ໂຮງຫມໍເມືອງໂພນໂຮງ ສາມາດປີ່ນປົວຄົນເຈັບທີ່ຖືກງູກັດໄດ້

​ໂຮງໝໍເມືອງໂພນໂຮງ ແຂວງວຽງຈັນ ໄດ້ຮັບການສະໜອງ ເຊລອມແກ້ພິດງູ ( Antivenin )ຈາກໂຄງການ TICA ຈຳນວນ 446 ຫຼອດ ແລະມີແຜນຈະສະໜອງໃຫ້ຕື່ມຖ້ານຳໃຊ້ໝົດ. ຊຶ່ງປະຈຸບັນຢູ່ໂຮງໝໍດັ່ງກ່າວປະກອບມີ ເຊລອມແກ້ພິດງູ ເພົາກະບາ, ງູຂຽວ, ງູກ່ານປ້ອງ, ງູຄໍແດງ, ງູສາມລ່ຽມ ແລະງູເຫົ່າ, ງູຈົງອາງ.

ໂດຍໃນວັນທີ 24 ກໍລະກົດ 2023 ທີ່ໂຮງໝໍເມືອງໂພນໂຮງໄດ້ຮັບການຝືກອົບຮົມປີ່ນປົວຄົນເຈັບທີ່ຖືກງູກັດໂດຍການໃຊ້ເຊລອມຕ້ານພິດງູໃຫ້ທ່ານໝໍ ແລະພະຍາບານ ​ເພື່ອກະກຽມຄວາມພ້ອມໃນການປີ່ນປົວຄົນເຈັບງູກັດ ແລະຈະສ້າງເປັນສູນປີ່ນປົວຄົນເຈັບງູກັດຂອງແຂວງວຽງຈັນໃນອະນາຄົດ.

ດຣ ເພັດນຸລາດ ພັນນະວົງ ຮອງຜູ້ອຳນວຍການໂຮງໝໍແຂວງວຽງຈັນ ໃຫ້ຮູ້ວ່າ: ອີງຕາມພື້ນທີ່ພູມສັນຖານຂອງແຂວງວຽງຈັນ ແລະຈາກສະຖິຕິໂຕຈິງຂອງຄົນເຈັບທີ່ຖືກງູກັດມາປີ່ນປົວຢູ່ໂຮງໝໍແຂວງໃນໄລຍະ 10 ປີຜ່ານມາ ພົບວ່າຖືກງູເພົາກະບາກັດພົບຫຼາຍເປັນອັນດັບໜຶ່ງຮອງລົງມາແມ່ນງູຂຽວ, ງູເຫົ່າ, ງູຈົງອາງ, ງູກ່ານປ້ອງ, ງູສາມລ່ຽມ, ງູຄໍແດງຕາມລຳດັບຊຶ່ງເຊລອມທີ່ມີກຽມພ້ອມຢູ່ໂຮງໝໍເມືອງໂພນໂຮງແມ່ນຄວບຄຸມຊະນິດງູທີ່ມີຢູ່ພາຍໃນແຂວງວຽງຈັນຂອງພວກເຮົາໄດ້".
​
ທີ່ມາ: ພະແນກສາທາລະນະສຸກແຂວງວຽງຈັນ

• 26/07/2023