ລົງທະບຽນດ່ວນ! ຜູ້ປະກອບການສິນຄ້າ 13 ລາຍການ ຖ້າບໍ່ລົງແມ່ນບໍ່ສາມາດນໍາເຂົ້າ-ສົ່ງອອກໄດ້

ກະຊວງອຸດສາຫະກໍາ ແລະການຄ້າ ໄດ້ອອກແຈ້ງການ ສະບັບເລກທີ 1224/ຫອຄ, ລົງວັນທີ 09 ມິຖຸນາ 2023 ກ່ຽວກັບການລົງທະບຽນຜູ້ນຳເຂົ້າ ແລະ ສົ່ງອອກສິນຄ້າໃນຂອບເຂດທົ່ວປະເທດ ໂດຍສະເພາະ 13 ໝວດສິນຄ້າທີ່ລະບຸໄວ້ໃນແຈ້ງການ. ທັງນີ້, ກໍ່ເພື່ອເປັນການຄຸ້ມຄອງຕິດຕາມການເຄື່ອນໄຫວການຊໍາລະ/ຮັບຊໍາລະ ແລະການນໍາເຂົ້າ-ສົ່ງອອກສິນຄ້າ ຂອງຜູ້ປະກອບການນໍາເຂົ້າ ແລະສົ່ງອອກໃຫ້ສອດຄ່ອງກັບລະບຽບກົດໝາຍ ແລະຈໍາກັດການຄ້ານອກລະບົບ.

ສໍາລັບ 13 ໝວດສິນຄ້າທີ່ລະບຸໄວ້ໃນແຈ້ງການປະກອບມີ:
1. ສັດປີກ ແລະ ຜະລິດຕະພັນຈາກສັດປີກ (ຊີ້ນ ແລະໄຂ່);
2. ໝູ ແລະ ຊີ້ນໝູ;
3. ງົວ, ຄວາຍ ແລະ ຊີ້ນ;
4. ປານິນ ແລະ ຜະລິດຕະພັນປາ;
5. ພືດຜັກ ແລະ ໝາກໄມ້;
6. ປະເພດເຂົ້າກິນ;
7. ສິນຄ້າບໍລິໂພກ (ກະເຟ,ເຄື່ອງດື່ມ, ເກືອ, ປາແດກ, ນໍ້າຕານຊາຍ);
8. ອາຫານສັດ;
9. ປະເພດປຸ໋ຍ ຫຼື ຝຸ່ນຊີວະພາບ;
10. ປະເພດວັດສະດຸກໍ່ສ້າງ (ຊີມັງ, ເຫຼັກ, ນໍ້າສີ);
11. ສິນຄ້າອຸປະໂພກ (ສະບູ, ແຟັບ, ເຈ້ຍທິຊຊູ);
12. ຍານພາຫະນະທາງບົກ;
13. ນໍ້າມັນເຊື້ອໄຟ ແລະ ອາຍແກັດ.
ໝາຍເຫດ: ວິສາຫະກິດທີ່ດຳເນີນກິດຈະການນຳເຂົ້າ ແລະສົ່ງອອກລາຍການສິນຄ້າທີ່ລະບຸໄວ້ໃນແຈ້ງການໃຫ້ສໍາເລັດກ່ອນວັນທີ 31 ສິງຫາ 2023. ຖ້າບໍ່ລົງທະບຽນແມ່ນບໍ່ສາມາດດໍາເນີນການນໍາເຂົ້າ ແລະສົ່ງອອກໄດ້.

ທີ່ມາ: ກະຊວງ ອຄ

แชร์