ຫລວງນໍ້າທາ ໃຫ້ເອກະຊົນສໍາປະທານຂຸດຄົ້ນ ແລະສ້າງຕັ້ງໂຮງງານຂົບຫີນ ເນື້ອທີ່ 4 ເຮັກຕາ

ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ເມື່ອບໍ່ດົນມານີ້, ໄດ້ມີພິທີເຊັນສັນຍາໂຄງການສຳປະທານຂຸດຄົ້ນ ແລະສ້າງຕັ້ງໂຮງງານຂົບຫີນຢູ່ເຂດບ້ານຫລັງຜາໃໝ່ ເມືອງລອງ ລະຫວ່າງ ພະແນກແຜນການ ແລະການລົງທຶນແຂວງ ກັບ ບໍລິສັດ ວາຍພີ ພັດທະນາກະສິກຳຮອບດ້ານ ຈຳກັດຜູ້ດຽວ.

ໂຄງການດັ່ງກ່າວມີເນື້ອທີ່ສຳປະທານທັງໝົດ 4 ເຮັກຕາ ເຊິ່ງໄດ້ລະບຸລາຍລະອຽດໄວ້ໃນໃບຢັ້ງຢືນເນື້ອທີ່ດິນ (ທີ່ອອກໂດຍພະແນກຊັບພະຍາກອນທຳມະຊາດ ແລະ ສິ່ງແວດລ້ອມ) ແລະສັນຍາສຳປະທານທີ່ດິນທີ່ບໍລິສັດເຊັນກັບພະແນກການເງິນ ມູນຄ່າການລົງທຶນທັງໝົດ 6,3 ກວ່າກີບ, ທຶນຈົດທະບຽນ 2 ຕື້ກີບ, ອາຍຸສຳປະທານ 5 ປີ ນັບແຕ່ມື້ເຊັນສັນຍາສະບັບນີ້ເປັນຕົ້ນໄປ, ພ້ອມນີ້, ຍັງມີເງິນຄໍ້າປະກັນເປັນເງິນສົດ 10.000 ໂດລາສະຫະລັດ.

ນອກຈາກນັ້ນ ບໍລິສັດ ມີຄວາມຍິນດີປະກອບສ່ວນທຶນເຂົ້າໃນການພັດທະນາທ້ອງຖິ່ນເປັນຕົ້ນທຶນຄຸ້ມຄອງສັນຍາໂຄງການ 10 ລ້ານກີບ/ປີ ໂດຍມອບເຂົ້າບັນຊີຂອງພະແນກແຜນການ ແລະການລົງທຶນ,ຊຸກຍູ້,ຕິດຕາມໂຄງການ 10 ລ້ານກີບ/ປີ ໂດຍມອບເຂົ້າບັນຊີພະແນກພະລັງງານ ແລະ ບໍ່ແຮ່ແຂວງ,ທຶນພັດທະນາທ້ອງຖິ່ນ (ເມືອງ) 10 ລ້ານກີບ/ປີ ມອບເຂົ້າບັນຊີເມືອງລອງ, ເງິນຊຸກຍູ້ຕິດຕາມໂຄງການຂັ້ນເມືອງ 5 ລ້ານກີບ/ປີ, ທຶນພັດທະນາບ້ານ 5 ກີບ ເຊິ່ງການມອບເງິນຮ່ວງຕ່າງໆແມ່ນຕ້ອງມອບກ່ອນມື້ເຊັນສັນຍາ ແລະກໍານົດເອົາວັນທີດັ່ງກ່າວຂອງແຕ່ລະປີເປັນມື້ມອບຂອງປີຕໍ່ໆໄປຈົນສີ້ນສຸດສັນຍາ.
ຂ່າວ: ອຸ້ມ ສົມນໍວັນ

แชร์