ຄະນະສໍາມະນາຊຸກຍູ້ ແລະສົ່ງເສີມການຊົມໃຊ້ຜະລິດຕະພັນພາຍໃນບໍລິສັດ ທໍ່ນໍ້າລາວ

ຄະນະສໍາມະນາການຊຸກຍູ້ ແລະສົ່ງເສີມການຊົມໃຊ້ຜະລິດຕະພັນພາຍໃນຈາກນະຄອນຫຼວງວຽງຈັນ (ນວ) ນໍາໂດຍ ທ່ານ ປອ ອາດສະພັງທອງ ສີພັນດອນ ເຈົ້າຄອງ ນວ ເຄື່ອນໄຫວຢ້ຽມຢາມ ບໍລິສັດ ທໍ່ນໍ້າລາວ ອຸດສາຫະກໍາ ເທັກໂນໂລຢິ ຈໍາກັດຜູ້ດຽວ ວັນທີ 19 ກໍລະກົດ 2023 ຖືກຕ້ອນຮັບຈາກທ່ານ ບຸນລົງ ດວງນາລີ ປະທານ ບໍລິສັດ ທໍ່ນໍ້າລາວ ອຸດສາຫະກໍາ ເທັກໂນໂລຊີ ຈໍາກັດຜູ້ດຽວ ພ້ອມດ້ວຍພະນັກງານພາຍໃນບໍລິສັດ.

ການເຄື່ອນໄຫວຢ້ຽມຢາມຄັ້ງນີ້ໄດ້ຮັບຊົມວີດີໂອການນໍາສະເໜີກ່ຽວກັບປະຫວັດຄວາມເປັນມາຂອງບໍລິສັດ ທໍ່ນໍ້າລາວ ອຸດສາຫະກໍາ ເທັກໂນໂລຊີ ຈໍາກັດຜູ້ດຽວ ເຊິ່ງບໍລິສັດໄດ້ສ້າງຕັ້ງຂຶ້ນໃນປີ 2006 ເຊິ່ງຜະລິດຕະພັນທໍ່ທີ່ໂຮງງານຜະລິດມີ 2 ຍີ່ຫໍ້ຄື: ທໍ່ດີດີ ແລະທໍ່ແອວພີ ດ້ວຍປະສົບການເຮັດວຽກຍາວນານທາງບໍລິສັດ ມຸ້ງໝັ້ນຕອບສະໜອງສິນຄ້າມີຄຸນນະພາບສູງ ແລະ ສ້າງຄວາມເພິ່ງພໍໃຈໃຫ້ແກ່ລູກຄ້າ ໃນວຽກງານຕ່າງໆ ຄຽງຄູ່ກັບການພັດທະນາຜະລິດຕະພັນຂອງບໍລິສັດຢ່າງຕໍ່ເນື່ອງ ແລະມີຄວາມຫຼາກຫຼາຍດ້ານລະບົບທໍ່ເຊັ່ນ: ທໍ່ນໍ້າປະປາ ທໍ່ນໍ້າເປື້ອນ ທໍ່ນໍ້າຮ້ອນ-ນໍ້າເຢັນ ທໍ່ນໍ້າສະອາດໃນເຂດຊົນນະບົດ ທໍ່ສໍາລັບການໄຟຟ້າທໍ່ນໍ້າເພື່ອການກະເສດ ຂໍ້ຕໍ່ ແລະອຸປະກອນຕ່າງໆທີ່ກ່ຽວຂ້ອງເພື່ອສ້າງຄວາມສະດວກສະບາຍໃນການນໍາໃຊ້ເຂົ້າໃນວຽກງານຕ່າງໆພ້ອມນັ້ນໂຮງງານມີການຜະລິດສິນຄ້າຫຼາຍກວ່າ 7.000 ໂຕນຕໍ່ປີ ໂຮງງານຍັງໄດ້ຮັບຮອງມາດຕະຖານລາວ ມລ71-2009 ແລະ ມາດຕະຖານສາກົນ ISO 9001:2015 ມີລູກຄ້າກໍ່ຄືຕົວແທນຈໍາໜ່າຍທົ່ວປະເທດຫຼາຍກວ່າ 5.000 ຮ້ານຄ້າ ມີລົດບັນທຸກຜະລິດຕະພັນຫຼາຍກວ່າ 11 ຄັນ ປັດຈຸບັນບໍລິສັດຮ່ວມກັບພະແນກໂຍທາທິການ ແລະ ຂົນສົ່ງ ແຂວງຫຼວງພະບາງ ເຂົ້າຮ່ວມໂຄງການກໍ່ສ້າງ ແລະສະໜອງນໍ້າປະປາຊຸມຊົນ ດ້ວຍຮູບແບບ PPP ຢູ່ກຸ່ມບ້ານ ເມືອງຂາຍ ແຂວງຫຼວງພະບາງ ພ້ອມນີ້ ບໍລິສັດຍັງມີກິດຈະກໍາຄື: ເປັນໂຮງງານຜະລິດ ແລະຈໍາໜ່າຍທໍ່ ອຸປະກອນສົ່ງ-ຍ່ອຍທົ່ວປະເທດ ກໍ່ສ້າງລະບົບນໍ້າປະປາ ແລະ ສໍາປະທານຮູບແບບ PPP ຢູ່ ນວ ຫຼວງພະບາງ ແຂວງວຽງຈັນ ກໍ່ສ້າງລະບົບນໍ້າປະປາຮູບແບບ BOT ຢູ່ແຂວງໄຊຍະບູລີ ແຂວງຫຼວງພະບາງ ແລະ ແຂວງອື່ນໆທົ່ວປະເທດ ພາຍຫຼັງທີ່ຮັບຊົມວິດີໂອສໍາເລັດ ກຸ່ມຜະລິດເຫຼັກເສັ້ນ ສປປ ລາວ ໄດ້ນໍາສະເໜີສະພາບການຜະລິດ ແລະສະໜອງຜະລິດຕະພັນປະເພດເຫຼັກເສັ້ນ ແລະເຫຼັກຮູບປະພັນຕື່ມອີກ.

ໂອກາດນີ້ ທ່ານ ເຈົ້າຄອງ ນວ ມີຄໍາເຫັນວ່າ: ການເຄື່ອນໄຫວຢ້ຽມຢາມ ບໍລິສັດ ທໍ່ນໍ້າລາວ ອຸດສາຫະກໍາ ເທັກໂນໂລຊີ ຈໍາກັດຜູ້ດຽວ ເປັນການສືບຕໍ່ຈາກກອງປະຊຸມປຶກສາຫາລື ກ່ຽວກັບການນໍາໃຊ້ວັດຖຸດິບ ແລະ ອຸປະກອນທີ່ຜະລິດຢູ່ພາຍໃນ ນວ ທີ່ຈັດຂຶ້ນທີ່ພະແນກແຜນການ ແລະ ການລົງທຶນ ນວ ໂດຍຄະນະທີ່ເຂົ້າຮ່ວມກອງປະຊຸມກໍ່ໄດ້ໄປຢ້ຽມຢາມໂຮງງານອຸດສາຫະກໍາ ໂຕໂຢລາວ ຈໍາກັດຜູ້ດຽວ ໂດຍມີຈຸດປະສົງ ເພື່ອຊຸກຍູ້ການຊົມໃຊ້ຜະລິດຕະພັນພາຍໃນໃຫ້ນັບມື້ເພີ່ມຂຶ້ນພ້ອມນັ້ນກໍ່ໄດ້ສະແດງຄວາມຊົມເຊີຍຕໍ່ຄວາມມຸ້ງໝັ້ນຂອງທັງສອງໂຮງງານທີ່ໄດ້ເອົາໃຈໃສ່ໃນການຜະລິດທໍ່ທີ່ມີຄຸນນະພາບຮັບໃຊ້ໃຫ້ແກ່ສັງຄົມໃນການສ້າງສິ່ງອໍານວຍຄວາມສະດວກແຕ່ເຖິງຢ່າງໃດກໍ່ດີເຫັນວ່າໃນປັດຈຸບັນການນໍາໃຊ້ຜະລິດຕະພັນພາຍໃນຍັງມີຈໍານວນບໍ່ຫຼາຍ ສະນັ້ນຕ້ອງຊ່ວຍຊຸກຍູ້ການນໍາໃຊ້ຜະລິດຕະພັນພາຍໃນໃຫ້ຫຼາຍຂຶ້ນດ້ວຍການສ້າງກົນໄກປະສານງານການຄຸ້ມຄອງຈາກພາກລັດບໍລິສັດ ແລະສັງຄົມພ້ອມທັງຮ່ວມມືຊ່ວຍເຫຼືອເຊິ່ງກັນ ແລະກັນໃນລັກສະນະກະຕຸກຊຸກຍູ້ແບບບັງຄັບ ການລົງທຶນ ແລະການພັດທະນາທີ່ຕິດພັນກັບພາກລັດເປັນເງື່ອນໄຂໜຶ່ງໃນເງື່ອນໄຂເຊັນສັນຍາສໍາປະທານການກໍ່ສ້າງຕຶກອາຄານຕ້ອງໄດ້ເວົ້າຢ່າງຈະແຈ້ງໃນນັ້ນເນັ້ນໃຫ້ຊົມໃຊ້ຜະລິດຕະພັນພາຍໃນທີ່ມີຄຸນນະພາບພອມນັ້ນໃຫ້ເບິ່ງກົນການຄຸ້ມຄອງຕະຫຼາດນອກນີ້ພາກລັດ ແລະສັງຄົມທີ່ມາໃນຄັ້ງນີ້ໃຫ້ສືບຕໍ່ການຮ່ວມມືໃຫ້ມີຈໍານວນເພີ່ມຂຶ້ນເພື່ອຊຸກຍູ້ໃຫ້ມີການຊື້ການສະໜອງເຊິ່ງກັນ ແລະກັນໃຫ້ເກີດດອກອອກຜົນ ແລະເປັນຮູບປະທໍາ.

แชร์