ຜົນແຂ່ງຂັນບານເຕະ ຊີງຂັນສະໜາມຫຍ້າທຽມ ເບ ສະຫວັນ ເອັຟຊີ 2023

ການແຂ່ງຂັນບານເຕະບານ 8 ຄົນ ລາຍການພິເສດ 8 ພາກສ່ວນສາມັກຄີ ຮຸ່ນອາຍຸ 37 ປີຂຶ້ນໄປ ລາຍການ ແກຣນ ໂອເພັນນິງ ຄັບ ເບ ສະຫວັນ ເອັຟຊີ ສະເຕດ້ຽມ (GRAND OPENING CUP BAY SAVANAH FC STADIUM) ເພື່ອສ້າງຂະບວນການສະເຫຼີມສະຫຼອງການເປີດນຳໃຊ້ສະໜາມກີລາຫຍ້າທຽມ ເບ ສະຫວັນ ເອັຟຊີ ບ້ານຄຳສະຫວາດ ເມືອງໄຊເສດຖາ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 21 ກໍລະກົດ 2023 ຢູ່ສະໜາມດັ່ງກ່າວ.

ທ່ານ ສົມໃຈ ຫຼ່ຽມໄຊຍະຈັກ ປະທານສະໂມສອນລະບຽງພູ ເອັຟຊີ ທັງເປັນຄະນະຮັບຜິດຊອບຈັດການແຂ່ງຂັນ ກ່າວວ່າ: ການແຂ່ງຂັນລາຍການດັ່ງກ່າວ ມີ8 ພາກສ່ວນ ເຂົ້າຮ່ວມ ຄື: ທີມກຸ່ມນໍ້າໃຈລາວ ຫຼືຮາດ ຣ໊ອກ ເອັຟຊີ ທີມຮ້ານອາຫານເຍົາວະຣາດ ທີມສາຍລຸຍ ທີມເຟຣນ ແອນ ແຟ ເອັຟຊີ ທີມປາກເຊ ທີມກຸ່ມສື່ມວນຊົນສາຍກີລາລາວ ທີມໄຊເສດຖາ ອາຄາເດມີ ແລະ ທີມປະສານໃຈ ເຊິ່ງຮູບແບບການແຂ່ງຂັນໃນຮອບຄັດເລືອກຈະແບ່ງອອກເປັນ 2 ກຸ່ມ ຄື: ກຸ່ມ A ແລະກຸ່ມ B ໂດຍຈະມີການຈັບ ສະຫຼາກປະກົບຄູ່ແຂ່ງຂັນ ທີມຊະນະແມ່ນໄດ້ໄປແຂ່ງຂັນ ລາຍການ ດິວິຊັນ 1 ແລະ ທີມເສຍ ໄປແຂ່ງຂັນລາຍການ ດິວິຊັນ 2 ສຳລັບ 4 ທີມ ທີ່ຊະນະ ລາຍການ ດິວິຊັນ 1 ໃນຮອບ 4 ທີມນັ້ນ ຈະມີການຈັບສະຫຼາກປະກົບຄູ່ແຂ່ງ ຂັນອີກຄັ້ງໜຶ່ງ ເພື່ອຄັດເລືອກເອົາທີມຊະນະ ໄປຊີງຊະນະເລີດ ແລະທີມເສຍໄປຊີງອັນດັບທີ 3 ແລະສ່ວນອີກ 4 ທີມທີ່ເສຍ ໄປແຂ່ງຂັນລາຍການ ດິວິຊັນ 2 ແລະການແຂ່ງຂັນແມ່ນກຳນົດຮູບແບບດຽວກັນກັບ ລາຍການ ດິວິຊັນ 1.

ຜ່ານການແຂ່ງຂັນຜົນປາກົດວ່າ: ລາຍການ ດິວິຊັນ 1 ຊະນະເລີດ ປະສານ ໃຈ ເອັຟຊີ ຮອງຊະນະເລີດ ຮາດຣ໊ອກ ອັນດັບທີ 3 ທີມກຸ່ມສື່ມວນຊົນສາຍ ກີລາລາວ ແລະ ອັນດັບທີ 4 ທີມສາຍລຸຍ ສ່ວນລາຍການ ດິວິຊັນ 2 ຊະນະເລີດ ທີມຮ້ານອາຫານເຍົາວະຣາດ ຮອງຊະນະເລີດ ທີມປາກເຊ ອັນດັບທີ 3 ທີມເຟຣນ ແອນ ແຟ ແລະ ອັນດັບທີ 4 ທີມໄຊເສດຖາ ອາຄາເດມີ.

แชร์