ຄໍາມ່ວນ-ນະຄອນພະນົມ ຂີ່ລົດຖີບເພື່ອສຸຂະພາບສົ່ງເສີມການທ່ອງທ່ຽວສອງຝັ່ງແມ່ນໍ້າຂອງ

ກິດຈະກຳຂີ່ລົດຖີບເພື່ອສຸຂະພາບ ສົ່ງເສີມການທ່ອງທ່ຽວສອງຝັ່ງແມ່ນໍ້າຂອງ ລະຫວ່າງ ແຂວງຄຳມ່ວນ ສປປ ລາວ ແລະຈັງຫວັດນະຄອນພະນົມ ຣາຊະອານາຈັກໄທ ໄດ້ຈັດຂຶ້ນໃນວັນທີ 29 ກໍລະກົດ 2023 ທີ່ແຂວງຄໍາມ່ວນ ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ທ່ານ ວັນໄຊ ຈັນພອນ ຜູ້ວ່າການຈັງຫວັດນະ ຄອນພະນົມ ພ້ອມດ້ວຍບັນດາທ່ານຄະນະການນຳແຂວງບັນດາຜູ້ປະກອບການ-ທຸລະກິດ ແລະນັກກີລາ ຕະຫຼອດຮອດພໍ່ແມ່ປະຊາຊົນສອງຝັ່ງຂອງເຂົ້າຮ່ວມ 300 ກວ່າຄົນ.

ກິດຈະກຳຂີ່ລົດຖີບດັ່ງກ່າວຈຸດປ່ອຍແມ່ນເລີ່ມຈາກຂົວມິດຕະພາບ 3 ອອກສູ່ທາງເລກທີ 13 ໃຕ້ ຫາ 3 ແຍກເຂົ້າບ້ານນາເມືອງ ແລ້ວສືບຕໍ່ເຄື່ອນໄຫວເຂົ້າສູ່ເທສະບານເມືອງທ່າແຂກ ແລະແວ່ສັກກະລະບູຊາ ຫໍຫຼັກເມືອງ (ພະຍານາກ) ທີ່ວັດນາໂບສີພັດທະນາຣາມ ຈາກນັ້ນກໍມຸ່ງໜ້າລົງສູ່ວັດພຣະທາດສີໂຄດຕະບອງ ເພື່ອກາບໄຫວ້ສັກກະລະບູຊາ ອົງພະທາດສີໂຄດຕະບອງ ເຊິ່ງເປັນສະຖານທີ່ທ່ອງທ່ຽວທາງດ້ານວັດທະນະທໍາອັນມີຊື່ສຽງຂອງລາວໂດຍສະເພາະກໍຄືຊາວແຂວງຄໍາມ່ວນ ຫຼັງຈາກນັ້ນ ກໍກັບຄືນສູ່ຈຸດເລີ່ມຕົ້ນທີ່ຂົວມິດຕະພາບ 3 ໂດຍຜ່ານເສັ້ນທາງວົງວຽນຫຼັກ 2 ເທສະບານ ແຂວງຄໍາມ່ວນ ລວມໄລຍະທາງໄປ-ກັບ ປະມານ 50 ກວ່າກິໂລແມັດ.

ໃນໂອກາດນີ້ທ່ານ ວັນໄຊ ພອງສະຫວັນ ຍັງໄດ້ໃຫ້ສໍາພາດກ່ຽວກັບຈຸດປະສົງຂອງການຈັດກິດຈະກຳຄັ້ງນີ້ວ່າ: ການຈັດກິດຈະກຳຂີ່ລົດຖີບ ເພື່ອສຸຂະພາບ ແລະສົ່ງເສີມການທ່ອງທ່ຽວສອງຝັ່ງແມ່ນໍ້າຂອງ (ຄຳມ່ວນ-ນະຄອນພະນົມ) ເປັນການສ້າງໂອກາດ ແລະ ເງື່ອນໄຂທີ່ດີໃນການໂຄສະນາປະຊາສຳພັນສົ່ງເສີມ ແລະ ດຶງດູດການທ່ອງທ່ຽວທັງເປັນການອອກຳລັງກາຍເພື່ອເສີມສ້າງສຸຂະພາບທີ່ສໍາຄັນແມ່ນເປັນການສ້າງຄວາມສໍາພັນມິດຕະພາບທີ່ດີຂອງສອງຊາດ ລາວ-ໄທ ເວົ້າລວມ ເວົ້າສະເພາະແຂວງຄຳມ່ວນ ແລະຈັງຫວັດນະຄອນພະນົມໃຫ້ມີຄວາມແໜ້ນແຟ້ນຂື້ນຕື່ມ.

แชร์