ຫຼວງພະບາງ ຈັດສອບເສັງຊີງທຶນຮຽນຕໍ່ຢູ່ຕ່າງປະເທດ

ໃນອາທິດຜ່ານມາ, ພະແນກສຶກສາທິການ ແລະກິລາແຂວງຫຼວງພະບາງ ໄດ້ຈັດການສອບເສັງຄັດເລືອກເອົາທຶນການສຶກສາຮຽນຕໍ່ທີ່ ສສ ຫວຽດນາມ ແລະ ສປ ຈີນ ປະຈຳສົກຮຽນ 2023-2024.

ທ່ານ ສົມພອນ ດີລີວົງ ຮັກສາການຫົວໜ້າຂະແໜງອາຊີວະ ແລະ ການສຶກສາຊັ້ນສູງພະແນກສຶກສາທິການ ແລະ ກິລາແຂວງລາຍງານວ່າ: ການສອບເສັງຄັ້ງນີ້ມີຜູ້ເຂົ້າມາສະໝັກທັງໝົດ 250 ຄົນ,ຍິງ 116 ຄົນ, ໃນນີ້ສະໝັກເສັງເອົາທຶນຂອງ ສປ ຈີນ ຈໍານວນ 198 ຄົນ ກວມເອົາ 79,2% ແລະເສັງເອົາທຶນ ສສ ຫວຽດນາມ ຈຳນວນ 52 ຄົນ, ກວມ 20,8%.

ໃນສົກຮຽນ 2023-2024 ພະແນກສຶກສາທິການ ແລະກິລາແຂວງໄດ້ຮັບທຶນການສຶກສາຈາກ ສສ ຫວຽດນາມ ທັງໝົດ 106 ທຶນ ແລະ ສປ ຈີນ 128 ທຶນ, ລວມທຶນທີ່ໄດ້ຮັບທັງໝົດ 234 ທຶນ, ຊັ້ນກາງ 40 ທຶນ, ຊັ້ນສູງ 121 ທຶນ, ປະລິນຍາຕີ 63 ທຶນ, ເຊື່ອມຕໍ່ປະລິນຍາຕີ 6 ທຶນ, ປະລິນຍາໂທ 4 ທຶນ, ໃນນັ້ນທຶນໃນແຜນ 100% ຈຳນວນ 182 ທຶນ ແລະທຶນ 50% ຈຳນວນ 52 ທຶນ, ສຳລັບການສອບເສັງແມ່ນກຳນົດເອົາ 3 ວິຊາຄື: ພາສາລາວ-ວັນນະຄະດີ, ຄະນິດສາດ ແລະ ວິທະຍາສາດທຳມະຊາດ.

ໂດຍ: ສອນອາຄົມ ແກ້ວຄຳເພັດ ສກຂ ຫຼວງພະບາງ

แชร์