ສາຍດ່ວນສະພາ! ປະຊາຊົນສົ່ງຄໍາເຫັນ 500 ກວ່າສາຍ ບັນຫາໄພເງິນເຟີ້, ຄ່າຄອງຊີບ ແລະລາຄາສິນຄ້າ

ໃນໄລຍະ 17ວັນ(26 ມິຖຸນາ-18 ກໍລະກົດ 2023) ຂອງການດຳເນີນ ກອງປະຊຸມສະໄຫມສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ກໍມີປະຊາຊົນບັນດາເຜົ່າສົ່ງຄຳຄິດຄຳເຫັນຜ່ານໂທລະສັບສາຍດ່ວນ (156) ຫຼາຍກວ່າ536ສາຍ ເຊິ່ງໄດ້ກວມເອົາ 25 ພາກສ່ວນ ແລະ ບັນຫາພົ້ນເດັ່ນທີ່ສັງຄົມມີຄວາມສົນໃຈຫຼາຍເຊັ່ນ:

- ບັນຫາໄພເງິນເຟີ້
- ຄ່າຄອງຊີບ ແລະ ການຄຸ້ມຄອງລາຄາສິນຄ້າ
- ການອະນຸຍາດໃຫ້ສໍາປະທານທີ່ດິນ
- ການຂຸດຄົ້ນແຮ່ທາດຊະຊາຍ
- ດ່ານພາສີສາກົນຢູ່ທ້ອງຖິ່ນ (ການເກັບເງິນນໍາລົດບັນທຸກສິນຄ້າ, ກວດກາການປະຕິບັດໜ້າທີ່ຂອງເຈົ້າໜ້າທີ່)
- ເງິນເດືອນຂອງພະນັກງານ-ລັດຖະກອນ
- ການກໍ່ສ້າງເສັ້ນທາງ
- ການຂາຍສິນຄ້າໃຫ້ເປັນເງິນກີບ ແລະ ການແລກປ່ຽນເງິນຕາ
- ການປາບປາມຢາເສບຕິດ
- ຂໍ້ຂັດແຍ່ງທີ່ດິນ ແລະ ຄ່າຊົດເຊີຍຈາກໂຄງການລົງທຶນລັດ (ເສັ້ນທາງລົດໄຟ, ສ້າງສະໜາມຝຶກຊ້ອມການທະຫານຂອງກະຊວງປ້ອງກັນປະເທດ, ເຂື່ອນໄຟຟ້ານໍ້າອູ)
- ບັນຫາສິ່ງແວດລ້ອມ (ການປ່ອຍນໍ້າເປື້ອງຂອງໂຮງງານອຸດສະຫະກໍາເຂດພັດທະນາກວມລວມໄຊເສດຖາ)
- ເງິນອຸດໜູນນະໂຍບາຍຕໍ່ພະນັກງານເສຍອົງຄະ
- ມາດຕະຖານການຮຽນ-ການສອນຂອງໂຮງຮຽນເຂດຊົນນະບົດ.

ຕໍ່ກັບຄໍາຄິດເຫັນຂອງປະຊາຊົນທີ່ສົ່ງມາທາງໂທລະສັບສາຍດ່ວນດັ່ງກ່າວ, ກອງເລຂາກອງປະຊຸມຈະໄດ້ສັງລວມ ແລະ ມອບໃຫ້ກຳມາທິການທີ່ກ່ຽວຂ້ອງ ເພື່ອປະສານສົມທົບພາກສ່ວນກ່ຽວຂ້ອງຄົ້ນຄວ້າແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.

แชร์