ເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ແຂວງຜົ້ງສາລີ

ທະນາຄານແຫ່ງ ສປປ ລາວ ສາຂາພາກເໜືອ ແຂວງອຸດົມໄຊ ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດສະບັບປັບປຸງຢູ່ແຂວງຜົ້ງສາລີ ເມື່ອວັນທີ 1 ສິງຫາ ຜ່ານມາ ທີ່ຫ້ອງປະຊຸມຫ້ອງວ່າການແຂວງຜົ້ງສາລີ ໂດຍການເຂົ້າຮ່ວມເປັນປະທານຂອງທ່ານ ວັນໄຊ ສຸກສັນ ຫົວໜ້າພະແນກການເງິນແຂວງ,ມີທ່ານນາງ ແສງສຸລີ ອຸ່ນອາລີ ຮອງຫົວໜ້າສາຂາທະນາຄານແຫ່ງ ສປປ ລາວ ພາກເໜືອແຂວງອຸດົມໄຊ,ມີພາກສ່ວນກ່ຽວຂ້ອງຈາກພາກລັດ ແລະເອກະຊົນເຂົ້າຮ່ວມ.

ໂອກາດນີ້, ທ່ານ ວັນໄຊ ສຸກສັນ ໄດ້ກ່າວວ່າ: ວຽກງານຄຸ້ມຄອງເງິນຕາຕ່າງປະເທດແມ່ນວຽກໜຶ່ງທີ່ຕິດພັນສະນິດແໜ້ນກັບທຸກຂົງເຂດວຽກງານນັບທັງສູນກາງຮອດທ້ອງຖິ່ນເປັນເຄື່ອງມືໃນການຄຸ້ມຄອງ ແລະດັດສົມເງິນຕາຕ່າງປະເທດໃນສັງຄັມ, ຄຸ້ມຄອງການນຳເງິນເຂົ້າ-ອອກ ຂອງນັກລົງທຶນພາຍໃນ ແລະຕ່າງປະເທດ, ຜູ້ປະກອບການນຳເຂົ້າ-ສົ່ງອອກ, ບຸກຄົນ, ນິຕິບຸກຄົນທີ່ຖືຄອງເງິນຕາຕ່າງປະເທດໃຫ້ເຂົ້າສູ່ລະບົບ ແລະລະບຽບກົດໝາຍເທື່ອລະກ້າວ. ສະນັ້ນ, ຂັ້ນເທິງຈຶ່ງໄດ້ມີການປັບປຸງ ແລະ ສ້າງນິຕິກຳທີ່ກ່ຽວຂ້ອງເປັນແຕ່ລະໄລຍະພ້ອມທັງມີການຈັດຕັ້ງເຜີຍແຜ່ໃນຂອບເຂດທົ່ວປະເທດໂດຍສະເພາະ 4 ແຂວງພາກເໜືອ ທີ່ສາຂາ ທະນາຄານແຫ່ງ ສປປ ລາວ ພາກເໜືອແຂວງອຸດົມໄຊຄຸ້ມຄອງກໍຄືແຂວງຜົ້ງສາລີ ຂອງພວກເຮົາເພື່ອໃຫ້ຮັບຮູ້ ແລະເຊື່ອມຊຶມຢ່າງທົ່ວເຖິງກັນ.

ທ່ານ ນາງ ແສງສຸລີ ອຸ່ນອາລີ ໃຫ້ຮູ້ຕື່ມວ່າ: ປັດຈຸບັນກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດສະບັບປັບປຸງເລກທີ 15/ສພຊ ລົງວັນທີ 7 ກໍລະກົດ 2022 ໄດ້ອອກມາປ່ຽນແທນກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດສະບັບເລກທີ 55/ສພຊ ລົງວັນທີ 22 ທັນວາ 2014 ຈຸດປະສົງກໍເພື່ອຊຸກຍູ້ສົ່ງເສີມການຈໍລະຈອນເງິນຕາການຄ້າການບໍລິການ ການລົງທຶນໃຫ້ມີປະສິດທິພາບສ້າງຄວາມເຂັ້ມແຂງຖານະການຊໍາລະກັບຕ່າງປະເທດ ແລະຄັງສໍາຮອງເງິນຕາແນ່ໃສ່ຍົກສູງຄຸນຄ່າ ແລະຮັກສາສະຖານນະພາບຂອງເງິນຕາແຫ່ງຊາດ.

ຊຶ່ງຈຸດປະສົງໃນການເຜີຍແຜ່ກົດໝາຍຄັ້ງນີ້ກໍເພື່ອແນໃສ່ໃຫ້ບັນດາຜູ້ເຂົ້າຮ່ວມໄດ້ຮັບຮູ້ ແລະເຂົ້າໃຈຕໍ່ກັບເນື້ອໃນກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ຢ່າງຈະແຈ້ງແນໃສ່ຊຸກຍູ້ສົ່ງເສີມການຈໍລະຈອນເງິນຕາ,ຄຸ້ມຄອງເງິນຕາຕ່າງປະເທດຖືກຕ້ອງສອດຄ່ອງຕາມລະບຽບ-ກົດໝາຍ,ຫັນເຂົ້າສູ່ລະບົບເທື່ອລະກ້າວ ແລະ ຫຼຸດຜ່ອນການນຳໃຊ້ເງິນຕາຕ່າງປະເທດແບບຊະຊາຍໃນສັງຄົມເພື່ອໃຫ້ມີຄວາມເປັນເອກະພາບ, ເປັນບ່ອນອີງໃນການຈັດຕັ້ງປະຕິບັດໃນຂົງເຂດຂອງຕົນ.
ທີ່ມາ: ປະຊາຊົນ

แชร์