ຄະນະຜູ້ແທນ ສສ ຫວຽດນາມ ເຂົ້າວາງພວງມາລາ ທີ່ຫໍສີລາຈາລຶກນັກຮົບປະສົມລາວ-ຫວຽດນາມ

ເນື່ອງໃນໂອກາດວັນນັກຮົບຜູ້ເສຍອົງຄະ ແລະເສຍສະຫລະຊີວິດເພື່ອຊາດຂອງ ສສ ຫວຽດນາມ ຄົບຮອບ 76 ປີ (27 ກໍລະກົດ 1947–27 ກໍລະກົດ 2023).

ໃນວັນທີ 26 ກໍລະກົດ 2023 ຄະນະຜູ້ແທນຫວຽດນາມນໍາໂດຍ ສະຫາຍ ເລຍໍແທ້ງ ຮອງເລຂາຄະນະພັກ, ທີ່ປຶກສາທູດ, ສະຖານທູດ ສສ ຫວຽດນາມ ປະຈໍາ ສປປ ລາວ ໄດ້ນໍາພາຄະນະຜູ້ແທນຫວຽດນາມ, ສະມາຄົມໃຫຍ່ຊາວຫວຽດນາມ, ສະມາຄົມຫວຽດນາມທີ່ດໍາລົງຊີວິດຢູ່ ສປປ ລາວ, ເຂົ້າວາງພວງມາລາ, ກະຕ່າໝາກໄມ້ ແລະຈູດທູບທຽນກາບໄຫວ້ເຖິງດວງວິນຍານຂອງເຫຼົ່ານັກຮົບປະຕິວັດຫວຽດນາມທີ່ໄດ້ເສຍສະຫລະຊີວິດເພື່ອພາລະກິດປະຕິວັດປົດປ່ອຍຊາດຂອງ 2 ຊາດ ລາວ-ຫວຽດນາມ ຢູ່ຫໍສີລາຈາລຶກວິລະບູລຸດນັກຮົບປະສົມລາວ-ຫວຽດນາມ ຢູ່ບ້ານໂພນແຮ່ ເມືອງທຸລະຄົມ ແຂວງວຽງຈັນ.

ຊຶ່ງໃຫ້ກຽດຕ້ອນຮັບຄະນະຜູ້ແທນຫວຽດນາມໂດຍສະຫາຍ ນາງ ວົງເດືອນ ວັດຕະໂສ ກໍາມະການພັກແຂວງ, ເລຂາພັກເມືອງ, ເຈົ້າເມືອງທຸລະຄົມ, ມີສະຫາຍ ພັອ ບຸນຍົງ ວົງສີຈັນ ປະທານສະຫະພັນນັກຮົບເກົ່າແຂວງວຽງຈັນ, ມີຄະນະພັກ, ຄະນະນໍາເມືອງທຸລະຄົມ ແລະພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ສະຫາຍ ເລຍໍແທ້ງ ຮອງເລຂາຄະນະພັກ, ທີ່ປຶກສາທູດ ສະຖານທູດ ສສ ຫວຽດນາມ ປະຈໍາ ສປປ ລາວ ແລະສະຫາຍ ພັນຕີ ກິ່ງຄໍາ ສຸວັນທອງ ປະທານສະຫະພັນນັກຮົບເກົ່າເມືອງທຸລະຄົມ ໄດ້ຜັດປ່ຽນກັນມີຄໍາເຫັນ ໂດຍໄດ້ຍົກໃຫ້ເຫັນສະພາບລວມຂອງການພົວພັນຮ່ວມມືຮອບດ້ານ ແລະຂະບວນການຮ່ວມສໍາພັນສູ້ຮົບຕໍ່ສູ້ກູ້ຊາດຂອງສອງຊາດລາວ-ຫວຽດນາມ, ຫວຽດນາມ-ລາວ ໃນເມື່ອກ່ອນ ໂດຍສັງເຂບ, ການລິເລີ່ມຊອກຄົ້ນຫາອັດທິທະຫານ ແລະການກໍ່ສ້າງເຂດອານຸສອນສະຖານແຫ່ງນີ້, ພິເສດໄດ້ຍົກໃຫ້ເຫັນບັ້ນສູ້ຮົບຕີສັດຕູຢູ່ຄ້າຍທະຫານພວກຈັກກະພັດຕ່າງດ້າວຢູ່ບ້ານໂພນແຮ່ ແລະ ນໍ້າພະນາຍ ໃນລະຫວ່າງປີ 1945-1946 ແມ່ນມີຄວາມດຸເດືອດຂ້ຽວຂາດນອງເລືອດ ແລະມີທະຫານປະສົມລາວ-ຫວຽດນາມ ລວມທັງສັດຕູໄດ້ເສຍຊີວິດເປັນຈໍານວນຫລວງຫລາຍ.

ໃນພິທີຄະນະຜູ້ແທນທັງສອງຝ່າຍໄດ້ເຂົ້າວາງພວງມາລາ, ຈູດທູບທຽນບູຊາຕາມລໍາດັບເພື່ອສະແດງຄວາມຮູ້ບຸນຄຸນ ແລະ ຈາລຶກຄຸນງາມຄວາມດີຂອງເຫຼົ່ານັກຮົບປະຕິວັດທີ່ໄດ້ອຸທິດຊີວິດເລືອດເນື້ອເພື່ອຊາດ, ເພື່ອປະຊາຊົນ, ພ້ອມກັນນີ້ຄະນະຜູ້ແທນຝ່າຍຫວຽດນາມຍັງໄດ້ມອບເງິນໃຫ້ປະທານສະຫະພັນນັກຮົບເກົ່າເມືອງທຸລະຄົມເພື່ອນໍາໃຊ້ເຂົ້າໃນການບູລະນະຄຸ້ມຄອງ ແລະບໍລິຫານວຽກງານພາຍໃນຫໍສີລາຈາລຶກອີກດ້ວຍ.
ທີ່ມາ: ເມືອງທຸລະຄົມ.

แชร์