ຖວທ ສໍາມະນາວັນສື່ມວນຊົນ ແລະການພິມຈໍາຫນ່າຍຄົບຮອບ 73 ປີ

ກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ (ຖວທ) ຈັດກອງປະຊຸມສໍາມະນາພາຍໃຕ້ຫົວຂໍ້ຜົນປະໂຫຍດໃນການໃຊ້ສື່ສົ່ງເສີມການພັດທະນາເສດຖະກິດ-ສັງຄົມ ເເລະຕ້ານປະກົດການຫຍໍ້ທໍ້ເພື່ອລະນຶກເຖິງວັນສື່ມວນຊົນແລະການພິມຈໍາຫນ່າຍຄົບຮອບ 73 ປີ ( 13/8/1950- 13/8/2023) ຂຶ້ນທີ່ຫ້ອງປະຊຸມໃຫຍ່ ວິທະຍຸກະຈາຍສຽງແຫ່ງຊາດລາວ ໃນວັນທີ 10 ສິງຫານີ້ ພາຍໃຕ້ການເປັນປະທານຂອງ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ,ມີທ່ານ ວັນໄຊ ຕະວີນຍານ ຮອງຫົວຫນ້າຄະນະໂຄສະນາອົບຮົມສູນກາງພັກຫົວຫນ້າບັນນາທິການໃຫຍ່ຫນັງສືພິມປະຊາຊົນສຽງຂອງສູນກາງພັກ, ມີບັນດາຫົວຫນ້າກົມ-ຮອງກົມ, ບັນນາທິການສື່ຕ່າງໆ ພ້ອມດ້ວຍພາກສ່ວນກ່ຽວຂ້ອງໃນຂອບເຂດທົ່ວປະເທດເຂົ້າຮ່ວມໂດຍຜ່ານວິດີໂອທາງໄກ.

ທ່ານ ໂພສີ ແກ້ວມະນີວົງ ໄດ້ຍົກໃຫ້ເຫັນຂະບວນວິວັດແຫ່ງການກໍາເນີດ ແລະຂະຫຍາຍຕົວຂອງສັງຄົມມະນຸດໂດຍເລີ່ມມີພາສາປາກເວົ້າ ແລະຕົວຫນັງສື ແລະມີຕິດຕໍ່ພົວພັນກັນໃນດ້ານຕ່າງໆ ໂດຍສະເພາະການສົ່ງຈົດຫມາຍກ້າວຂື້ນມີໃບຂ່າວ,ໃບປີວ,ຫນັງສືພີມ,ວິທະຍຸ,ໂທລະພາບ ເເລະສື່ແບບໃຫມ່ຕາມລໍາດັບນັ້ນແມ່ນທີ່ມາຂອງການກໍາເນີດສື່ມວນຊົນຂອງເເຕ່ລະປະເທດ,ໃນນີ້ສະເພາະປະເທດເຮົາປະຫວັດສື່ມວນຊົນລາວຍາມໃດກໍ່ຕິດພັນສະຫນິດເເຫນ້ນກັບປະຫວັດສາດຂອງຊາດຂອງພັກ,ຂອງການປະຕິວັດ ແລະຂອງປະຊາຊົນລາວບັນດາເຜົ່າເຊີ່ງການຈັດກອງປະຊຸມສໍາມະນາໃນຄັ້ງນີ້ເປັນອີກກິດຈະກໍາຫນື່ງເພື່ອລະນຶກເຖິງວັນສື່ມວນຊົນເເລະການພີມຈໍາຫນ່າຍຂອງລາວຄົບຮອບ73ປີ ເພື່ອໂຄສະນາເຜີຍເເຜ່ປະຫວັດສື່ມວນຊົນ ເເລະການພິມຈໍາຫນ່າຍໃຫ້ສັງຄົມໄດ້ຮັບຮູ້ຢ່າງກວ້າງຂວາງໃນຂອບເຂດທົ່ວປະເທດ.

ກອງປະຊຸມສໍາມະນາພາຍໃຕ້ຫົວຂໍ້ຜົນປະໂຫຍດໃນການໃຊ້ສື່ສົ່ງເສີມການພັດທະນາເສດຖະກີດ-ສັງຄົມ ເເລະຕ້ານປະກົດການຫຍໍ້ທໍ້ເພື່ອລະນຶກເຖີງວັນສື່ມວນຊົນແລະການພິມຈໍາຫນ່າຍວັນ ທີ 13 ສິງຫາຄົບຮອບ 73 ປີໃນຄັ້ງນີ້ຜູ້ເຂົ້າຮ່ວມໄດ້ຮັບຟັງການພັດປ່ຽນກັນຂຶ້ນບັນຍາຍຈາກຜູ້ຊ່ຽວຊານແລະມີປະສົບການໃນດ້ານສື່ຂອງລາວໃນຫົວຂໍ້ຕ່າງໆ ເຊັ່ນ: ສື່ອອນລາຍແມ່ນຫຍັງ,ການຄຸ້ມຄອງຂ່າວໃນສື່ສັງຄົມອອນລາຍມີດີເເນວໃດ; ຜົນປະໂຫຍດໃນການນໍາໃຊ້ສື່ສົ່ງເສີມການພັດທະນາເສດຖະກີິດ-ສັງຄົມ ແລະຕ້ານປະກົດການຫຍໍ້ທໍ້; ພາກທຸລະກິດ ແລະສື່ມີກົນໄກວີທີການຮ່ວມມືກັນແນວໃດຈື່ງເກີດດອກອອກຜົນດີທີ່ສຸດ; ຜົນກະທົບແລະການຄຸ້ມຄອງການນໍາໃຊ້ສື່ສັງຄົມໃນການປະກອບການ ແລະການພັດທະນາທຸລະກິດ; ບົດຮຽນປະຫວັດສາດໃນໄລຍະໃນເຮັດໃຫ້ລາວສູນເສຍເອກະລາດແລະຄົນຮຸ່ນຫນຸ່ມຈະຮັກສາຜືນແຜ່ນດີນຄົບຖ້ວນໄວ້ໄດ້ຄືແນວໃດລວມເຖງທິດທາງ ແລະການພັດທະນາເພື່ອຢູ່ຮ່ວມກັບສື່ແບບໃຫມ່.

แชร์