JDB ສະເຫຼີມສະຫຼອງໜ່ວຍບໍລິການປາກເຊຄົບຮອບ 10 ປີ ພ້ອມເປີດໃຊ້ອາຄານຫຼັງໃໝ່ຢ່າງເປັນທາງການ

ໃນວັນທີ 21 ກໍລະກົດ 2023 ທີ່ໂຮງແຮມຈໍາປາສັກແກຼນ ນະຄອນປາກເຊ ແຂວງຈຳປາສັກ ໄດ້ມີພິທີສະເຫຼີມສະຫຼອງທະນາຄານຮ່ວມພັດທະນາໜ່ວຍບໍລິການປາກເຊ ຄົບຮອບ 10 ປີ ແລະພິທີເປີດນໍາໃຊ້ອາຄານຫຼັງໃໝ່ຢ່າງເປັນທາງການ, ເປັນກຽດເຂົ້າຮ່ວມໃນພິທີຄັ້ງນີ້ໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ທ່ານນາງ ສີພະຈັນ ເຂັມມະວົງ ຮອງຫົວໜ້າສາຂາ ທະນາຄານແຫ່ງ ສປປ ລາວ ພາກໃຕ້, ມີທ່ານ ເອກະພັນ ພະພິທັກ ປະທານຜູ້ຖືຮຸ້ນ ທະນາຄານຮ່ວມພັດທະນາ, ທ່ານ ວິໄລ ສີພະພອນ ປະທານສະພາບໍລິຫານທະນາຄານຮ່ວມພັດທະນາ, ທ່ານ ສາຄອນ ຍໍພັນໄຊ ຜູ້ອໍານວຍການໃຫຍ່ທະນາຄານຮ່ວມພັດທະນາ, ມີຜູ້ບໍລິຫານລະດັບສູງຂອງທະນາຄານຮ່ວມພັດທະນາ, ແຂກທີ່ຖືກເຊີນຕະຫຼອດຮອດພະນັກງານວິຊາການທີ່ກ່ຽວຂ້ອງກໍ່ໄດ້ເຂົ້າຮ່ວມຢ່າງພ້ອມພຽງ.

ໃນພິທີເລີ່ມຕົ້ນດ້ວຍການມີຄໍາເຫັນຂອງທ່ານ ສາຄອນ ຍໍພັນໄຊ ຜູ້ອໍານວຍການໃຫຍ່ ທະນາຄານຮ່ວມພັດທະນາ, ທ່ານໄດ້ສະແດງຄວາມຮູ້ສຶກພາກພູມໃຈ ແລະ ສະແດງຄວາມຕ້ອນຮັບບັນດາແຂກທີ່ໄດ້ເຂົ້າຮ່ວມສະຫຼອງໜ່ວຍບໍລິການປາກເຊ ຄົບຮອບ 10 ປີ ແລະເປີດນໍາໃຊ້ອາຄານຫຼັງໃໝ່ຢ່າງເປັນທາງການ, ເພື່ອຕອບສະໜອງຄວາມຮຽກຮ້ອງຕ້ອງການຂອງລູກຄ້າໃນການບໍລິການທາງດ້ານການເງິນທີ່ທັນສະໄໝແບບຄົບວົງຈອນເພີ່ມທາງເລືອກໃໝ່ໃຫ້ກັບລູກຄ້າຢູ່ພາຍໃນນະຄອນປາກເຊ,ໂດຍສະເພາະລູກຄ້າພາຍໃນແຂວງຈໍາປາສັກໃຫ້ມີຄວາມສະດວກສະບາຍ, ສາມາດເລືອກໃຊ້ຜະລິດຕະພັນທີ່ທັນສະໄໝຂອງທະນາຄານຮ່ວມພັດທະນາ ຕຶກອາຄານດັ່ງກ່າວແມ່ນຕັ້ງຢູ່ ບ້ານໂພນສະຫວັນ ນະຄອນປາກເຊ ແຂວງຈໍາປາສັກ.

ຈາກນັ້ນໃນພິທີດັ່ງກ່າວໄດ້ຮັບຟັງຄໍາເຫັນຂອງທ່ານນາງ ສີພະຈັນ ເຂັມມະວົງ ຮອງຫົວໜ້າສາຂາ ທະນາຄານແຫ່ງ ສປປ ລາວ ພາກໃຕ້ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມຕໍ່ການດໍາເນີນທຸລະກິດຂອງທະນາຄານຮ່ວມພັດທະນາທີ່ມີສ່ວນຮ່ວມໃນການພັດທະນາເສດເສດຖະກິດ-ສັງຄົມ, ເວົ້າສະເພາະກໍຄື ແຂວງຈໍາປາສັກ, ເຖີງວ່າໃນປີ 2022 ທີ່ຜ່ານມາໂດຍລວມແລ້ວສະພາບຢູ່ພາກພື້ນ-ສາກົນ ກໍຄືປະເທດຂອງພວກເຮົາໄດ້ປະເຊີນກັບຄວາມຫຍຸ້ງຍາກ ແລະ ສິ່ງທ້າທາຍນາໆປະການ ໂດຍສະເພາະຍັງສືບຕໍ່ໄດ້ຮັບຜົນກະທົບຈາກການແຜ່ລະບາດ ຂອງພະຍາດໂຄວິດ-19 ແລະຄວາມຫຍຸ້ງຍາກທາງດ້ານການເງິນທີ່ໜັກໜ່ວງເຊັ່ນ: ໄພເງິນເຟີ້, ເງິນກີບອ່ອນຄ່າ, ສະຖຽນລະພາບຂອງເສດຖະກິດມີຄວາມບອບບາງ, ເຖີງແນວໃດກໍຕາມ ຍ້ອນຄວາມເອົາໃຈໃສ່ ຊີ້ນໍາ-ນຳພາຢ່າງໃກ້ຊິດຂອງພັກ ແລະ ລັດຖະບານໄດ້ມີຄວາມພະຍາຍາມແກ້ໄຂຜົນກະທົບຕໍ່ເສດຖະກິດ ໂດຍສືບຕໍ່ຄຸ້ມຄອງບໍລິຫານລັດຢ່າງຮັດກຸມ, ສືບຕໍ່ປັບປຸງກົນໄກຄຸ້ມຄອງເສດຖະກິດ, ກຳນົດ ແລະ ຈັດຕັ້ງນະໂຍບາຍຕ່າງໆ ເພື່ອຫຼຸດຜ່ອນຜົນກະທົບແກ່ຜູ້ໃຊ້ແຮງານທຸລະກິດ ແລະປະຊາຊົນຮັບປະກັນເພື່ອເຮັດໃຫ້ເສດຖະກິດສາມາດສືບຕໍ່ເຕີບໂຕໄດ້.

ປະຈຸບັນທະນາຄານຮ່ວມພັດທະນາໄດ້ພັດທະນາອົງກອນ ແລະຜະລິດຕະພັນທາງການເງິນໃໝ່ຢ່າງສະໝໍ່າສະເໝີ, ປະສານກັບເຕັກໂນໂລຊີ ແລະຜະລິດຕະພັນອີເລັກໂຕຼນິກທີ່ທັນສະໄໝເພື່ອຮອງຮັບການບໍລິການລູກຄ້າໃນຍຸກ Digital ເປັນຕົ້ນ: ແອັບ JDB Yes Mobile Banking ທຸລະກໍາທາງການເງິນໃນມືຖືເປັນໜື່ງໃນບໍລິການທີ່ໂດດເດັ່ນຊ່ວຍຕອບສະໜອງການເຮັດທຸລະກໍາທາງດ້ານການເງິນ ແລະທຸລະກິດຂອງລູກຄ້າສະດວກສະບາຍ, ສາມາດບໍລິການທັງພາຍໃນ ແລະ ຕ່າງປະເທດວ່ອງໄວທັນສະໄໝ ແລະມີຄວາມປອດໄພສູງ.

ເພື່ອບັນລຸເປົ້າໜາຍທີ່ວາງໄວ້ທະນາຄານຮ່ວມພັດທະນາ ຫຼືJDB ໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງໂດຍໄປຕາມຄໍາຂວັນຂອງທະນາຄານຮ່ວມພັດທະນາ “ເຕີບໃຫຍ່ໄປພ້ອມກັນ”

แชร์