ລາວ ໄດ້ຮັບການຊ່ວຍເຫລືອລ້າເກືອບ 4 ລ້ານໂດລາ ປັບປຸງເສັ້ນທາງນາກະສັງ​-ດອນເດດ​-ດອນຄອນ

ໂຄງການປັບປຸງເສັ້ນທາງ ແລະສິ່ງອໍານວຍຄວາມສະດວກດ້ານການທ່ອງທ່ຽວຢູ່ບ້ານນາກະສັງ, ບ້ານດອນເດດ ແລະບ້ານດອນຄອນ ເມືອງໂຂງ ແຂວງຈໍາປາສັກ ແມ່ນໂຄງການໜຶ່ງທີ່ໄດ້ຮັບທຶນຊ່ວຍເຫຼືອລ້າຈາກ​ທະນາຄານພັດທະນາອາຊີ ເຊິ່ງໄດ້ເຊັນສັນຍາກໍ່ສ້າງໃນວັນທີ 30 ທັນວາ 2019 ລະຫວ່າງ​ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ເຈົ້າຂອງໂຄງການ) ແລະ ບໍລິສັດ​ ພູໂຂງ ກໍ່ສ້າງຈໍາກັດຜູ້ດຽວ (ຜູ້ຮັບເໝົາກໍ່ສ້າງ) ມູນຄ່າການກໍ່ສ້າງລວມທັງໝົດ 3.​964.​308 ໂດລາສະຫະລັດ ເຊິ່ງມີໄລຍະການກໍ່ສ້າງ​ ແຕ່ວັນທີ 26 ພຶດສະພາ 2020 ຫາ 30 ມິຖຸນາ 2023. ມາຮອດປະຈຸບັນ, ການກໍ່ສ້າງແມ່ນສໍາເລັດແລ້ວ 100%.​

ພິທີມອບ​-ຮັບ ແລະເປີດການນຳໃຊ້ໂຄງການປັບປຸງເສັ້ນທາງການເຂົ້າເຖິງນາກະສັງ​-ດອນເດດ​-ດອນຄອນ​ ເມືອງໂຂງ ແຂວງຈຳປາສັກ ໄດ້ຈັດຂຶ້ນໃນວັນທີ 18 ກໍລະກົດ 2023 ຢູ່ທ່າກຳປັ່ນຫົວດອນເດດ.

ສໍາລັບບ້ານນາກະສັງ​ ສ້າງເສັ້ນທາງປູເບຕົງເສີມເຫຼັກ​ ຍາວ 2,9 ກິໂລແມັດ, ໜ້າທາງກ້ວາງ 6 ແມັດ ປະກອບດ້ວຍທໍ່ລອດທາງ, ຮ່ອງລະບາຍນໍ້າສອງຝາກທາງ, ຫຼັກເຕືອນໄພກັນຕົກ, ຫຼັກກິໂລແມັດ, ປູກຫຍ້າບ່າທາງ ແລະ ອື່ນໆ; ນອກນີ້​ ຍັງໄດ້ປູທາງຊອຍດ້ວຍເບຕົງ ເຂົ້າຫາບ່ອນຈອດລົດນາກະສັງ ຍາວ 60 ແມັດ; ປັບປຸງທ່າເຮືອໂດຍສານ ແລະ ນັກທ່ອງທ່ຽວ​ ເຊິ່ງປະກອບມີ ຂັ້ນໄດຂຶ້ນ​ - ລົງ ຫາບ່ອນຈອດເຮືອ, ປູເບຕົງເສີມເຫຼັກທາງຍ່າງຕາມແຄມແມ່ນໍ້າຂອງ ຍາວ 123 ແມັດ, ກວ້າງ 3,4 ແມັດ;ເທເບຕົງເສີມເຫຼັກກັນເຈື່ອນ​ ຍາວ 98 ແມັດ, ຕິດຕັ້ງຮາວກັນຕົກຕາມແຄມຂອງຍາວ 100 ແມັດ, ປັບປຸງຂົວເກົ່າຂາງເຫຼັກທີ່ເຄີຍປູດ້ວຍໄມ້ ມາເປັນຂົວເບຕົງເສີມເຫຼັກ 1 ແຫ່ງ ຍາວ 9 ແມັດ,​ ກ້ວາງ 3,4 ແມັດ, ປະກອບໄຟເຍືອງທາງແສງຕາເວັນ, ປັບປຸງຫ້ອງຂາຍປີ້ເຮືອ, ປັບປຸງບ່ອນລໍຖ້າລົງເຮືອ ແລະ ລານຈອດລົດ; ວາງທໍ່ລະບາຍນໍ້າຕໍ່ຈາກປາກທໍ່ເດີມລົງໄປນໍ້າຂອງອີກ 40 ແມັດ ຂະໜາດຟີ 100 ຊັງຕີແມັດ.

ບ້ານດອນເດດ,​ ສໍາເລັດການກໍ່ສ້າງເສັ້ນທາງປູເບຕົງເສີມເຫຼັກ 3 ເສັ້ນ ລວມຄວາມຍາວ 5,91 ກິໂລແມັດ ໃນນັ້ນ​ ເສັ້ນທາງທີ 1 ຈາກຫົວດອນເດດ ຫາ​ ບ່ອນຄ່ຽນຖ່າຍສິນຄ້າ ທ່າກໍາປັ່ນເກົ່າ ຍາວ 1.​346 ແມັດ, ກ້ວາງ 3 ແມັດ; ເສັ້ນທາງທີ​ 2 ຈາກບ່ອນຄ່ຽນຖ່າຍສິນຄ້າທ່າກໍາປັ່ນເກົ່າ ຜ່ານທົ່ງນາ ຫາ ຂົວຂ້າມນໍ້າຂອງ ບ້ານດອນເດດ​ - ບ້ານດອນຄອນ ຍາວ 2.​072 ແມັດ, ກວ້າງ 3,50 ແມັດ​ ແລະ​ເສັ້ນທາງທີ​ 3 ຈາກບ່ອນຄ່ຽນຖ່າຍສິນຄ້າທ່າກໍາປັ່ນເກົ່າລຽບຕາມແຄມແມ່ນໍ້າຂອງ ຝັ່ງຕາເວັນອອກຂອງບ້ານດອນເດດ ຫາ ຂົວຂ້າມນໍ້າຂອງບ້ານດອນເດດ​-ບ້ານດອນຄອນ ຍາວ 2.​489 ແມັດ, ກວ້າງ 3 ແມັດ; ພ້ອມນີ້​ຍັງໄດ້ປັບປຸງລານຈອດລົດ 2 ແຫ່ງ ຢູ່ຫົວບ້ານດອນເດດ ແລະທ່າກໍາປັ່ນເກົ່າພ້ອມທັງສ້າງຈຸດຊົມວິວ.

ບ້ານດອນຄອນສ້າງເສັ້ນທາງປູເບຕົງເສີມເຫຼັກ ຈໍານວນ 5 ເສັ້ນທາງ ລວມຄວາມຍາວ 12,3 ກິໂລແມັດ ໃນນັ້ນ ມີເສັ້ນທາງທີ​ 4 ຈາກຂົວຂ້າມນໍ້າຂອງ ບ້ານດອນເດດ​ - ບ້ານດອນຄອນ ຫາ ຫາງຄອນ ຄວາມຍາວ 4.​620 ແມັດ, ກວ້າງ 3,50 ແມັດ; ເສັ້ນທາງທີ​ 5 ຈາກຂົວຂ້າມນໍ້າຂອງບ້ານດອນເດດ​ - ດອນຄອນຜ່ານຫົວບ້ານດອນຄອນ ລຽບຕາມແຄມແມ່ນໍ້າຂອງ ຝັ່ງຕາເວັນອອກຂອງດອນຄອນ​ ຫາ 3 ແຍກຫາງຄອນ ຄວາມຍາວ 5,648 ແມັດ, ກວ້າງ 2,50 – 3,50 ແມັດ; ເສັ້ນທາງທີ​ 6 ຈາກຂົວຂ້າມນໍ້າຂອງບ້ານດອນເດດ​ - ບ້ານດອນຄອນ ຫາ 3 ແຍກທາງເຂົ້ານໍ້າຕົກຕາດຫຼີ່ຜີ ຄວາມຍາວ 1.​335 ແມັດ, ກວ້າງ 3,50 ແມັດ; ເສັ້ນທາງທີ 7 ຈາກຂົວຂ້າມນໍ້າຂອງບ້ານດອນເດດ​ - ບ້ານດອນຄອນ ຫາ 3 ແຍກວາງສະແດງຫົວລົດໄຟເກົ່າ ຄວາມຍາວ 104,3 ແມັດ, ກວ້າງ 3,50 ແມັດ; ເສັ້ນທາງທີ​ 8 ຈາກນໍ້າຕົກຕາດຫຼີ່ຜີ ຫາ ເສັ້ນທາງທີ​ 6 ຄວາມຍາວ 594 ແມັດ, ກວ້າງ 3,50 ແມັດ; ໄດ້ກໍ່ສ້າງຂົວເບເລ່ 3 ແຫ່ງ ຕາມເສັ້ນທາງ​ທີ​ 5, ຄວາມກວ້າງ 3,96 ແມັດ, ແຫ່ງທີ 1 ຍາວ 21 ແມັດ, ແຫ່ງທີ 2 ຍາວ 24 ແມັດ ແລະ ແຫ່ງທີ 3 ຍາວ 27 ແມັດ.​ ປັບປຸງບ່ອນວາງສະແດງຫົວລົດໄຟເກົ່າ ເພື່ອໃຫ້ນັກທ່ອງທ່ຽວພາຍໃນ ແລະ​ຕ່າງປະເທດໄດ້ມາທ່ຽວຊົມ ແລະຮຽນຮູ້ປະຫວັດຄວາມເປັນມາ;

ປັບປຸງລານຈອດລົດຢູ່ບ້ານຫາງຄອນ ເພື່ອຊົມທິວທັດທໍາມະຊາດຕາມລໍາແມ່ນໍ້າຂອງ ເຂດຊາຍແດນ ລາວ​-ກໍາປູເຈຍ.

ພາຍຫຼັງໂຄງການກໍ່ສ້າງເສັ້ນທາງ ແລະສິ່ງອຳນວຍຄວາມສະດວກຕ່າງໆ ສຳເລັດແລ້ວຈະເປັນການປະກອບສ່ວນອັນສຳຄັນເຂົ້າໃນການພັດທະນາ ແລະສົ່ງເສີມການທ່ອງທ່ຽວຂອງແຂວງຈໍາປາສັກ ແລະ​ເມືອງໂຂງ​ ເພື່ອເຊື່ອມໂຍງກັບປະເທດໃກ້ຄຽງ.​ ນອກນີ້​ຍັງເປັນການຊ່ວຍຊຸກຍູ້​ - ສົ່ງເສີມການຜະລິດ, ການຂົນສົ່ງສິນຄ້າກໍຄືຜົນຜະລິດຂອງປະຊາຊົນ ແລະການໄປມາຫາສູ່ກັນຂອງປະຊາຊົນໃຫ້ມີຄວາມສະດວກສະບາຍ ແລະມີຄວາມປອດໄພຍິ່ງຂຶ້ນ​ທັງເປັນການປະກອບສ່ວນພັດທະນາເສດຖະກິດ​ລວງ​-ສັງຄົມຂອງທ້ອງຖິ່ນ ແລະຂອງຊາດ. ນອກຈາກນັ້ນ,ຍັງເປັນການກະກຽມຄວາມພ້ອມໃຫ້ແກ່ການເປີດປີທ່ອງທ່ຽວລາວ ປີ 2024 ທີ່ຈະມາເຖິງນີ້.
ທີ່ມາ: ຫນັງສືພິມຈໍາປາໃຫມ່

แชร์