ເດັກຍິງອາຍຸລະຫວ່າງ 10-17 ປີ ຄວນໄປຮັບວັກຊີນກັນມະເຮັງປາກມົດລູກ

ກອງປະຊຸມຊີ້ແຈງໃຫ້ສື່ມວນຊົນກ່ຽວກັບຂະບວນການໃຫ້ວັກຊີນກັນມະເຮັງປາກມົດລູກ ແລະໂຄວິດ-19 ໃນໂຮງຮຽນທົ່ວປະເທດ ຈັດຂຶ້ນວັນທີ 8 ສິງຫາ 2023 ທີ່ໂຮງແຮມລາວພລາຊາ ເປັນປະທານຮ່ວມຂອງທ່ານ ນາງ ດາວດວງຈັນ ບູລົມມະວົງ ຮອງຫົວໜ້າຫ້ອງການກະຊວງສາທາລະນະສຸກທ່ານ ບັນດິດ ຊຸມພົນພັກດີ ຫົວໜ້າສູນສຸຂະພາບແມ່ ແລະເດັກກະຊວງສາທາລະນະສຸກທ່ານ ຢູນັດ ຫົວໜ້າພະແນກສາທາລະນະສຸກ ປະຈຳອົງການຢູນີເຊບ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ບັນດິດ ຊຸມພົນພັກດີ ກ່າວວ່າ: ເດັກຍິງ ແລະໄວໜຸ່ມທຸກຄົນອາຍຸລະຫວ່າງ 10 ຫາລຸ່ມ 17 ປີຈະໄດ້ຮັບການປ້ອງກັນຈາກໄວຣັດສ໌ HPV ເຊິ່ງເປັນສາເຫດຫຼັກທີ່ພາໃຫ້ເກີດມະເຮັງປາກມົດລູກໃນຂະບວນການສັກວັກຊີນກັນມະເຮັງປາກມົດລູກ ຢູ່ໃນໂຮງຮຽນຂອງທຸກແຫ່ງໃນ ສປປ ລາວ ຊ່ວງເດືອນກັນຍາປີ 2023 ມະເຮັງປາກມົດລູກເປັນມະເຮັງທີ່ພົບເຫັນຫຼາຍທີ່ສຸດເປັນອັນດັບສອງສໍາລັບມະເຮັງທີ່ເກີດໃນແມ່ຍິງ ໃນ ສປປ ລາວ ແລະມະເຮັງປາກມົດລູກ 99.7% ແມ່ນເກີດຈາກເຊື້ອໄວຣັດສ໌ HPV ເພື່ອແກ້ໄຂບັນຫາດັ່ງກ່າວ ລັດຖະບານແຫ່ງ ສປປ ລາວ ໄດ້ຮັບການສະໜັບສະໜູນຈາກກອງທຶນກາວີໂດຍຜ່ານອົງການອະນາໄມໂລກ ແລະ ອົງການ ຢູນິເຊັບ ໄດ້ນຳເຂົ້າວັກຊີນກັນມະເຮັງປາກມົດລູກ ແລະ ໃຫ້ບໍລິການທົ່ວປະເທດເລິ່ມແຕ່ປີ 2020 ເຊິ່ງຂະບວນການດັ່ງກ່າວມີຄວາມຄືບໜ້າຄືເດັກຍິງອາຍຸ 12-16 ປີຫຼາຍກວ່າ 90% ໃນ ສປປ ລາວ ໄດ້ຮັບວັກຊີນກັນມະເຮັງປາກມົດລູກແລ້ວຢ່າງໜ້ອຍໜຶ່ງຄັ້ງ.

ຂະບວນການໃຫ້ວັກຊີນຄັ້ງນີ້ເປັນຂີດໝາຍອັນໜຶ່ງໃນການສົ່ງເສີມສຸຂະພາບຂອງເດັກຍິງ ແລະໄວໜຸ່ມໃນ ສປປ ລາວ ວັກຊີນຊະນິດນີ້ສາມາດປ້ອງກັນເດັກຍິງຈາກມະເຮັງປາກມົດລູກ “ວັກຊີນກັນມະເຮັງປາກມົດລູກສາມາດປ້ອງກັນເດັກຍິງຈາກພະຍາດຮ້າຍໄດ້ວັກຊີນກັນມະເຮັງປາກມົດລູກແມ່ນໃຫ້ບໍລິການໂດຍບໍ່ເສຍຄ່າສໍາລັບເດັກຍິງທຸກຄົນທີ່ມີິອາຍຸລະຫວ່າງ 10 ຫາລຸ່ມ 17 ປີ ວັກຊີນຊະນິດນີ້ປອດໄພມີປະສິດທິພາບສູງສາມາດປົກປ້ອງເດັກຍິງຈາກມະເຮັງປາກມົດລູກເຊິ່ງເປັນພະຍາດທີ່ເປັນອັນຕະລາຍແກ່ຊີວິດໄດ້ສະນັ້ນເດັກຍິງທຸກຄົນທີ່ມີອາຍຸລະຫວ່າງ 10 ຫາລຸ່ມ 17 ປີຕ້ອງໄດ້ຮັບວັກຊີນກັນມະເຮັງປາກມົດລູກສອງຄັ້ງສຳລັບໃນປີ 2023 ວັກຊີນເຫຼົ່ານີ້ປອດໄພ ແລະມີປະສິດທິພາບພ້ອມດຽວກັນນັ້ນວັກຊີນກັນມະເຮັງປາກມົດລູກຍັງສາມາດສັກພ້ອມກັບວັກຊີນໂຄວິດ-19ໄດ້.

ເດັກຍິງອາຍຸ 10 ຫາລຸ່ມ 17 ປີ ທຸກຄົນສາມາດໄປຮັບວັກຊີນກັນມະເຮັງປາກມົດລູກໄດ້ທີ່ໂຮງຮຽນ ແລະໃນສະຖານທີ່ບໍລິການສາທາລະນະສຸກທີ່ໃກ້ບ້ານທ່ານ ວັກຊີນກັນມະເຮັງປາກມົດລູກມີໃຫ້ບໍລິການໃນຂອບເຂດທົ່ວປະເທດວັກຊີນດັ່ງກ່າວໄດ້ຮັບທຶນສະໜັບສະໜູນຈາກກອງທືນກາວີ ອົງການອະນາໄມໂລກອົງການຢູນິເຊັບຮ່ວມກັບກະຊວງສາທາລະນະສຸກ ແລະກະຊວງສຶກສາທິການ ແລະກິລາໃນການໃຫ້ບໍລິການໂດຍເຊື່ອມສານກັບການສັກວັກຊີນ ໂຄວິດ-19 ລັດຖະບານແຫ່ງ ສປປ ລາວ ຊ່ວຍປົກປ້ອງໄວໜຸ່ມ ແລະເດັກຍິງລຸ້ນຕໍ່ໄປຈາກການເປັນມະເຮັງປາກມົດລູກໂດຍການໃຫ້ບໍລິການວັກຊີນ.

แชร์