ເຄິ່ງປີ ດ່ານສາກົນນາເພົ້າມີຄົນເຂົ້າ-ອອກ 131.557 ຄົນ ແລະພາຫະນະ 77.237 ຄັນ

ທ່ານ ພັທ ພົມມະນີ ໄຊຍະລາດ ຫົວໜ້າຄຸ້ມຄອງດ່ານສາກົນນາເພົ້າ ແຂວງຄຳມ່ວນ ໄດ້ໃຫ້ຮູ້ກ່ຽວກັບການຈັດຕັ້ງປະຕິບັດວຽກງານພາຍໃນດ່ານສາກົນນາເພົ້າວ່າ: ໃນໄລຍະ 6 ເດືອນຕົ້ນປີ 2023 ຜ່ານມາສາມາດເກັບກຳກວດກາຄົນເຂົ້າ-ອອກເມືອງໄດ້ທັງໝົດ 131.557 ຄົນ, ຍິງ 16.071 ຄົນ, ໃນນັ້ນຄົນລາວມີ 18.900 ຄົນ, ຍິງ 2.885 ຄົນ, ຄົນຫວຽດນາມມີ 109.568 ຄົນ, ຍິງ 11.518 ຄົນ, ຄົນໄທມີ 2.732 ຄົນ, ຍິງ 1.565 ຄົນ ແລະ ຄົນຕ່າງປະເທດ ໄປປະເທດທີສາມມີ 357 ຄົນ, ຍິງ 103 ຄົນ; ມີພາຫະນະເຂົ້າ-ອອກເມືອງທັງໝົດ 77.237 ຄັນ ໃນນີ້ ລົດລາວເຂົ້າ 20.202 ຄັນ, ລົດລາວອອກ 20.248 ຄັນ, ລົດຫວຽດນາມເຂົ້າ 18.606 ຄັນ, ລົດຫວຽດນາມອອກມີ 18.181 ຄັນ.

ທ່ານກ່າວຕື່ມວ່າ: ສຳລັບຂໍ້ຫຍຸ້ງຍາກທີ່ເປັນອຸປະສັກຕໍ່ກັບການຈັດຕັ້ງປະຕິບັດວຽກງານຢູ່ພາຍໃນດ່ານກໍ່ຄືລະບົບໄຟຟ້າຂອງດ່ານໃນຊ່ວງໄລຍະລະດູຝົນແມ່ນມັກຈະມີປັນຫາໄຟຟ້າມາບໍ່ປົກກະຕິ ເຮັດໃຫ້ລະບົບເຄື່ອງໃຊ້ໄຟຟ້າມີບັນຫາ ແລະ ເປ່ເພ້ໄດ້ງ່າຍ, ເສັ້ນທາງເລກທີ 12 ແຕ່ຈຸດສຸມຫຼັງຄັງຂຶ້ນຫາດ່ານຊາຍແດນເຊິ່ງເປັນພູຄ້ອຍຊັນ ແລະ ຄົດໂຄ້ງ ໄລຍະທາງປະມານ 16 ກິໂລແມັດ ຫຼາຍຈຸດແມ່ນມີການເປ່ເພເຊິ່ງເຮັດໃຫ້ການສັນຈອນໄປມາ ແລະຂົນສົງສິນຄ້າເຂົ້າ-ອອກ ປະເທດແມ່ນພົບຄວາມຫຍຸ້ງຍາກຫຼາຍ (ເຊິ່ງອາດຈະເປັນເຫດຜົນໜຶ່ງທີ່ບັນດາຜູ້ປະກອບການ ແລະບໍລິສັດຂົນສົ່ງອາດຈະໄປນຳໃຊ້ເສັ້ນທາງອື່ນແທນ).

ສ່ວນທິດທາງໃນ 6 ເດືອນທ້າຍປີ ຈະສຸມໃສ່ຂອດການກວດກາ, ການບໍລິການ ແລະການຈັດເກັບລາຍຮັບໃຫ້ໄດ້ຖອກເຂົ້າງົບປະມານຂອງລັດຕາມກຳນົດເປົ້າໝາຍຂອງຂັ້ນເທິງມອບໝາຍຢ່າງທັນເວລາ, ສ້າງພະນັກງານ-ລັດຖະກອນພາຍໃນດ່ານໃຫ້ມີຄວາມປອດໃສ, ເຮັດວຽກງານວິຊາສະເພາະຂອງຕົນແບບມີວິທະຍາສາດ, ພາວະວິໄສ, ເຮັດວຽກບໍລິການດ້ວຍຄວາມວ່ອງໄວ, ໂປ່ງໃສ ແລະເປັນທຳເພື່ອຫັນເຂົ້າສູ່ຄວາມທັນສະໄໝຢ່າງແຂງແຮງເທື່ອລະກ້າວ.
ທີ່ມາ: Khammouane News

แชร์