ປະທານປະເທດ ຢ້ຽມຊົມສະຖານທີ່ທ່ອງທ່ຽວນໍ້າປຽນຢໍລະປາ

ໃນວັນທີ 27 ກໍລະກົດຜ່ານມາ ທ່ານ ທອງລຸນ ສີສຸລິດ ປະທານປະເທດ ໄປຢ້ຽມຊົມສະຖານທີ່ທ່ອງທ່ຽວນໍ້າປຽນຢໍລະປາເຊິ່ງຕັ້ງຢູ່ບ້ານຊຽງແລທ່າ ເມືອງປາກງື່ມ ນະຄອນຫຼວງວຽງຈັນ ໂດຍເປັນກຽດຕ້ອນຮັບຂອງທ່ານ ສົມເພັດ ມ້າວປະເສີດ ປະທານສະຖານທີ່ທ່ອງທ່ຽວນໍ້າປຽນຢໍລະປາ.

ໃນໂອກາດນີ້ທ່ານ ສົມເພັດ ມ້າວປະເສີດ ໄດ້ລາຍງານໃຫ້ຮູ້ວ່າ: ສະຖານທີ່ທ່ອງທ່ຽວແຫ່ງນີ້ໄດ້ເລີ່ມພັດທະນາມາແຕ່ຕົ້ນປີ 2019 ໂດຍເອົາຮູບແບບການພັດທະນາມາຈາກສະຖານທີ່ທ່ອງທ່ຽວນໍ້າກັດຢໍລະປາ ແຂວງອຸດົມໄຊ ໄດ້ແບ່ງການພັດທະນາເປັນ 3 ໄລຍະ ໃນນີ້ ໄລຍະທໍາອິດໄດ້ພັດທະນາການທ່ອງທ່ຽວໄດ້ສໍາເລັດໂດຍພື້ນຖານ ປະ ກອບມີ 8 ລາຍການ ຄື: ສວນນໍ້າ ຂົວອູ່ ຈຸດຖ່າຍຮູບວິວຕ່າງໆ, ໄຕ່ຂົວອູ່ເທິງປາຍໄມ້ 25 ຂົວ, ຂີ່ໂລເລີ້, ຂີ່ສະລິງ ໂດຍຜ່ານການໄຕ່ຕາໜ່າງຂົວອູ່ ຊົມນໍ້າຕົກ, ໄປຢືນຖ່າຍຮູບໂດຍຜ່ານຕາໜ່າງຂົວອູ່ ນໍ້າຕົກ, ຂີ່ຕາໜ່າງແມງມຸມ, ຂີ່ລຸກເຊິ່ງເປັນລົດນ້ອຍທ່ຽວຊົມທຳມະຊາດ ແລະຂີ່ລົດເອທີວີ.

ນອກຈາກນີ້ຍັງລາຍງານກ່ຽວກັບແຜນການ ແລະກິດຈະກຳຕ່າງໆ ພ້ອມສືບຕໍ່ສ້າງກິດຈະກຳໃຫມ່ໆຂຶ້ນເພື່ອດຶງດູດນັກທ່ອງທ່ຽວພາຍໃນ ແລະຕ່າງປະເທດເພື່ອສ້າງສີສັນການທ່ອງທ່ຽວມີບັນຍາກາດຄຶກຄື້ນໂດຍສະເພາະການທ່ອງທ່ຽວນະຄອນຫລວງ ປະຈຸບັນນັບແຕ່ເປີດບໍລິການຖືວ່າໄດ້ຮັບຜົນຕອບຮັບເປັນຢ່າງດີສ່ວນແຜນໃນຕໍ່ໜ້າຈະພັດທະນາໃຫ້ມີຣີສອດ ບ້ານຊົນເຜົ່າ ແລະສວນພຶກສາສາດ.

แชร์