ກົມຄຸ້ມຄອງເງິນຕາຕ່າງປະເທດ ເຜີຍແຜ່ຄໍາສັ່ງຂອງນາຍົກ ວ່າດ້ວຍການຄຸ້ມຄອງເງິນຕາຕ່າງປະເທດ

ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ (ທຫລ) ຈັດກອງປະຊຸມເຜີຍແຜ່ຄໍາສັ່ງຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ຂຶ້ນໃນວັນທີ 21 ກໍລະກົດ 2023 ທີ່ທະນາຄານດັ່ງກ່າວໂດຍເປັນປະທານຂອງທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທຫລ, ມີຜູ້ຕາງໜ້າຈາກທະນາຄານທຸລະກິດ ແລະພາກສ່ວນທີ່ກ່ຽວຂ້ອງເຂົ້າຮ່ວມຮັບຟັງ.

ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປລາວ ກ່າວວ່າ: ເພື່ອເຮັດໃຫ້ການຄຸ້ມຄອງເງິນຕາຕ່າງປະເທດເຂົ້າສູ່ລະບົບ, ເຮັດໃຫ້ການຊຳລະສະສາງເງິນຕາກັບຕ່າງປະເທດມີຄວາມສຳດູນຂຶ້ນ ແລະ ທັງເປັນກຳລັງແຮງໜຶ່ງໃນການສະໜັບສະໜູນການຈັດຕັ້ງປະຕິບັດນະໂຍບາຍເງິນຕາ, ອັດຕາແລກປ່ຽນໃຫ້ມີປະສິດທິຜົນ, ແນໃສ່ແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະບັນຫາອັດຕາເງິນເຟີ້, ທີ່ສັງຄົມກຳລັງປະເຊີນຢູ່ໃນປັດຈຸບັນໃຫ້ດີຂຶ້ນໃນຕໍ່ໜ້າ ແລະຮັບປະກັນສະຖຽນລະພາບທາງດ້ານເງິນຕາ.

ກົມຄຸ້ມຄອງເງິນຕາຕ່າງປະເທດໄດ້ຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດທີ່ຜ່ານການຮັບຮອງຈາກສະພາແຫ່ງຊາດໃນປີ 2022 ແລະເລັ່ງເຜີຍແຜ່ຄຳສັ່ງຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ເລກທີ 10/ນຍ ລົງວັນທີ 14 ກໍລະກົດ 2023 ເພື່ອຈັດຕັ້ງຜັນຂະຫຍາຍການຄຸ້ມຄອງເງິນຕາຕ່າງປະເທດໃຫ້ເຂົ້າສູ່ລະບົບ, ກົດໝາຍດັ່ງກ່າວໄດ້ກຳນົດຫລາຍເນື້ອໃນສຳຄັນ ໂດຍສະເພາະການຄອບຄອງ ແລະ ນຳໃຊ້ເງິນຕາຕ່າງປະເທດ, ການຕິດຕາມກະແສເງິນຕິດພັນກັບການນຳເຂົ້າ-ສົ່ງອອກ ສິນຄ້າ ຫລືການບໍລິການ, ລາຍຮັບຂອງຜູ້ອອກແຮງງານ, ການລົງທຶນໂດຍກົງຂອງຕ່າງປະເທດ ຢູ່ ສປປ ລາວ, ການລາຍງານກ່ຽວກັບເງິນຝາກຢູ່ຕ່າງປະເທດ ແລະການບໍລິການແລກປ່ຽນເງິນຕາ,ນອກນີ້,ກໍໄດ້ມອບໃຫ້ບັນດາກະຊວງຕ່າງໆມີສ່ວນຮ່ວມ, ເປັນເຈົ້າການຮັບຜິດຊອບໃຫ້ເພື່ອສັງຄົມເປັນຕົ້ນແມ່ນການຕິດປະກາດຂາຍ, ລາຄາສິນຄ້າ ແລະການຊຳລະສິນຄ້າຕ່າງໆຢູ່ພາຍໃນຕ້ອງເປັນເງິນກີບ.

แชร์