ເຊັນສັນຍາກຽມພັດທະນາ ສວນສາທາລະນະບັນດາເຜົ່າ ແລະພັດທະນາສະໜາມກິລາອຸດົມໄຊ

ທ້າຍອາທິດຜ່ານມາທີ່ພະແນກແຜນການ ແລະການລົງທຶນ ແຂວງອຸດົມໄຊພິທີເຊັນບົດບັນທຶກຄວາມເຂົ້າໃຈກ່ຽວກັບການສໍາຫລວດ, ອອກແບບ ແລະສຶກສາຄວາມເປັນໄປໄດ້ ໃນການລົງທຶນສຳປະທານສວນສາທາລະນະ, ບັນດາເຜົ່າແຄມຂອງຕາຝັ່ງເຈື່ອນນໍ້າກໍ ແລະຮ່ວມພັດທະນາສະຫນາມກິລາຢູ່ບ້ານແຈງ ເມືອງໄຊ ແຂວງອຸດົມໄຊ ພິທີລົງນາມໃນບົດບັນທຶກຢ່າງເປັນທາງການລະຫວ່າງທ່ານນາງ ຈັນທະລາ ໄຊບຸນເຮືອງ ຫົວຫນ້າພະແນກ ແຜນການ ແລະການລົງທຶນ ແຂວງ ໃນນາມແຂວງອຸດົມໄຊ ແລະທ່ານນາງ ຈັນນະພາ ວົງສະຫມໍລະພູມ ອຳນວຍການບໍລິສັດ ຊີເອັນພີ ສໍາຫຼວດ ແລະຂຸດຄົ້ນບໍ່ແຮ່ຂາອອກ-ຂາເຂົ້າຈໍາກັດ( CNP )ເປັນກຽດເຂົ້າຮ່ວມທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ, ຕາງຫນ້າຂະແຫນງການກ່ຽວຂ້ອງຂັ້ນແຂວງ, ຕະຫລອດຮອດວິຊາການທັງສອງຝ່າຍເຂົ້າຮ່ວມ.

ໃນພິທີໄດ້ຜ່ານເນື້ອໃນຂອງບົດບັນທຶກດັ່ງກ່າວໃນນັ້ນປະກອບມີທັງຫມົດ 15 ມາດຕາ ໂດຍລວມແລ້ວແມ່ນກຳນົດຈຸດປະສົງ, ເປົ້າຫມາຍ, ພາລະບົດບາດ, ສິດຫນ້າທີ່, ຄວາມຮັບຜິດຊອບຂອງທັງສອງຝ່າຍ, ກຳນົດຮູບແບບ, ວິທີການ, ຂັ້ນຕອນລວມທັງໄລຍະເວລາຂອງການສຳຫລວດ, ອອກແບບ ແລະສຶກສາຄວາມເປັນໄປໄດ້.

ພາຍຫລັງສໍາເລັດໃນການລົງນາມບົດບັນທຶກດັ່ງກ່າວແລ້ວຝ່າຍບໍລິສັດຈະໄດ້ສືບຕໍ່ລົງເຄື່ອນໄຫວສຶກສາ, ສຳຫລວດຕົວຈິງເຊິ່ງເປົ້າຫມາຍລວມຂອງທັງສອງຝ່າຍກໍຄື:ແຂວງອຸດົມໄຊ ແລະບໍລິສັດແມ່ນແນ່ໃສ່ໃນການພັດທະນາເສດຖະກິດ-ສັງຄົມ ຂອງແຂວງອຸດົມໄຊ ໃຫ້ຂະຫຍາຍຕົວຢ່າງຕໍ່ເນື່ອງບົນພື້ນຖານອີງໃສ່ທ່າແຮງບົ່ມຊ້ອນຂອງແຂວງເຮັດໃຫ້ແຜນພັດທະນາເສດຖະກິດ-ສັງຄົມ ຂອງແຂວງ ຄັ້ງທີ IX ບັນລຸຕາມລະດັບຄາດຫມາຍ,ເຮັດໃຫ້ປະຊາຊົນໃນຂອບເຂດດັ່ງກ່າວມີອາຊີບ,ມີລາຍຮັບ ແລະມີຊີວິດການເປັນຢູ່ທີ່ດີຂຶ້ນ, ທັງເປັນການປັບປຸງ, ບູລະນະຮັກສາ ແລະພັດທະນາ ແຄມນໍ້າກໍ ແລະສະຫນາມກິລາຂອງແຂວງອຸດົມໄຊ ຕື່ມອີກ.

แชร์