ກະຊວງສາທາລະນະສຸກ ນຳເອົາເຄື່ອງກອງເຄື່ອນທີ່ ລົງກອງນໍ້າແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ

ມາຮອດປັດຈຸບັນປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເມືອງຄູນຄຳ ແຂວງຄຳມ່ວນ ໄດ້ຮັບການຊ່ວຍເຫລືອຢ່າງຕໍ່ເນື່ອງຈາກພາກລັດ ແລະເອກະຊົນ, ລວມທັງບຸກຄົນ, ນິຕິບຸກຄົນ, ບໍລິສັດ, ຫ້າງຮ້ານຕ່າງໆ ທັງພາຍໃນແຂວງ ແລະຕ່າງແຂວງເຊິ່ງໄດ້ນຳເອົາເຄື່ອງອຸປະໂພກ-ບໍລິໂພກໄປມອບໃຫ້ປະຊາຊົນທີ່ໄດ້ຮັບຜົນກະທົບຢ່າງຫລວງຫລາຍ.

ຂະນະທີ່ທີມງານຜະລິດນໍ້າດື່ມ-ນໍ້າໃຊ້ເຄື່ອນທີ່ຈາກສູນນໍ້າສະອາດ ແລະອະນາໄມສິ່ງແວດລ້ອມກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກໄດ້ສົມທົບກັບລົດຜະລິດນໍ້າສະອາດຂອງພະແນກສາທາລະນະສຸກແຂວງຄຳມ່ວນນຳເອົາເຄື່ອງກອງນໍ້າສະອາດ ເຄື່ອນທີ່ 2 ເຄື່ອງ ມາກັ່ນກອງນໍ້າເພື່ອນຳໄປແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ທັງໝົດ 14 ບ້ານ ໃຫ້ໄດ້ນຳໃຊ້ນໍ້າທີ່ສະອາດຢ່າງທົ່ວເຖິງໂດຍນຳໃຊ້ແຫລ່ງນໍ້າຈາກທຳມະຊາດມາກັ່ນຕອງເຊິ່ງສາມາດຜະລິດນໍ້າໄດ້ເຄື່ອງລະ 4 ພັນລິດຕໍ່ຊົ່ວໂມງ(ຜະລິດນ້ຳ 8-10 ຊົ່ວໂມງ/ວັນ).

ຜູ້ຮັບຜິດຊອບຜະລິດນໍ້າສະອາດເຄື່ອນທີ່ຈາກກະຊວງສາທາລະນະສຸກໃຫ້ສຳພາດຕໍ່ສື່ມວນຊົນໃນວັນທີ 9 ສິງຫາ 2023 ນີ້ວ່າ: ປັດຈຸບັນສະພາບນໍ້າຖ້ວມເຮືອນປະຊາຊົນຢູ່ເມືອງຄູນຄຳໄດ້ຫລຸດລົງເກືອບວ່າເປັນປົກກະຕິແລ້ວທີມງານຜະລິດນໍ້າດື່ມ-ນໍ້າໃຊ້ ເຄື່ອນທີ່ໄດ້ສົມທົບກັນຜະລິດນໍ້າສະອາດເຄື່ອນທີ່ເພື່ອເຂົ້າໃຫ້ການຊ່ວຍເຫລືອປະຊາຊົນທີ່ໄດ້ຮັບຜົນກະທົບຢ່າງຮີບດ່ວນໂດຍໄດ້ນຳເອົາເຄື່ອງກອງນໍ້າສະອາດເຄື່ອນທີ 2 ເຄື່ອງ ເຂົ້າມາຕັ້ງຢູ່ຕາມຈຸດຕ່າງໆທີ່ມີແຫລ່ງນໍ້າທຳມະຊາດ ໃນຂອບເຂດບ້ານທີ່ໄດ້ຮັບຜົນກະທົບເຊິ່ງເລີ່ມແຕ່ວັນທີ 7-9 ສິງຫາ 2023 (3ມື້) ສາມາດຜະລິດນໍ້າແຈກຢາຍໃຫ້ປະຊາຊົນທີ່ໄດ້ຮັບຜົນກະທົບ ທັງ 14 ບ້ານ ໄດ້ 145.000 ລິດ. ທັງນີ້ເຫັນໄດ້ວ່າປະຊາຊົນຈຳນວນຫລາຍມີຄວາມດີໃຈນຳເອົາຕຸກ, ຖັງຂອງໃຜລາວໃສ່ລົດໄຖ, ລົດໃຫຍ່ມາໃສ່ເອົານໍ້າເພື່ອນຳໄປບໍລິໂພກໃນຊີວິດປະຈຳວັນ. ພ້ອມນັ້ນ, ທີມງານດັ່ງກ່າວ, ຍັງໄດ້ຜະລິດນໍ້າໂປ່ມໃສ່ລົດບັນທຸກນໍ້ານຳໄປແຈກຢາຍໃຫ້ປະຊາຊົນທີ່ຢູ່ໄກຈາກຈຸດໃຫ້ບໍລິການ ຫລືຜູ້ທີ່ບໍ່ມີລົດມາຮັບເອົາ. ຢ່າງໃດກໍຕາມ ໜ່ວຍງານດັ່ງກ່າວ, ຈະສືບຕໍ່ຜະລິດນໍ້າສະອາດໃຫ້ປະຊາຊົນທີ່ໄດ້ຮັບຜົນກະທົບ 14 ບ້ານ, 2.812 ຄອບຄົວ, ທີ່ມີປະຊາ ກອນທັງໜົດ 12.767 ຄົນ ໃຫ້ໄດ້ນຳໃຊ້ນໍ້າທີ່ສະອາດຢ່າງທົ່ວເຖິງຈົນກວ່າສະພາບການຈະກັບມາເປັນປົກກະຕິ.

ທີມງານຜະລິດນໍ້າສະອາດໃຫ້ຮູ້ອີກວ່າ: ໃນການຜະລິດນໍ້າທຸກຄັ້ງທີມງານໄດ້ມີການກວດຄຸນນະພາບນໍ້າເປັນປະຈຳເຊິ່ງຄວາມຂຸ່ນທີ່ສາມາດຜະລິດອອກມາແມ່ນ 0,33 NTU, 0,12 NTU ຫລື 0 NTU ອີງຕາມສະພາບຄວາມຂຸ່ນຂອງນ້ຳ. ພ້ອມນັ້ນ, ກະລໍລີນຕົກຄ້າງໃນນໍ້າໄດ້ປັບຢູ່ 0,4 ມີລີກຣາມຕໍ່ລິດ, ອີງຕາມຂໍ້ຕົກລົງຂອງກະຊວງສາທາລະນະສຸກດຳນົດໄວ້ນໍ້າກິນ, ນໍ້າໃຊ້ ແມ່ນ 0,2 ມີລີກຣາມຕໍ່ລິດ ແຕ່ໃນຊ່ວງໄພພິບັດນໍ້າຖ້ວມ ທີມງານ ໄດ້ປັບໃສ່ 0,4 ມີລີກຣາມຕໍ່ລິດ ເພື່ອຮອງຮັບການຂ້າເຊື້ອພະ ຍາດ ໃຫ້ມີປະສິດ ທິພາບ, ປະສິດທິຜົນ, ໃຫ້ໄດ້ນ້ຳອອກມາທີ່ສະອາດ, ປອດໄພ, ບໍ່ມີເຊື້ອພະຍາດ ແລະ ສາມາດກິນໄດ້ເລີຍ.

ປະຊາຊົນທີ່ໄດ້ຮັບຜົນກະທົບຫລາຍທ່ານໃຫ້ສຳພາດເປັນສຽງດຽວກັນວ່າ: ນັບແຕ່ໄດ້ປະສົບໄພ ພິບັດນໍ້າຖ້ວມ ເປັນຕົ້ນມາ, ສິ່ງອຳນວຍຄວາມສະດວກຕ່າງໆຖືກຕັດຂາດ ເປັນຕົ້ນ ແມ່ນນໍ້າ ແລະໄຟຟ້າເຊິ່ງໄດ້ສ້າງຄວາມຫຍຸ້ງຍາກ, ເຮັດໃຫ້ປະຊາຊົນບໍ່ມີນໍ້າກິນ, ນຳໃຊ້, ໄດ້ໂຕ່ງນໍ້າຈາກນໍ້າຝົນໄວ້ກິນ, ໄວ້ໃຊ້, ໄວ້ອາບແກ້ໄຂໃນແຕ່ລະມື້, ຈົນມາຮອດວັນທີ 7 ສິງຫາ 2023, ພາກສ່ວນທີ່ກ່ຽວຂ້ອງກໍຄືທີມງານລົດຜະລິດນໍ້າສະອາດ ໄດ້ເຂົ້າມາຕັ້ງເຄື່ອງຜະລິດນໍ້າສະອາດເພື່ອແຈກຢາຍໃຫ້ປະຊາຊົນທີ່ໄດ້ຮັບຜົນກະທົບ. ຕົນເອງກໍ່ຮູ້ສຶກດີໃຈ ໄດ້ນຳເອົາຕຸກ, ຖັງ ແລະອື່ນໆ ໃສ່ລົດມາໂຕ່ງເອົານໍ້າເພື່ອນຳໄປໃຊ້ໃນຊີວິດປະຈຳວັນ. ພ້ອມທັງສະແດງຄວາມຂອບໃຈຕໍ່ພາກລັດກໍຄືພາກສ່ວນທີ່ກ່ຽວຂ້ອງທີ່ເຫັນໄດ້ຄວາມສຳຄັນຕໍ່ຊີວິດການເປັນຢູ່ຂອງປະຊາຊົນທີ່ປະສົບກັບຄວາມຫຍຸ້ງຍາກໃນຊ່ວງວິກິດ, ພ້ອມທັງຮຽກຮ້ອງໃຫ້ທຸກພາກສ່ວນກ່ຽວຂ້ອງຮີບຮ້ອນເຂົ້າມາແກ້ໄຂ, ໃຫ້ການຊ່ວຍເຫລືອໃນດ້ານອື່ນໆຕື່ມອີກໂດຍສະເພາະແມ່ນໄຟຟ້າ, ນໍ້າກິນ, ນໍ້າໃຊ້ ອາຫານ ແລະອື່ນໆ ເພື່ອເຮັດໃຫ້ປະຊາຊົນທີ່ໄດ້ຮັບຜົນກະທົບ ທັງ 14 ບ້ານ ກັບມາມີຊີວິດການເປັນຢູ່ຢ່າງເປັນປົກກະຕິໂດຍໄວ.
ທີ່ມາ: ທະນູທອງ

แชร์