ຫັນເອົາເຕັກໂນໂລຊີດີຈິຕອນ ເຂົ້າມານຳໃຊ້ໃນທຸກຂົງເຂດຂອງການພັດທະນາເສດຖະກິດ-ສັງຄົມ

ກອງປະຊຸມປະຖົມມະລຶກຄະນະກຳມະການລະດັບຊາດເພື່ອການຫັນເປັນດີຈິຕອນຂອງ ສປປ ລາວ (ຄຊດລ) ຈັດຂຶ້ນວັນທີ 3 ສິງຫາ 2023 ທີ່ຫ້ອງວ່າການສໍານັກງານນາຍົກລັດຖະມົນຕີ ໂດຍເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ປະທານ ຄຊດລ ມີທ່ານຮອງນາຍົກລັດຖະມົນຕີ ຮອງປະທານ ຄຊດລ ແລະລັດຖະມົນຕີ ກຳມະການ ຄຊດລ ເຂົ້າຮ່ວມ.

ທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະການສື່ສານ ຮອງປະທານ ຄຊດລ ທັງເປັນຜູ້ປະຈຳການໄດ້ລາຍງານສະພາບການຫັນເປັນດີຈິຕອນຂອງ ສປປ ລາວ ຕໍ່ກອງປະຊຸມເຊິ່ງທ່ານໄດ້ຍົກໃຫ້ເຫັນຄວາມສຳຄັນ ແລະຈຳເປັນຢ່າງພາວະວິໄສຂອງການນຳເອົາເຕັກໂນໂລຊີດີຈິຕອນເຂົ້າມານຳໃຊ້ ໃນທຸກຂົງເຂດຂອງການພັດທະນາເສດຖະກິດ-ສັງຄົມ ແລະການບໍລິຫານວຽກງານຂອງພັກ-ລັດ ກໍຄືໃນການດຳເນີນທຸລະກິດ ແລະຊີວິດການເປັນຢູ່ຂອງທົ່ວສັງຄົມ ໃນຂອບເຂດທົ່ວປະເທດເພື່ອເຮັດໃຫ້ການຜະລິດ ແລະການພົວພັນການຜະລິດ ມີປະສິດຕິພາບ ແລະມີຄຸນນະພາບໃໝ່ທີ່ດີຂຶ້ນກວ່າເກົ່າ.

ການຫັນເປັນດີຈິຕອນຢູ່ປະເທດເຮົາຖືເປັນພາລະກິດປະຕິວັດທີ່ສຳຄັນໃນການຫັນເປັນອຸດສາຫະກຳ ແລະທັນສະໄໝຕາມແນວທາງປ່ຽນແປງໃໝ່ຂອງພັກເຮົາ ແລະ ເພື່ອບຸກທະລຸການພັດທະນາເສດຖະ ກິດ-ສັງຄົມຂອງປະເທດເຮົາ ໃນສະເພາະໜ້າ ແລະ ຍາວນານ ຊຶ່ງຈະຕ້ອງດຳເນີນຢ່າງເລິກເຊິ່ງໃນ 3 ດ້ານ ທີ່ກ່ຽວພັນເຊິ່ງກັນ ແລະ ກັນ ແບບກາຍອິນຊີ ຄື: 1 ສ້າງເສດຖະກິດດີຈິຕອນ ເຊິ່ງເປັນການນຳເອົາເຕັກໂນໂລຊີດີຈິຕອນ ເຂົ້າມາຊ່ວຍໃນການເພີ່ມປະສິດທິພາບ ແລະ ສ້າງມູນຄ່າເພີ່ມ ໃຫ້ກັບການດຳເນີນກິດຈະການທາງເສດທະກິດການຜະລິດການຈັດສົ່ງການຂາຍ ການບໍລິການການຄຸ້ມຄອງ ແລະສົ່ງເສີມວຽກນີ້ໃຫ້ເປັນທ່າແຮງ 2 ສ້າງສັງຄົມດີຈິຕອນເຊິ່ງຈະເຮັດໃຫ້ສັງຄົມເຂົ້າເຖິງການບໍລິການຕ່າງໆໄດ້ຢ່າງທົ່ວເຖິງຫຼາຍຂຶ້ນ ແລະຈະເຮັດໃຫ້ຫຼຸດຜ່ອນຄວາມແຕກໂຕນລະຫວ່າງຕົວເມືອງ ແລະ ຊົນນະບົດ ແລະ 3 ສ້າງການລັດຖະບານດີຈິຕອນເພື່ອເຮັດໃຫ້ການຄຸ້ມຄອງ ແລະ ການບໍລິການຂອງພາກລັດມີຄວາມທັນສະໄໝໂປ່ງໃສໂດຍຕິດພັນກັບການພັດທະນາຊັບພະຍາກອນມະນຸດທີ່ມີຄຸນະພາບສູງສ້າງພື້ນຖານໂຄງລ່າງ ICT ທີ່ທັນສະໄໝກະກຽມຂະຫຍາຍການທົດລອງນຳໃຊ້ 5G ສ້າງ ສປປ ລາວ ເປັນສູນກາງເຊື່ອມໂຍງເຊື່ອມຈອດ ແລະເປັນທາງຜ່ານດີຈິຕອນຂອງພາກພື້ນປົກປັກຮັກສາສິ່ງແວດລ້ອມ ແລະຮັບປະກັນຄວາມປອດໄພດ້ານໄຊເບີ ຢ່າງໜັກແໜ້ນ.
ທີ່ມາ: ວຽງຈັນໃໝ່

แชร์