ບໍລິສັດ ພູເບ້ຍ ມາຍນິງ ຮັບສະໝັກນັກສຶກສາການຊ່າງຕາມເປົ້າໝາຍການຫັນມາໃຊ້ແຮງງານພາຍໃນ

ໃນອາທິດຜ່ານມາ, ບໍລິສັດ ພູເບ້ຍ ມາຍນິງ ໄດ້ເລີ່ມການຄັດເລືອກນັກສຶກສາສໍາລັບໂຄງການຊ່າງສີມືແຮງງານທີ່ມີຊື່ສຽງຂອງບໍລິສັດ, ເຂົ້າຫຼັກສູດການຝຶກອົບຮົມສາມປີໃນຫ້າຂົງເຂດການຊ່າງເຊິ່ງລວມມີກົນຈັກລົດຍົນທົ່ວໄປ, ໄຟຟ້າລົດຍົນ, ຈອດໂລຫະ ແລະໂລຫະກໍ້, ຈັກກົນ ແລະ ຊ່າງຊ່ຽນ, ແລະໄຟຟ້າລົດຍົນ.

ນີ້ແມ່ນການຈັດຕັ້ງປະຕິບັດໂຄງການຊ່າງສີມືແຮງງານຊຸດທີ່ສີ່, ແລະໃນປີນີ້,ມີຜູ້ສະໝັກຫຼາຍກວ່າ 1,000 ຄົນ ໄດ້ສະໝັກເຂົ້າໂຄງການຈາກທົ່ວລາວເຊິ່ງຜູ້ສະໝັກແມ່ນອາໃສຢູ່ເຂດຊົນນະບົດ ແລະ ເປັນພະນັກງານຂອງບໍລິສັດ. ໃນຂັ້ນຕອນທໍາອິດ, ຜູ້ສະໝັກ ໄດ້ຖືກຄັດເລືອກໃຫ້ເຫຼືອ 683 ຄົນເພື່ອເຂົ້າສອບເສັງເລກ, ໄຫວພິບດ້ານກົນຈັກ, ທັກສະການໃຊ້ມື ແລະພາສາອັງກິດ. ໂຄງການຊ່າງສີມືແຮງງານນີ້ເຊິ່ງໄດ້ຮ່ວມມືນໍາວິທະຍາໄລເຕັກນິກລາວ-ເຢຍລະມັນ ນັບແຕ່ປີ 2013, ແມ່ນຄວາມມຸ້ງໝັ້ນຝຶກອົບຮົມອັນສໍາຄັນຂອງ ບໍລິສັດ ພູເບ້ຍ ມາຍນິງ ເພື່ອປະກອບສ່ວນເຂົ້າຍຸດທະສາດອາຊີວະສຶກສາແຫ່ງຊາດຂອງລັດຖະບານລາວເຊິ່ງຈະຊ່ວຍຝຶກສີມືໃຫ້ແຮງງານລາວ ໃຫ້ໄດ້ຕາມມາດຕະຖານການຈ້າງງານແຫ່ງຊາດໃນປະຈຸບັນ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານບໍລິສັດ ແພນອອສ໌ ໄດ້ກ່າວຢ່າງພາກພູມໃຈກ່ຽວກັບເປົ້າໝາຍການຫັນມາໃຊ້ແຮງງານພາຍໃນຂອງບໍລິສັດ ພູເບ້ຍ ມາຍນິງທີ່ຈົດທະບຽນໃນລາວ - ເພື່ອຊ່ວຍສ້າງທັກສະວິຊາການຂອງປະຊາຊົນລາວ,ໂດຍສະເພາະຜູ້ອາໃສຢູ່ໃນເຂດຊົນນະບົດໃຫ້ເຂົາມີວຽກເຮັດ. ທ່ານ ເຊັງ ກ່າວວ່າ: “ບໍລິສັດ ແມ່ນມຸ້ງໝັ້ນສ້າງຊ່າງສີມືແຮງງານຮຸ້ນໄໝ່ໃນປະເທດ, ເຊິ່ງເຮັດໃຫ້ພວກເຂົາໄດ້ມີການສຶກສາ,ການຝຶກອົບຮົມ ແລະມີທັກສະເພີ່ມຕື່ມ ແລະ ເຮັດວຽກໃນສາຍອາຊີບຂອງພວກເຂົາ.

“ພວກເຮົາ ຂໍອວຍພອນໃຫ້ຜູ້ສະໝັກໝົດທຸກຄົນປະສົບຜົນສໍາເລັດໃນການສອບເສັງ ແລະພວກເຮົາຫວັງວ່າຈະຕ້ອນຮັບກຸ່ມນັກສຶກສາຊ່າງສີມືແຮງງານຊຸດໃໝ່ໃນເດືອນ ພະຈິກ 2023.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ກ່າວຕື່ມວ່າ: “ໂຄງການຊ່າງສີມືແຮງງານສ້າງຜົນປະໂຫຍດອັນສໍາຄັນຕໍ່ລາວ, ໂດຍສະເພາະປະຊາຊົນໄວໜຸ່ມຂອງພວກເຮົາຜູ້ທີ່ດ້ອຍໂອກາດ. ພວກເຮົາຈະສືບຕໍ່ປະກອບສ່ວນໃຫ້ປະຊາຊົນລາວ ແລະບັນດາຊຸມຊົນທ້ອງຖິ່ນ. ພາຍຫຼັງຈົບຫຼັກສູດຝຶກອົບຮົມນັກສຶກສາເຫຼົ່ານີ້ຈະເປັນຜູ້ຊ່ວຍສະໜັບສະໜຸນ ແລະສ້າງສາເສດຖະກິດລາວໃນທົດສະວັດຂ້າງໜ້າ.”

ທ່ານ ເຄຣກ ສະປລິດ, ຮອງຫົວໜ້າໂຄງການຝຶກອົບຮົບຊ່າງສີມືແຮງງານຂອງບໍລິສັດກ່າວເຖີງການສອບເສັງຂອງໂຄງການເຊິ່ງຈັດຂຶ້ນໃນສະຖານທີ່ຕ່າງໆທົ່ວປະເທດເຊັ່ນ: ວິທະຍາໄລດັ່ງກ່າວໃນນະຄອນຫຼວງວຽງຈັນ, ເຂດບ້ານນໍ້າໂມ້, ບ້ານ ນໍ້າຍອນ ແລະບ້ານນາໄຊສະຫວ່າງ ແຂວງໄຊສົມບູນ, ໂຮງຮຽນມັດທະຍົມທ່າພະບາດຢູ່ ແຂວງບໍລິຄໍາໄຊ ແລະໂຮງຮຽນມັດທະຍົມລາວ-ຢີ່ປຸ່ນຢູ່ ແຂວງຄໍາມ່ວນ.

ທ່ານ ເຄຣກ ກ່າວລາຍລະອຽດຂັ້ນຕອນສອບເສັງວ່າ: “ໃນກຸ່ມສອບເສັງຫຼາຍກວ່າ 600 ຄົນ, ພວກເຮົາ ຈະຄັດເລືອກຜູ້ສະໝັກ 100 ຫາ 200 ຄົນເຂົ້າສໍາພາດນໍາພະນັກງານຄູຝຶກ, ຜູ້ຄຸມງານຈາກເຂດດໍາເນີນງານ ແລະຕາງໜ້າພະແນກຊັບພະຍາກອນມະນຸດຂອງພວກເຮົາ. ພວກເຮົາຈະຮັບເອົານັກສຶກສາຊ່າງສີມືແຮງງານຈໍານວນ 30 ຄົນເຂົ້າໂຄງການໃໝ່.

“ໃນໂຄງການຊຸດທີສາມ, ເຊິ່ງຈະກ້າວເຂົ້າສູ່ໄລຍະສຸດທ້າຍໃນປີນີ້, ພວກເຮົາມີເພດຍິງຢ່າງໜ້ອຍ 45 ສ່ວນຮ້ອຍ. ອາຍຸຂອງນັກສຶກສາແມ່ນ 18 ຫາ 30 ປີ. ພະນັກງານບໍລິສັດຈໍານວນໜຶ່ງໄດ້ສຶກສາໃນໂຄງການ ແລະປະຈຸບັນພວກເຮົາມີນັກສຶກສາທີ່ເປັນພະນັກງານບໍລິສັດເກົ້າຄົນທີ່ໄດ້ເຄີຍເຮັດວຽກໃນຫ້ອງຄົວ, ວຽກອະນາໄມ, ວຽກປ້ອງກັນ ແລະໃນເຂດການຜະລິດ ແລະການປຸງແຕ່ງ.

“ນັກສຶກສາເຫຼົ່ານີ້ຈະເຂົ້າສອບເສັງຈົບຫຼັກສູດໃນເດືອນກັນຍາ 2023. ພວກເຮົາຈະນໍາເອົາຜູ້ປະເມີນການສອບເສັງວິຊາການຊ່າງຫ້າຄົນຈາກວິທະຍາໄລເຕັກນິກຂອງລັດຄວິນສະແລນ ອົດສະຕາລີ ເພື່ອຕິດຕາມການສອບເສັງຂອງນັກສຶກສາ, ເພື່ອໃຫ້ນັກສຶກສາຊ່າງສີມືແຮງງານຂອງພວກເຮົາ ໄດ້ຮັບໃບປະກາສະນີຍະບັດການຊ່າງຂອງອົດສະຕາລີ, ໃບປະກາສະນີຍະບັດຊັ້ນສູງຂອງລາວ ແລະໃບຢັ້ງຢືນພາສາອັງກິດເວລາພວກເຂົາຮຽນຈົບຈາກໂຄງການ.”

แชร์