ຄຳມ່ວນ ຈັດພິທີລະນຶກວັນສາກົນ ເພື່ອຕ້ານການຄ້າມະນຸດ ປະຈໍາປີ 2023

ໃນວັນທີ 2 ສິງຫາ 2023 ນີ້ ທີ່ສະໂມສອນແຂວງ ຄໍາມ່ວນ ຈັດພິທີລະນຶກວັນສາກົນ ເພື່ອຕ້ານການຄ້າມະນຸດ ປະຈໍາປີ 2023 ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ປະທານຄະນະກໍາມະການຕ້ານການຄ້າມະນຸດຂັ້ນແຂວງ, ມີບັນດາທ່ານໃນຄະນະກຳມະການຕ້ານການຄ້າມະນຸດ, ຕາງໜ້າພະແນກການ, ອົງການຈັດຕັ້ງອ້ອມຂ້າງແຂວງ, ຕະຫຼອດຮອດຂົງເຂດກໍາລັງ ປກຊ-ປກສ ເຂົ້າຮ່ວມຢ່າງພ້ອມພຽງ.

ທ່ານ ພັນເອກ ຄໍາສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງ ໄດ້ເປັນກຽດຂຶ້ນຜ່ານບົດປາໃສ ແລະຍົກໃຫ້ເຫັນເຖິງບັນດາເຫດການຂອງການຄ້າມະນຸດວ່າ : ບັນຫາການຄ້າມະນຸດ ແມ່ນບັນຫາອາຊະຍາກຳຂ້າມຊາດ ທີ່ມີການຈັດ ຕັ້ງທີ່ຮ້າຍແຮງ ເຊິ່ງໄດ້ເກີດຂຶ້ນ, ກຳລັງເກີດ ແລະ ຍັງຈະສືບຕໍ່ເກີດຂຶ້ນ ດ້ວຍຫຼາຍຮູບການ,ຫຼາຍວິທີການ, ມີລັກສະນະເປັນເຄື່ອຂ່າຍ, ສັບສົນ, ທຸກຄົນ ທຸກເພດ ທຸກໄວ ສາມາດຕົກເປັນຜູ້ຖືກເຄາະຮ້າຍຈາກການຄ້າມະນຸດໄດ້ຖ້າບໍ່ມີສະຕິລະວັງຕົວ, ຈຸດປະ ສົງຕົ້ນຕໍຂອງການຄ້າມະນຸດ ແມ່ນການຂູດຮີດແຮງງານຂູດຮີດທາງເພດ ເພື່ອຫາຜົນປະໂຫຍດທີ່ຜິດກົດໝາຍ, ແຕ່ລະປີ ໃນທົ່ວໂລກມີຜູ້ຖືກເຄາະຮ້າຍຈາກການຄ້າມະນຸດ ຈຳນວນຫຼາຍລ້ານຄົນ ໃນນີ້ລວມມີເດັກ ແລະຫຼາຍລ້ານຄົນຖືກບັບຄັບໃຫ້ແຕ່ງງານ ແລະ ຖືກຂູດຮີດທາງເພດ. ສປປ ລາວ ກໍ່ເປັນປະເທດໜຶ່ງໃນບັນດາປະເທດທີ່ໄດ້ຮັບຜົນກະທົບຈາກການຄ້າມະນຸດເນື່ອງຈາກທີ່ຕັ້ງພູມສັນຖານຂອງປະເທດມີຄວາມສະດວກໃນການເດີນທາງເຂົ້າ-ອອກ ຂອງພົນລະເມືອງລາວ ແລະ ຕ່າງປະ ເທດ, ພ້ອມທັງເປັນປະເທດທີ່ກໍາລັງພັດທະນາທາງດ້ານເສດຖະກິດຢ່າງກ້ວາງຂວາງເຊິ່ງມີຄວາມຮຽກຮ້ອງຕ້ອງການກຳລັງແຮງງານນັບມື້ນັບສູງຂຶ້ນ, ໃນໄລຍະຜ່ານມາ ເຈົ້າໜ້າທີ່ໄດ້ພົບເຫັນການຄ້າມະນຸດເກີດຂຶ້ນຢູ່ປະເທດເຮົາໃນຫຼາຍຮູບແບບ ເປັນຕົ້ນ: ການຫຼອກລວງຜູ້ຖືກເຄາະຮ້າຍໄປຂາຍແຮງງານ ຫຼື ບັງຄັບແຮງງານ, ບັງຄັບບໍລິການທາງເພດ, ການຮັບຈ້າງຖືພາຜິດກົດໝາຍ ແລະ ການຖ່າຍທອດສົດການເປືອຍກາຍຈົນໄປຮອດການຮ່ວມເພດ ຂອງຍິງ-ຊາຍ ອອກຜ່ານທາງສື່ສັງຄົມອອນລາຍ. ນອກນັ້ນ, ຍັງມີຂະບວນການໂຄສະນາ, ຊັກຊວນຜ່ານທາງສື່ອອນລາຍ ແລະຜ່ານນາຍໜ້າໂດຍກົງ ໄດ້ຕົວະຍົວະຊາວໜຸ່ມ-ໄວໜຸ່ມ ໄປອອກແຮງງານເຮັດວຽກຢູ່ເຂດເສດຖະກິດພິເສດສາມລ່ຽມຄຳ, ເມືອງຕົ້ນເຜິ້ງ, ແຂວງບໍ່ແກ້ວ ເຊິ່ງເຮັດໃຫ້ບັນດາຊາວໜຸ່ມ-ໄວໜຸ່ມທັງຍິງ ແລະຊາຍທີ່ເປັນຄົນລາວ ແລະຕ່າງປະເທດຕົກເປັນຜູ້ຖືກເຄາະຮ້າຍ ແລະກຸ່ມສ່ຽງຂອງການຄ້າມະນຸດຈຳນວນຫຼາຍ. ແຕ່ເຖິງຢ່າງໃດກໍ່ຕາມການຄ້າມະນຸດນັບວ່າເປັນບັນຫາທີ່ທຸກປະເທດໃນໂລກ ແລະສາກົນຖືເປັນສໍາຄັນຢ່າງຍິ່ງ ເພາະມັນເປັນໄພຂົ່ມຂູ່ຕໍ່ຄວາມສະຫງົບ ແລະຄວາມເປັນລະບຽບຮຽບຮ້ອຍຂອງສັງຄົມ.

ໂອກາດເຂົ້າຮ່ວມພິທີຄັ້ງນີ້ທ່ານ ແກ້ວອຸດອນ ບຸດສິງຂອນ ຍັງໄດ້ຕີລາຄາໃຫ້ເຫັນຕໍ່ຄວາມເອົາໃຈໃສ່ຂອງບັນດາຂະແໜງການທີ່ກ່ຽວຂ້ອງທີ່ຮັບຜິດຊອບວຽກງານຕ້ານການຄ້າມະນຸດຂັ້ນແຂວງ ແລະ ຂັ້ນເມືອງ ທີ່ໄດ້ມີຄວາມພະຍາຍາມ ໃນການຈັດຕັ້ງປະຕິບັດແຜນງານແຫ່ງຊາດວ່າດ້ວຍການຕ້ານການຄ້າມະນຸດດ້ວຍຫຼາຍຮູບການ ບໍ່ວ່າຈະເປັນການປັບປຸງນິຕິກຳທີ່ກ່ຽວຂ້ອງ ເຊັ່ນ: ນິຕິກຳວ່າດ້ວຍການຄຸ້ມຄອງວິສາຫະກິດບໍລິການຈັດຫາງານ, ການເພີ່ມຄ່າແຮງງານຂັ້ນຕໍ່າຂອງພາກວິສາຫະກິດ ແລະແຮງງານນອກລະບົບ, ການແກ້ໄຂຂໍ້ຂັດແຍ່ງແຮງງານ, ການໄກ່ເກ່ຍການກະທຳຜິດຂອງເດັກ, ການປົກປ້ອງສິດ ແລະ ຜົນປະໂຫຍດຂອງເດັກນ້ອຍກໍ່ຄືການໂຄສະນາປູກຈິດສໍານຶກກ່ຽວກັບບັນຫາດັ່ງກ່າວຢ່າງກວ້າງຂວາງໃນທົ່ວສັງຄົມທັງນຳໃຊ້ມາດຕະການທີ່ເດັດຂາດທາງດ້ານກົດໝາຍຕໍ່ຜູ້ກະທຳຜິດ.

ພ້ອມນີ້, ຍັງໄດ້ຮຽກຮ້ອງມາຍັງພະນັກງານ, ທະຫານ, ຕຳຫຼວດ ແລະປະຊາຊົນບັນດາເຜົ່າທຸກຊັ້ນຄົນຈົ່ງພ້ອມກັນຮ່ວມແຮງ, ຮ່ວມໃຈຕ້ານໄພຄ້າມະນຸດ ແລະເປັນເຈົ້າການປະກອບສ່ວນເຮັດວຽກງານສະກັດກັ້ນ ແລະແກ້ໄຂບັນຫາການຄ້າມະນຸດ ໃຫ້ກ້ວາງຂວາງ, ແຂງແຮງເພື່ອເຮັດໃຫ້ການຄ້າມະນຸດຫຼຸດລົງ ແລະໝົດໄປຈາກ ສປປລາວ.
ທີ່ມາ: ມີເດຍລາວ

แชร์