ຜະລິດຕະພັນລາວ ກ້າວໄປຫນ້າຍາກ ສັງຄົມບໍ່ນິຍົມໃຊ້ ວອນລັດຊ່ວຍດ້ານຕະຫລາດ

ຜະລິດຕະພັນລາວໂດຍສະເພາະແປ້ງນົວ,ຢາສະຜົມາ,ສະບູ,ນໍ້າຢາລ້າງຈານ ແລະອື່ນໆອີກຫລາຍຢ່າງທີ່ຂຶ້ນຊື່ເປັນຜະລິດຕະພັນລາວເຫັນໄດ້ວ່າຄ່ານີຍົມໃນການນໍາໃຊ້ຂອງສັງຄົມລາວ ຍັງບໍ່ໄດ້ຮັບຜົນຕອບຮັບດີເທົ່າທີ່ຄວນ ຊື່ງເປັນສາເຫດເຮັດໃຫ້ທ່າແຮງການຜະລິດ ແລະການກະຈາຍສິນຄ້າພາຍໃນປະເທດບໍ່ທົ່ວເຖິງ.

ທ່ານ ຄຳສິງ ສີຫາເທບ ປະທານສູນສົ່ງເສີມຜະລິດຕະພັນລາວປອດສານພິດເປີດເຜີຍວ່າ: ປະຈຸບັນທາງສູນໄດ້ຜະລິດສິນຄ້າປອດສານພິດທີ່ຄົນລາວຜະລິດເອງ ອອກມາຈຳໜ່າຍຫລາກຫລາຍຜະລິດຕະພັນບໍ່ວ່າຈະເປັນແປ້ງນົວປອດສານພິດທີ່ຜະລິດຈາກຕົ້ນແປ້ງນົວ, ຢາສະຜົມໝາກຂີ້ຫູດ, ສະບູທີ່ສະກັດຈາກໝາກໄມ້, ນ້ຳຢາລ້າງຈານ ແລະອື່ນໆ ອີກຫລາຍຢ່າງ. ແຕ່ຜົນຕອບຮັບຈາກສັງຄົມຍັງບໍ່ດີເທົ່າທີ່ຄວນ ເຊິ່ງຍັງມີຄ່ານິຍົມໃນການນຳໃຊ້ສິນຄ້າຕ່າງປະເທດຢູ່ທັງໆທີ່ຜະລິດຕະພັນທີ່ກ່າວມາເປັນຜະລິດຕະພັນທີ່ດີ, ມີຄຸນນະພາບ, ສາມາດກວດສອບແຫລ່ງທີ່ມາຂອງການຜະລິດໄດ້. ນອກຈາກນີ້, ສິນຄ້າທຸກອັນລ້ວນແລ້ວແຕ່ໄດ້ຮັບການຮັບຮອງຈາກ ກົມອາຫານ ແລະຢາ (ກອຢ) ກະຊວງສາທາລະນະສຸກ ວ່າເປັນຜະລິດຕະພັນທີ່ໄດ້ມາດຕະຖານ ແລະມີກາໝາຍໂອດັອບຮັບຮອງຕື່ມອີກ.

ພ້ອມກັນນີ້, ກໍຢາກໃຫ້ພາກລັດຊ່ວຍສົ່ງເສີມໃນເລື່ອງຂອງການຕະຫລາດເພື່ອໃຫ້ຜະລິດຕະພັນສິນຄ້າຂອງລາວເຮົາກະຈາຍໄປໃນທົ່ວປະເທດໃຫ້ກົງກັບຄຳຂວັນທີ່ວ່າ “ລາວເຮັດ ລາວໃຊ້ ລາວໄດ້ ລາວຈະເລີນ”. ສະນັ້ນຢາກຮຽກຮ້ອງໃຫ້ຄົນລາວເປີດໃຈກັບຜະລິດຕະພັນຂອງຄົນລາວເຮົາຜະລິດເອງພາຍໃນໃຫ້ຫລາຍກວ່ານີ້ເພື່ອໃຫ້ຜູ້ຜະລິດມີແຮງກຳລັງໃຈໃນການສານຕໍ່ ແລະພັດທະນາສິນຄ້າໃຫ້ມີມາດຕະຖານຍິ່ງຂຶ້ນທຽບເທົ່າສິນຄ້າຕ່າງປະເທດ.
ທີ່ມາ: ຂປລ

แชร์