ຮ່າງກົດໝາຍ 10 ສະ​ບັບ ທີ່ສະພາແຫ່ງຊາດ ພິຈາລະນາ ແລະຮັບຮອງເອົາ

ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານກໍາມາທິການກົດໝາຍຂອງສະພາແຫ່ງຊາດ ຊຸດທີ IX ໄດ້ຖະແຫຼ່ງຂ່າວກ່ຽວກັບຜົນການພິຈາລະນາ ແລະຮັບຮອງເອົາກົດໝາຍ ໃນກອງປະຊຸມສະໄໝສາມັນ ຄັ້ງທີ 5 ຂອງສະພາແຫ່ງຊາດ ຊຸດທີ IX ໃນຕອນແລງວັນທີ 17 ກໍລະກົດນີ້ວ່າ: ເລີ່ມແຕ່ວັນທີ 6-14 ກໍລະກົດ 2023 ນີ້, ກອງປະຊຸມໄດ້ສຸມໃສ່ພິຈາລະນາປະກອບຄວາມເຫັນໃສ່ເນື້ອໃນແຕ່ລະຮ່າງກົດໝາຍ ຈໍານວນ 10 ສະບັບ ຢ່າງລະອຽດຖີ່ຖ້ວນ ຊຶ່ງໃນນີ້ ມີກົດໝາຍສ້າງໃໝ່ 4 ສະບັບ ແລະປັບປຸງ 6 ສະບັບ.

ສໍ​າລັບກົດໝາຍສ້າງໃໝ່ປະ​ກອບ​ມີ: ກົດໝາຍວ່າດ້ວຍອາກອນທີ່ດິນ; ກົດໝາຍວ່າດ້ວຍເຍົາວະຊົນລາວ; ກົດໝາຍວ່າດ້ວຍການຈັດຫາງານ ແລະ ກົດໝາຍວ່າດ້ວຍສາທາລະນະສຸກ ຊຶ່ງ​ທັງ​ໝົດ​ນັ້ນໄດ້​ຮັບ​ສຽງ​ເຫັນ​ດີ​ເປັນ​ສຽງ​ສ່ວນຫຼາຍ.

ສ່ວນກົດໝາຍສະບັບປັບປຸງປະ​ກອບ​ມີ: ກົດໝາຍວ່າດ້ວຍທະນາຄານທຸລະກິດ; ກົດໝາຍວ່າດ້ວຍສານທະຫານ; ກົດໝາຍວ່າດ້ວຍສັດນໍ້າ ແລະການປະມົງ; ກົດໝາຍວ່າດ້ວຍສັດປ່າ; ກົດໝາຍວ່າດ້ວຍການປົກປ້ອງສິດ ແລະຜົນປະໂຫຍດຂອງເດັກ ແລະກົດໝາຍວ່າດ້ວຍການພິມຈໍາໜ່າຍ.

ທ່ານຮອງປະທານສະພາແຫ່ງຊາດ ຍັງກ່າວວ່າ: ການພິຈາລະນາ ແລະຮັບຮອງເອົາກົດໝາຍ ຈໍານວນ 10 ສະບັບນີ້ແມ່ນຜົນສໍາເລັດທີ່ສໍາຄັນໃນການຈັດຕັ້ງປະຕິບັດແຜນການສ້າງ ແລະປັບປຸງກົດໝາຍແຕ່ປີ 2023-2025, ທັງເປັນການປະກອບສ່ວນສໍາຄັນໃນການປັບປຸງ ແລະເພີ່ມທະວີພາຫະນະໃນການຄຸ້ມຄອງລັດ,ຄຸ້ມຄອງເສດຖະກິດ-ສັງຄົມຂອງປະເທດເຮົາໃຫ້ເປັນລະບົບຄົບຊຸດຂຶ້ນຕື່ມເພື່ອຮັບປະກັນປົກປ້ອງສິດ ແລະຜົນປະໂຫຍດຂອງຊາດ, ຂອງລັດ, ລວມໝູ່, ບຸກຄົນ, ນິຕິບຸກຄົນ ແລະ ປະຊາຊົນລາວບັນດາເຜົ່າ, ສະກັດກັ້ນ ແລະຕ້ານບັນດາປະກົດການຫຍໍ້ທໍ້ ທີ່ເປັນພຶດຕິກໍາລະເມີດກົດໝາຍ ຢູ່ໃນສັງຄົມ, ປະກອບສ່ວນໃນການສ້າງລັດເຮົາໃຫ້ເປັນລັດປະຊາທິປະໄຕ ທີ່ປົກຄອງດ້ວຍກົດໝາຍໃຫ້ເຂັ້ມງວດຂຶ້ນ. ບັນດາກົດໝາຍເຫຼົ່ານັ້ນ ເຖິງວ່າໄດ້ຮັບຮອງເອົາແລ້ວກໍຕາມກໍາມາທິການກົດໝາຍຍັງຈະໄດ້ສືບຕໍ່ ສົມທົບກັບບັນດາກໍາມາທິການທີ່ກ່ຽວຂ້ອງຂອງສະພາແຫ່ງຊາດ, ຄະນະຮັບຜິດຊອບແຕ່ລະກົດໝາຍ ແລະພາກສ່ວນທີ່ກ່ຽວຂ້ອງປັບປຸງ, ຮຽບຮຽງໃຫ້ສໍາເລັດສົມບູນ ເພື່ອລາຍງານຄະນະປະຈໍາສະພາແຫ່ງຊາດ ກ່ອນສະເໜີທ່ານປະທານປະເທດພິຈາລະນາອອກລັດຖະດໍາລັດປະກາດໃຊ້ຢ່າງເປັນທາງການຕາມລະບຽບການທີ່ກໍານົດໄວ້.
ທີ່ມາ: ປະຊາຊົນ

แชร์