຢາເສບຕິດຄັ້ງທີ 8 ທີ່ ສປປ ລາວ ເປັນເຈົ້າພາບ.
ທີ່ມາ: ຍຸພິນທອງ

แชร์