ພິທີເອົາທຸງຊາດລາວ ແລະທຸງອາຊຽນຂຶ້ນສູ່ຍອດເສົາ ເພື່ອສະເຫຼີມສະຫຼອງ ວັນຄົບຮອບ 26 ປີ ສປປ ລາວ ເຂົ້າເປັນສະມາຊິກອາຊຽນ (23 ກໍລະກົດ 1997 ສິງຫາ 2023) ແລະວັນຄົບຮອບ 56 ປີ ແຫ່ງການສ້າງຕັ້ງອາຊຽນ

ໃນວັນທີ 8 ສິງຫາ 2023, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ເປັນປະທານພິທີເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ເພື່ອສະເຫຼີມສະຫຼອງ ວັນຄົບຮອບ 26 ປີ ສປປ ລາວ ເຂົ້າເປັນສະມາຊິກອາຊຽນ (23 ກໍລະກົດ 1997) ແລະວັນຄົບຮອບ 56 ປີ ແຫ່ງການສ້າງຕັ້ງອາຊຽນ (8 ສິງຫາ 1967- 8 ສິງຫາ 2023), ທີ່ກະຊວງການຕ່າງປະເທດໂດຍມີບັນດາລັດຖະມົນຕີທີ່ຮັບຜິດຊອບສາມເສົາຄໍ້າປະຊາຊົມອາຊຽນ, ບັນດາຮອງລັດຖະມົນຕີ, ບັນດາເອກອັກຄະລັດຖະທູດຂອງບັນດາປະເທດສະມາຊິກອາຊຽນປະຈໍາ ສປປ ລາວ, ຍັງມີເອກອັກຄະລັດຖະທູດ ຕີມໍແລັດສະເຕ ປະຈໍາ ສປປ ລາວ, ຄະນະກົມ ແລະພະນັກງານກ່ຽວຂ້ອງຂອງກະຊວງການຕ່າງປະເທດ ແລະກະຊວງທີ່ກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ຢໍ້າເຖິງຄວາມ ໝາຍອັນສໍາຄັນຂອງອາຊຽນກໍຄືຜົນສໍາເລັດດ້ານຕ່າງໆທີ່ອາຊຽນຍາດມາໄດ້ຕະຫລອດໄລຍະ 56 ປີຜ່ານມາ, ໂດຍສະເພາະການຮ່ວມມືຕາມວິຖີທາງຂອງອາຊຽນທີ່ໄດ້ຮັບຜົນສໍາເລັດເປັນກ້າວໆມາຈົນກາຍເປັນປະຊາຄົມອາຊຽນໃນປະຈຸບັນ ແລະ ເປີດກວ້າງການຮ່ວມມືກັບພາຍນອກໂດຍອາຊຽນເປັນແກນກາງ, ຊຶ່ງເປັນການປະກອບສ່ວນເຂົ້າໃນການປົກປັກຮັກສາສັນຕິພາບ ແລະສະຖຽນລະພາບໃນພາກພື້ນກໍຄືໃນໂລກ. ພ້ອມດຽວກັນນີ້, ທ່ານ ຮອງນາຍົກລັດຖະມົນຕີ ຍັງໄດ້ຍົກໃຫ້ເຫັນການປະກອບສ່ວນຢ່າງຕັ້ງໜ້າ ແລະເປັນເຈົ້າການສູງ ຂອງ ສປປ ລາວ ໃນວຽກງານອາຊຽນ ຕະຫລອດໄລຍະ 26 ປີ ຜ່ານມາ ອັນໄດ້ເຮັດໃຫ້ບົດບາດຂອງ ສປປລາວ ໃນພາກພື້ນ ແລະສາກົນນັບມື້ພົ້ນເດັ່ນຂຶ້ນ ແລະຢືນຢັນຄວາມຫມາຍໝັ້ນຂອງ ສປປ ລາວ ທີ່ຈະສືບຕໍ່ຮ່ວມມືກັບປະເທດສະມາຊິກອາຊຽນ ແລະ ຄູ່ຮ່ວມມືພາຍນອກຂອງອາຊຽນເພື່ອເສີມສ້າງປະຊາຄົມອາຊຽນໃຫ້ເຂັ້ມແຂງກໍຄືເພື່ອພາລະກິດລວມແຫ່ງສັນຕິພາບ, ສະຖຽນລະພາບ ແລະການພັດທະນາໃນພາກພື້ນໃນໂລກ. ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ເນັ້ນຢໍ້າເຖິງຄວາມໝາຍຄວາມສໍາຄັນຂອງການເປັນປະທານອາຊຽນຂອງ ສປປ ລາວ ໃນປີ 2024 ແລະໄດ້ສະແດງຄວາມຂອບໃຈຕໍ່ບັນດາປະເທດສະມາຊິກອາຊຽນ ແລະ ປະເທດຄູ່ເຈລະຈາກໍ່ຄືຄູ່ຮ່ວມມືພາຍນອກອາຊຽນສໍາລັບການຊ່ວຍເຫຼືອ ແລະການສະໜັບສະໜູນການກະກຽມການເປັນປະທານອາຊຽນຂອງ ສປປ ລາວ ໃນປີ 2024.

แชร์