ປະຊາຊົນຫລາຍບ້ານຢູ່ເມືອງອາດສະພອນ ພ້ອມກັນສ້ອມແປງເສັ້ນທາງຄືນໃໝ່

ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ຫລັງຈາກທີ່ຝົນຕົກຕິດຕໍ່ກັນຫລາຍວັນໃນອາທິດຜ່ານມາ, ເຮັດໃຫ້ເກີດມີນນໍ້າຖ້ວມຫລາຍບ້ານຢູ່ເມືອງອາດສະພອນ ເຊິ່ງໄດ້ສົ່ງຜົນກະທົບເຮັດໃຫ້ເສັ້ນທາງການສັນຈອນໄປ-ມາຫາສູ່ກັນ ລະຫວ່າງເມືອງຫາບ້ານ ແລະບ້ານ ຫາ ບ້ານມີຄວາມລຳບາກ ແລະຫຍຸ້ງຍາກ, ບາງບ່ອນຖືກຕັດຂາດຍ້ອນນໍ້າສາຍຫ້ວຍໄຫລຖ້ວມທາງຈົນຕ້ອງໄດ້ໃຊ້ເຮືອ.

ມາໃນລະຫວ່າງວັນທີ 5-7 ສິງຫາ 2023 ນີ້, ການນຳຂອງເມືອງອາດສະພອນ ນຳໂດຍ ທ່ານນາງ ບຸນທະລັງສີ ຄຳມະນີວົງ ເຈົ້າເມືອງອາດສະພອນ ຊີ້ນຳເຂດ-ຊີ້ນຳໜ່ວຍພັກບ້ານຕ່າງໆ ໄດ້ເຄື່ອນໄຫວນຳພາການສ້າງຂະບວນການສ້ອມແປງເສັ້ນທາງທີ່ຖືກເປ່ເພເສຍຫາຍແຕ່ລະເສັ້ນພາຍໃນເມືອງ. ສະນັ້ນ, ອໍານາດການປົກຄອງຈຸດສຸມ-ກຸ່ມບ້ານ, ອຳນາດການປົກຄອງບ້ານ ແລະພໍ່ແມ່ປະຊາຊົນ ຈຶ່ງພ້ອມພາກັນສ້ອມແປງເສັ້ນທາງຄືນໃໝ່ຫລາຍຈຸດເຊັ່ນ: ເສັ້ນທາງຈາກບ້ານຜັກຂະຫຍ່າ ເຂົ້າຫາ ເມືອງ, ບ້ານດົງນາງາມ ເຂົ້າຫາເມືອງ, ບ້ານນາໝາກເກືອ ຫາ ບ້ານຫີນສີ່ວ, ບ້ານວຽງໄຊ ຫາຈຸດສຸມນາເລົ່າ, ໄດ້ມີການວາງເປົາຊາຍຖົມບວກ, ຂຸມແຕ່ລະຈຸດຕາມເສັ້ນທາງທີ່ຖືກກະແສນໍ້າໄຫລຊຸ ແລະ ອະນາໄມຕາມກ້ອງຂົວ ເພື່ອໃຫ້ນໍ້າໄຫລຜ່ານໄດ້ສະດວກ. ທັງນີ້, ກໍເພື່ອເຮັດໃຫ້ການສັນຈອນໄປ-ມາຫາສູ່ລະຫວ່າງບ້ານຕໍ່ບ້ານ ແລະບ້ານຫາເມືອງສະດວກສະບາຍຂື້ນ.
ຂ່າວ: ເມືອງອາດສະພອນ

แชร์