ກະຊວງການເງິນ ສ້າງຄູຝຶກຄຸ້ມຄອງລາຍຮັບຄ່າທຳນຽມທາງ ແລະພາສີທີ່ດິນ

ໃນວັນທີ 31 ກໍລະກົດ 2023 ນີ້, ກົມສ່ວຍສາອາກອນ, ກະຊວງການເງິນ ໄດ້ເປີດຊຸດຝຶກອົບຮົມການເປັນຄູຝຶກການນໍາໃຊ້ລະບົບຄຸ້ມຄອງການຈັດເກັບລາຍຮັບຄ່າທຳນຽມທາງແບບເອເລັກໂຕຣນິກ(RTMS) ແລະລະບົບຄຸ້ມຄອງເກັບລາຍຮັບພາສີທີ່ດິນແບບເອເລັກໂຕຣນິກ (LTMS).

ຊຸດຝຶກອົບຮົມຄັ້ງນີ້, ນັກສໍາມະນາກອນຈາກກົມເຕັກໂນໂລຊີຂໍ້ມູນຂ່າວສານການເງິນ, ສ່ວຍສາອາກອນປະຈໍາ ນວ, ແຂວງ, ນະຄອນ, ເມືອງ ແລະ ເທດສະບານທົ່ວປະເທດໄດ້ຮຽນຮູ້ເຖິງວິທີການນໍາໃຊ້ລະບົບ RTMS ແລະ LTMS ຢ່າງລະອຽດເປັນແຕ່ລະຂັ້ນຕອນເພື່ອໃຫ້ສາມາດນໍາໄປຈັດຕັ້ງປະຕິບັດເຂົ້າໃນວຽກງານຕົວຈິງໄດ້ຢ່າງຖືກຕ້ອງ ແລະມີຄວາມຄ່ອງແຄ້ວ ທັງສາມາດນໍາເອົາຄວາມຮູ້ໄປເຜີຍແຜ່, ແນະນໍາ ການນໍາໃຊ້ລະບົບດັ່ງກ່າວ ໃຫ້ບັນດາພະນັກງານໃນບ່ອນທີ່ຕົນສັງກັດຢູ່ໃຫ້ແຕ່ລະຄົນໄດ້ມີຄວາມຮູ້ຄວາມສາມາດ, ທັງມີຄວາມເຂົ້າໃຈໃນລະບົບ ແລະຈັດຕັ້ງປະຕິບັດວຽກງານ ໄດ້ຖືກຕ້ອງຕາມລະບຽບກົດໝາຍທີ່ໄດ້ກໍານົດໄວ້ ໂດຍສະເພາະແມ່ນການປະຕິບັດຕາມແຜນພັດທະນາຂະແໜງສ່ວຍສາອາກອນ ໃນໄລຍະ 2021-2025 ຕາມ 5 ເປົ້າໝາຍພັດທະນາຕົ້ນຕໍ ແລະ 17 ແຜນວຽກຈຸດສຸມຍ່ອຍ; ການຝຶກອົບຮົມຍົກລະດັບ, ເສີມຂະຫຍາຍຂີດຄວາມສາມາດ ແລະທັກສະຂອງພະນັກງານສ່ວຍສາອາກອນແມ່ນນອນຢູ່ໃນແຜນພັດທະນາທີ 5 ຂອງການພັດທະນາຂີດຄວາມສາມາດຂອງພະນັກງານ ແລະອົງກອນ.

ໂອກາດດັ່ງກ່າວ, ທ່ານ ສຸພັນ ວິລະວົງ ຮອງຫົວໜ້າກົມສ່ວຍສາອາກອນກະຊວງການເງິນ ໄດ້ມີຄໍາເຫັນໂອ້ລົມຕໍ່ຊຸດຝຶກອົບຮົມໂດຍເນົ້ນໃຫ້ບັນດາຄູຝຶກນໍາໃຊ້ທັງສອງລະບົບນີ້ໃຫ້ພະນັກງານ-ລັດຖະກອນສ່ວຍສາອາກອນ ເພື່ອສ້າງຄູຝຶກໃຫ້ບັນດາແຂວງ ແລະເມືອງໃນຂອບເຂດທົ່ວປະເທດ ໄດ້ມີຄວາມຮູ້ຄວາມສາມາດໃນການຈັດຕັ້ງປະຕິບັດວຽກງານດັ່ງກ່າວ ແລະເຜີຍແຜ່, ແນະນໍາໃຫ້ພະນັກງານດ້ວຍກັນ, ລວມທັງພາກສ່ວນທີ່ກ່ຽວຂ້ອງໄດ້ມີຄວາມຮັບຮູ້ເຂົ້າໃຈໃນການນໍາໃຊ້ສອງລະບົບເພື່ອໃຫ້ຫັນມາເສຍຄ່າທໍານຽມທາງ ແລະພາສີທີ່ດິນໃຫ້ຫລາຍຂຶ້ນເພາະການຫັນເປັນທັນສະໄໝໃນການຈັດເກັບລາຍຮັບເຂົ້າງົບປະມານແຫ່ງລັດກໍເພື່ອໃຫ້ສາມາດຈັດເກັບລາຍຮັບໃຫ້ຄົບຖ້ວນໂປ່ງໄສ, ສາມາດກວດສອບໄດ້.
ແຫລ່ງຂ່າວ: ກະຊວງການເງິນ

แชร์