ເຜີຍແຜ່ ວຽກງານປະກັນສັງຄົມໃຫ້ສື່ມວນຊົນ

ສື່ມວນຊົນລາວຈາກຫລາຍພາກສ່ວນປະກອບມີ: ໜັງສືພິມ, ວິທະຍຸ, ໂທລະພາບ ແລະວາລະສານ ໄດ້ເຂົ້າຮ່ວມຮັບຟັງການເຜີຍແຜ່ວຽກງານປະກັນສັງຄົມທີ່ເມືອງວັງວຽງ ແຂວງວຽງຈັນ ໃນວັນທີ 9 ສິງຫາ 2023 ໂດຍເປັນປະທານຂອງທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສັງຄົມແຫ່ງລັດ ແລະທ່ານ ວັນນະສິນ ສິມມະວົງ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນາທໍາ ແລະທ່ອງທ່ຽວ, ຈຸດປະສົງກໍເພື່ອໃຫ້ຮັບຮູ້ ແລະເຂົ້າໃຈເລິກເຊິ່ງຂຶ້ນຕື່ມ ແລະນຳໄປ ເຜີຍແຜ່ໃຫ້ສັງຄົມໄດ້ຮັບຮູ້ ແລະເຂົ້າໃຈຢ່າງຈະແຈ້ງເຖິງຄວາມຈໍາເປັນໃນການເຮັດປະກັນສັງຄົມທີ່ມີຜົນຕໍ່ກັບສຸຂະພາບຂອງປະຊາຊົນ.

ທ່ານ ນາງ ບົວຫອມ ພົມມະຈັນກ່າວວ່າ: ກອງທຶນປະກັນສັງຄົມໃຫ້ການຄຸ້ມຄອງແກ່ພະນັກງານ-ລັດຖະກອນ, ຜູ້ອອກແຮງງານໃນຂົງເຂດວິສາຫະກິດ ແລະຜູ້ປະກອບອາຊີບອິດສະຫລະ ໂດຍມີການສົມທົບທຶນໃນອັດຕາທີ່ກຳນົດຕາມກົດໝາຍວ່າດ້ວຍການປະກັນສັງຄົມ ຕາມຫຼັກການທາງດ້ານຄະນິດສາດປະກັນສັງຄົມ ເຊິ່ງມີການກຳນົດ  ອັດຕາການຈ່າຍດັ່ງນີ້: ພາກລັດແມ່ນ 16,5% ໃນນີ້ ( ລັດຖະບານສົມທົບ 8,5% ແລະພະນັກງານ-ລັດຖະກອນຈ່າຍ 8%), ພາກວິສາຫະກິດ ແມ່ນ 11,5% ( ຜູ້ໃຊ້ແຮງງານສົມທົບ 6% ແລະ ຜູ້ອອກແຮງງານຈ່າຍ 5,5%) ແລະ ຜູ້ສະໝັກໃຈແມ່ນ ຈ່າຍ 9% ຂອງວົງເງິນປະກັນທີ່ສາມາດເລືອກໄດ້, ຊຶ່ງໄດ້ມີການຈັດສັນເປັນ 5 ກອງທຶນຍ່ອຍ ຄື: ກອງທຶນອຸດໜູນປິ່ນປົວສຸຂະພາບ, ກອງທຶນອຸດໜູນອຸປະຕິເຫດວຽກງານແລະ ພະຍາດອາຊີບ, ກອງທຶນອຸດໜູນໄລຍະສັ້ນ, ກອງທຶນອຸດໜູນໄລຍະຍາວ ແລະ ກອງທຶນອຸດໜູນວ່າງານ.

ກອງທຶນປະກັນສັງຄົມໄດ້ສະໜອງການອຸດໜູນທັງໝົດ 09 ປະເພດ ໃນນີ້ອົງການປະກັນສັງຄົມຮັບຜິດຊອບຈັດຕັ້ງປະຕິບັດ 08 ການອຸດໜູນຄື: ປ່ວຍການ, ອຸປະຕິເຫດແຮງງານ ຫລື ພະຍາດອາຊີບ, ອອກລູກ, ເສຍກຳລັງແຮງງານ, ບຳນານ, ເສຍຊີວິດ, ສະມາຊິກຄອບຄົວ ແລະ ວ່າງງານ;  ສ່ວນອຸດໜູນປະກັນສຸຂະພາບ ແມ່ນຫ້ອງການປະກັນສຸຂະພາບແຫ່ງຊາດ ກະຊວງສາທາລະນະສຸກເປັນຜູ້ຈັດຕັ້ງປະຕິບັດ ຕາມກົດໝາຍວ່າດ້ວຍການປະກັນສຸຂະພາບ ນັບແຕ່ເດືອນ ກໍລະກົດປີ 2019 ເປັນຕົ້ນມາ, ອົງການປະກັນສັງຄົມແຫ່ງຊາດ ໄດ້ໂອນກອງທຶນອຸດໜູນປິ່ນປົວສຸຂະພາບ(1,25%)ໃຫ້ ໂດຍຄິດໄລ່ຕາມລາຍຮັບເງິນສົມທົບໃນແຕ່ລະເດືອນເພື່ອສະໜອງການສະໜູນອຸດໜູນປິ່ນປົວສຸຂະພາບໃຫ້ກັບສະມາຊິກປະກັນສັງຄົມ ແລະຄອບຄົວຂອງເຂົາເຈົ້າ;​ ປະຈຸບັນສະມາຊິກປະກັນສັງຄົມທີ່ຈ່າຍເງິນສົມທົບ ມີຈໍານວນ   388,660 ຄົນ ແລະ ມີຜູ້ເກີດສິດໃນການຄຸ້ມຄອງຈາກລະບົບປະກັນສັງຄົມ (ຜູ້ປະກັນຕົນ, ຄູ່ສົມລົດ ແລະລູກ) ລວມທັງໝົດ 828,403 ຄົນ.

ທ່ານນາງ ດວງເດືອນ ຈັນທະວົງ ຫົວໜ້າພະແນກໂຄສະນາປະຊາສໍາພັນອົງການປະກັນສັງຄົມໄດ້ໃຫ້ຮູ້ວ່າ: ກົດໝາຍວ່າດ້ວຍການປະກັນສັງຄົມສະບັບປັບປຸງ ເລກທີ 54/ສພຊ ລົງວັນທີ 27 ມິຖຸນາ 2018 ໄດ້ກໍານົດຫຼັກການ, ລະບຽບການ ແລະມາດຕະການກ່ຽວກັບການຈັດຕັ້ງ, ການເຄື່ອນໄຫວ, ການຄຸ້ມຄອງ ແລະ ການກວດກາວຽກງານປະກັນສັງຄົມເພື່ອໃຫ້ວຽກງານດັ່ງກ່າວເປັນລະບົບ, ເຂັ້ມແຂງ ແລະ ມີປະສິດທິພາບຮັບປະກັນການປົກປ້ອງສິດ ແລະ ຜົນປະໂຫຍດຂອງຜູ້ໃຊ້ແຮງງານ, ຜູ້ປະກັນຕົນ ແລະ ສະມາຊິກຄອບຄົວ ດ້ວຍການປະກອບທຶນສົມທົບ ແລະ ການສະໜອງການອຸດໜູນປະກັນສັງຄົມ ແນໃສ່ຄໍ້າປະກັນການດໍາລົງຊີວິດຂັ້ນພື້ນຖານ, ການສ້າງຄວາມສາມັກຄີປອງດອງ, ສາມາດເຊື່ອມໂຍງກັບພາກພື້ນ ແລະສາກົນ, ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ, ຊຶ່ງກົດໝາຍສະບັບນີ້ວ່າດ້ວຍການປະກັນສັງຄົມ ສະບັບນີ້ ປະກອບມີ 12 ພາກ ແລະ 123 ມາດຕາ.

แชร์