ເມືອງໂພນໄຊ ໄດ້ຮັບຜົນເສຍຫາຍຈາກຝົນຕົກເບື້ອງຕົ້ນ 7 ຕື້ກວ່າກີບ

ເນື່ອງຈາກມີຝົນຕົກລິນຕໍ່ເນື່ອງນັບແຕ່ວັນທີ່ 1-6 ສີງຫາ 2023 ເຮັດໃຫ້ນໍ້າຫ້ວຍຫຼາຍສາຍຢູ່ເຂດເມືອງໂພນໄຊ ເກີດນອງ ແລະ ນໍ້າໄຫຼສຸ, ກະທົບຕໍ່ເສັ້ນທາງຄົມມະນາຄົມຢູ່ພາຍໃນເມືອງ ເຊັ່ນ: ດິນ-ຫີນເຈື່ອນຖົມໜ້າທາງ, ທໍ່ລະບາຍນໍ້າລອດທາງຕັນ ນໍ້າຖ້ວມຂັງຕາມຮ່ອງນໍ້າແຄມທາງ ແລະໜ້າທາງ, ຕົ້ນໄມ້ລົ້ມທັບທາງ ທໍ່ລະບາຍນໍ້າລອດທາງຂາດ, ໜ້າທາງຖືກນໍ້າໄຫຼເຊາະເປັນບວກເປັນຂຸມເປັນຮ່ອງເລິກ ເຊິ່ງກະທົບເສັ້ນທາງ ຈໍານວນ 7 ເສັ້ນ ໃນນັ້ນມີເສັ້ນທາງຫຼວງແຂວງ 1 ເສັ້ນ, ທາງຊົນນະບົດ 6 ເສັ້ນ ເຮັດໃຫ້ການສັນຈອນພົບຄວາມຫຍຸ້ງຍາກສຳລັບເສັ້ນທາງຊົນນະບົດແມ່ນລົດໃຫຍ່ບໍ່ສາມາດສັນຈອນໄດ້.

ພ້ອມນີ້ໄດ້ສົ່ງຜົນກະທົບເຖີງໂຮງງານຜະລິດນໍ້າປະປາ ໃນເທດສະບານເມືອງ ຈົນໄດ້ຢຸດຜະລິດນໍ້າຊົ່ວຄາວ ເປັນມື້ທີ່ 2 ເພາະສະພາບສາຍນໍ້າປາໄດ້ເກີດມີປະລິມານສູງ ແລະມີດິນຊາຍໄຫຼເຂົ້າຖົມໜ້າດີນ ເຮັດໃຫ້ບໍ່ສາມາດຜະລິດນໍ້າໄດ້ ປັດຈຸບັນສາມາດປະເມີນມູນຄ່າຄວາມເສຍຫາຍຜົນກະທົບ ຕໍ່ກັບເສັ້ນທາງໃນເບື້ອງຕົ້ນ 7 ຕື້ 30 ລ້ານກວ່າກີບ. ທ່ານ ແສງເພັດ ອີນທະພອນ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງໂພນໄຊໄດ້ໃຫ້ຮູ້ວ່າ: ປັດຈຸບັນສາມາດສັງລວມຂໍ້ມູນເສັ້ນທາງທີ່ຖືກຜົນກະທົບລວມທັງໝົດ 570 ຈຸດ ຄວາມຍາວຫຼາຍກວ່າ 51 ກິໂລແມັດ ໃນນັ້ນ ເສັ້ນທາງຫຼວງຂອງແຂວງ ເລກທີ່ 2504 ແຕ່ບ້ານປາກເຊືອງ ນະຄອນ ຫຼວງພະບາງ ຫາບ້ານປາກວັງເມືອງໂພນໄຊ ເສຍຫາຍ 142 ຈຸດ, ລວມມູນຄ່າ 2 ຕື້ 268 ລ້ານກວ່າກີບ, ປະຈຸບັນສາມາດແກ້ໄຂໄດ້ໂດຍພື້ນຖານ ແລະເປີດການສັນຈອນໄດ້ ແຕ່ຍັງມີຄວາມຫຍຸ້ງຍາກ ແລະມີຄວາມສ່ຽງເກີດອຸບັດຕິເຫດບາງຈຸດ, ສ່ວນເສັ້ນທາງຊົນນະບົດລວມມີເສັ້ນທາງແຕ່ບ້ານປາກງາ ຫາ ບ້ານລ້ອງຍົມໃຫຍ່ ແລະບ້ານກີ່ວມ່ວງ, ເສັ້ນທາງແຕ່ບ້ານນໍ້າບໍ່ ຫາ ບ້ານຫ້ວຍສາລາ, ເສັ້ນທາງແຕ່ບ້ານຫ້ວຍຂີງ ຫາ ບ້ານດອນຄຳ, ເສັ້ນທາງແຕ່ບ້ານປາກງາ ຫາ ບ້ານປາກສີມ, ເສັ້ນທາງແຕ່ບ້ານຫ້ວຍລຸ້ງເທີງ ຫາບ້ານນາພຽງ ແລະຫ້ວຍຂີງ, ເສັ້ນທາງແຕ່ບ້ານເຮືອໂດຍ ຫາ ບ້ານສັນພູຫຼວງແມ່ນສາມາດທຽວໄດ້ພຽງແຕ່ລົດຈັກເທົ່ານັ້ນ ມູນຄ່າເສຍຫາຍເບື້ອງຕົ້ນ 609 ລ້ານກວ່າກີບ.

ຂໍ້ມູນ: ຫົວໜ້າຫ້ອງການໂຍທາທິການ ແລະ ຂົນສົ່ງເມືອງໂພນໄຊ

แชร์