ໂຮງຮຽນ 30 ແຫ່ງ ຢູ່ອຸດົມໄຊ ໄດ້ຮັບການປັບປຸງດ້ານສຸຂະນາໄມ

ພິທີລົງນາມເຊັນບົດບັນທຶກຄວາມເຂົ້າໃຈກ່ຽວກັບການຈັດຕັ້ງປະຕິບັດໂຄງການປັບປຸງດ້ານສຸຂະນາໄມໃນໂຮງຮຽນ 30 ແຫ່ງຢູ່ ໃນເມືອງຫລາ ແລະເມືອງນາໝໍ້ ແຂວງອຸດົມໄຊ ໃນນັ້ນ ມີໂຮງຮຽນປະຖົມ 24 ແຫ່ງ ແລະໂຮງຮຽນມັດທະຍົມຕອນຕົ້ນ 6 ແຫ່ງ, ໄດ້ຈັດຂຶ້ນເມື່ອບໍ່ດົນມານີ້, ຕາງໜ້າລົງນາມໂດຍທ່ານ ສົມສັກ ສຸພິໄລ ຫົວໜ້າພະແນກສຶກສາທິການ ແລະກິລາແຂວງອຸດົມໄຊ ແລະທ່ານ ນາງ ຄາໂຣ ມໍເທນຊັນ ອໍານວຍການອົງການແພລນສາກົນປະຈໍາ ສປປ ລາວ.

ໂຄງການດັ່ງກ່າວໄດ້ຮັບການສະໜັບສະໜູນເງິນທຶນຈາກກະຊວງການຕ່າງປະເທດຍີ່ປຸ່ນ ແລະອົງການແພລນສາກົນຍີ່ປຸ່ນໂດຍຜ່ານອົງການແພລນສາກົນ ປະຈຳ ສປປ ລາວ. ໂດຍເລັ່ງໃສ່ຊ່ວຍເຫລືອການປັບປຸງລະບົບນໍ້າ,ສິ່ງອໍານວຍຄວາມສະດວກດ້ານສຸຂານາໄມທີ່ເອື້ອອຳນວຍໃຫ້ແກ່ນັກຮຽນຍິງລວມທັງການຮັກສາອະນາໄມໃນໂຮງຮຽນເປົ້າໝາຍ 30 ແຫ່ງດັ່ງກ່າວ, ພ້ອມທັງຈະເລັ່ງໃສ່ປັບປຸງສະພາບແວດລ້ອມ ແລະສຸຂະນາໄມໃຫ້ມີຄວາມສະດວກສະບາຍສໍາລັບນັກຮຽນທຸກຄົນ, ລວມທັງນັກຮຽນຍິງທີ່ຢູ່ໃນໄລຍະເປັນປະຈໍາເດືອນໂດຍຜ່ານການປັບປຸງການເຂົ້າເຖິງລະບົບນໍ້າ ແລະສິ່ງອໍານວຍຄວາມສະດວກດ້ານສຸຂະນາໄມລວມທັງຫ້ອງນໍ້າທີ່ມີການແຍກສໍາລັບຍິງ-ຊາຍ.

แชร์