ສື່ມວນຊົນ ຮ່ວມສຳມະນາການປຸກລະດົມບໍລິຈາກເລືອດ

ໃນວັນທີ 1 ຕຸລາ 2023 ນີ້, ສະຖາບັນເລືອດແຫ່ງຊາດ ຈັດສຳມະນາທາງວິຊາການບົດບາດຂອງສື່ມວນຊົນຕໍ່ການປຸກລະດົມບໍລິຈາກເລືອດໂດຍການເປັນປະທານຂອງທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ, ມີຜູ້ຕາງໜ້າຈາກສື່ສິ່ງພິມ, ວິທະຍຸ ແລະໂທລະພາບເຂົ້າຮ່ວມ.

ການສຳມະນາຄັ້ງນີ້ຈັດຂຶ້ນເພື່ອແນໃສ່ໃຫ້ສື່ມວນຊົນເປັນກະບອກສຽງ, ໂຄສະນາຂໍ້ມູນຂ່າວສານທີ່ຖືກຕ້ອງກ່ຽວກັບການບໍລິຈາກເລືອດໃຫ້ສັງຄົມໄດ້ຮັບຮູ້ຢ່າງກວ້າງຂວາງ ເພື່ອໃຫ້ຜູ້ທີ່ມີເງື່ອນໄຂ ກໍຄືຜູ້ທີ່ສຸຂະພາບແຂງແຮງທີ່ບໍ່ເຄີຍບໍລິຈາກເລືອດ ລວມທັງຜູ້ທີ່ເຄີຍບໍລິຈາກເລືອດມາແລ້ວໃຫ້ຫັນມາບໍລິຈາກເລືອດແບບສະໝັກໃຈຢ່າງສະໝໍ່າສະເໝີຕະຫລອດປີເພື່ອຊ່ວຍເຫລືອສັງຄົມ ແລະມີເລືອດແຮໄວ້ຢ່າງພຽງພໍ.

ທ່ານຫົວໜ້າສະຖາບັນເລືອດແຫ່ງຊາດ ໃຫ້ຮູ້ວ່າ: ໃນໄລຍະຜ່ານມາ, ການປຸກລະດົມຂົນຂວາຍບໍລິຈາກເລືອດແມ່ນໄດ້ຮັບການສະໜັບສະໜູນ ແລະເຂົ້າຮ່ວມຈາກທຸກພາກສ່ວນໃນສັງຄົມຢ່າງກວ້າງຂວາງນັບແຕ່ສູນກາງລົງຮອດທ້ອງຖິ່ນ, ຊຶ່ງໃນໄລຍະ 6 ເດືອນຕົ້ນປີ 2023 ນີ້ ສະຖາບັນເລືອດແຫ່ງຊາດ ແລະສູນເລືອດແຂວງໃນຂອບເຂດທົ່ວປະເທດໄດ້ຮ່ວມກັບການຈັດຕັ້ງຂັ້ນຕ່າງໆທີ່ກ່ຽວຂ້ອງປຸກລະດົມ ແລະ ຈັດກິດຈະກຳຮັບບໍລິຈາກເລືອດ ໄດ້ທັງໝົດ 34.614 ຖົງ, ເທົ່າກັບ 47% ຂອງແຜນການປີ, ໃນຂະນະທີ່ໝົດປີ 2023 ນີ້, ສະພາແຫ່ງຊາດມີມະຕິຕົກລົງຮັບຮອງເອົາແຜນການຄາດໝາຍສູ້ຊົນໃນການປຸກລະດົມຮັບບໍລິຈາກເລືອດໃນທົ່ວປະເທດ ໃຫ້ບັນລຸ 73.000 ຖົງ ໃນນີ້ສູນກາງຕ້ອງໃຫ້ບັນລຸ 30.520 ຖົງ ແລະທ້ອງຖິ່ນ ໃຫ້ບັນລຸ 42.480 ຖົງ ໂດຍໄດ້ແບ່ງຕົວເລກໃຫ້ແຕ່ລະແຂວງນໍາໄປຈັດຕັ້ງປະຕິບັດ.

แชร์