ຈຳປາສັກ ມີຍອດເຫລືອງົບປະມານຮອດທ້າຍງວດທີ 2 ຈໍານວນ 193,15 ຕື້ກີບ

ໃນໂອກາດທີ່ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານການເງິນຮອບດ້ານ ຢູ່ແຂວງຈຳປາສັກ ເມື່ອວັນທີ 24 ກໍລະກົດຜ່ານມາທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນແຂວງໄດ້ລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2023, ທີ່ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະວາລະຂອງແຂວງອັນພົ້ນເດັ່ນເຫັນໄດ້ວ່າມີຍອດເຫລືອງົບປະມານຮອດທ້າຍງວດທີ 2 ຈໍານວນ 193,15 ຕື້ກີບ, ສາມາດຈັດຕັ້ງປະຕິບັດການຈັດເກັບລາຍຮັບໄດ້ທັງໝົດ 1.162,25 ຕື້ກີບ ທຽບໃສ່ຂອງແຜນການປີເທົ່າກັບ 60,42% ແລະທຽບໃສ່ໄລຍະດຽວປີກ່ອນເພີ່ມຂຶ້ນ 45,84% ໃນນັ້ນ ລາຍຮັບບ້ວງສູນກາງປະຕິບັດໄດ້ 631,39 ຕື້ກີບ, ລາຍຮັບປົກກະຕິໄດ້ 631,34 ຕື້ກີບ, ລາຍຮັບທ້ອງຖິ່ນໄດ້ 530,86 ຕື້ກີບ. ສ່ວນລາຍຈ່າຍ ປະຕິບັດໄດ້ 337,71 ຕື້ກີບ ທຽບໃສ່ແຜນການປີເທົ່າກັບ 45,05%, ດຸ່ນດ່ຽງງົບປະມານບ້ວງທ້ອງຖີ່ນມີຍອດເຫລືອງົບປະມານ 193,15 ຕື້ກີບ.

ສຳລັບວຽກຈຸດສຸມ ແລະມາດຕະການຈັດຕັ້ງປະຕິບັດໃນ 6 ເດືອນທ້າຍປີ 2023 ແມ່ນສືບຕໍ່ສຸມໃສ່ການຈັດຕັ້ງປະຕິບັດວາລະແຫ່ງຊາດ, ວາລະຂອງແຂວງວ່າດ້ວຍການແກ້ໄຂບັນຫາທາງດ້ານເສດຖະກິດ-ການເງິນ ໂດຍສະເພາະ ຄໍາສັ່ງຂອງນາຍົກລັດຖະມົນຕີສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະຕ້ານການຮົ່ວໄຫລຂອງລາຍຮັບງົບປະມານໃຫ້ປະກົດຜົນເປັນຈິງ ແລະສູ້ຊົນຈັດຕັ້ງປະຕິບັດລາຍຮັບງົບປະມານໃຫ້ບັນລຸຕາມແຜນການ ຫລືເກີນແຜນທີ່ວາງໄວ້.

แชร์