ອົງຄະນະພັກ ທຫລ ດຳເນີນກອງປະຊຸມກວດກາ

   ອົງຄະນະພັກທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງການດຳເນີນກອງປະຊຸມວຽກງານກວດກາ ທຫລ ປະຈຳປີ 2018 ໃນລະຫວ່າງວັນທີ 8-9 ເມສາ 2019 ທີ່ສະຖາບັນການທະນາຄານພາຍໃຕ້ການເປັນປະທານຂອງສະຫາຍ ສອນໄຊ ສິດພະໄຊ ກໍາມະການສຳຮອງສູນກາງພັກ, ເລຂາຄະນະພັກ, ຜູ້ວ່າການ ທຫລ; ພ້ອມນີ້, ຍັງມີການເຂົ້າຮ່ວມຂອງສະຫາຍ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ ແລະອົງການກວດກາລັດຖະ ບານ; ມີບັນດາສະຫາຍຄະນະປະຈຳພັກ, ຄະນະພັກ, ເລຂາໜ່ວຍພັກ, ຜູ້ກວດກາໜ່ວຍພັກ, ເລຂາຄະນະພັກຮາກຖານ, ປະທານກວດກາຄະນະພັກຮາກ ຖານ, ບັນດາສາຂາ ທຫລ ປະຈໍາແຕ່ລະພາກ ແລະສາຂາທະນາຄານທຸລະກິດລັດໃນທົ່ວປະເທດ.

  ໃນກອງປະຊຸມ; ສະຫາຍ ໜໍ່ແກ້ວ ມຸນິວົງ ຄະນະພັກ, ຮອງປະທານຄະນະກວດກາພັກ ທຫລ  ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານກວດກາ ທຫລ ປະຈຳປີ 2018 ໂດຍໄດ້ສະຫຼຸບຕີລາຄາການເຄື່ອນໄຫວວຽກງານກວດກາພັກ-ລັດຢ່າງຮອບດ້ານຊຶ່ງມີທັງດ້ານດີທີ່ຄວນເສີມຂະຫຍາຍກ່ຽວກັບການຊີ້ນຳ-ນຳ ພາຂອງຄະນະກວດກາພັກ ທຫລ ແລະ ຄະນະກວດກາແຕ່ລະຂັ້ນຕໍ່ກັບວຽກງານການຕິດຕາມກວດກາ; ພ້ອມນັ້ນ, ຍັງຍົກໃຫ້ເຫັນດ້ານອ່ອນ-ຂໍ້ຄົງຄ້າງທີ່ຮີບຮ້ອນເອົາໃຈໃສ່ປັບປຸງແກ້ໄຂໃຫ້ມີການຫັນປ່ຽນທີ່ຕັ້ງໜ້າເປັນຕົ້ນການຕິດຕາມກວດກາກ່ຽວກັບການຈັດຕັ້ງປະຕິບັດພາລະບົດບາດ, ສິດ ແລະໜ້າທີ່, ບັນດາມະຕິ,ຄຳສັ່ງ,ຂໍ້ກຳນົດ,ກົດລະບຽບຂອງພັກ,ກົດໝາຍຂອງລັດ ແລະຄວາມເປັນແບບຢ່າງນໍາໜ້າຂອງບຸກຄົນສະມາຊິກພັກທີ່ຂຶ້ນກັບອົງຄະນະພັກ ທຫລ ເພື່ອເປັນການສະກັດກັ້ນ ແລະ ຕີຖອຍປະກົດການຫຍໍ້ທໍ້ທີ່ອາດຈະເກີດຂຶ້ນ; ສະເພາະໃນປີ 2018 ມີປະກົດການຫຍໍ້ທໍ້ເກີດຂຶ້ນໃນຂະແໜງການທະນາຄານ ແລະສ້າງຄວາມເສຍຫາຍເປັນເງິນ 3,8 ຕື້ກີບ; 65,09 ພັນບາດ ແລະ 3,63 ແສນໂດລາສະຫະລັດ; ໃນນີ້ເປັນການສວຍໃຊ້ໜ້າທີ່ຫາຜົນປະ ໂຫຍດສ່ວນຕົວໂດຍການລັກຖອນເງິນໃນບັນຊີຂອງລູກຄ້າ, ຮັບເງິນຈາກລູກຄ້າມາແລ້ວບໍ່ມອບເຂົ້າບັນຊີ, ລັກເງິນໃນຄັງໄປໃຊ້ຈ່າຍສ່ວນຕົວ, ຮຽກຮ້ອງຜົນປະໂຫຍດຈາກລູກຄ້າ ແລະການປອມແປງເອກະສານເພື່ອໂອນເງິນທາງບັນຊີ.

  ຕໍ່ກັບບັນຫາດັ່ງກ່າວ; ຄະນະພັກ-ຄະນະນໍາແຕ່ລະຂັ້ນໄດ້ເອົາໃຈໃສ່ຢ່າງຕັ້ງໜ້າໃນການແກ້ໄຂປະກົດການຫຍໍ້ທໍ້ທີ່ເກີດຂຶ້ນໂດຍໄດ້ມີມາດຕະການ, ວິທີການ ແກ້ໄຂທີ່ເໝາະສົມ ແລະ ທັນສະພາບການ; ປະຈຸບັນອົງຄະນະພັກ ທຫລ ພວມສຸມໃສ່ຈັດຕັ້ງປະຕິບັດການດໍາເນີນຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2018 ເພື່ອເປັນການຢັ້ງຢຶນເຖິງການຊີ້ນຳ-ນຳພາຈັດຕັ້ງປະຕິບັດໜ້າທີ່ວຽກງານຂອງບັນດາຮາກຖານພັກ-ສະມາຊິກພັກທີ່ຢູ່ພາຍໃຕ້ຄວາມຮັບຜິດຊອບຂອງຕົນ. ກອງປະຊຸມຍັງໄດ້ຮັບຟັງການເຜີຍແຜ່ເອກະສານສໍາຄັນຈຳນວນໜຶ່ງຕື່ມອີກ.

ຂ່າວ: ຣັດສະໝີ ດວງສັດຈະ     

แชร์