ສະພາແຫ່ງຊາດ ຮັບຮອງຮ່າງກົດໝາຍ 5 ສະບັບ

ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນຕອນ​ເຊົ້າ​ຂອງວັນທີ 17 ກໍລະກົດນີ້ ໄດ້ຮັບຟັງການລາຍງານຄືນກ່ຽວ​ກັບການປັບປຸງຮ່າງກົດໝາຍໂດຍມີກົດໝາຍສ້າງໃໝ່ 4 ສະບັບ ແລະ ກົດໝາຍສະບັບປັບປຸງ 1 ສະບັບ. ຈາກນັ້ນ, ສະມາຊິກສະພາແຫ່ງຊາດ (ສສຊ) ກໍໄດ້ມີຄໍາເຫັນເພີ່ມຕື່ມ ແລະ ພາຍຫຼັງຮັບຟັງການຊີ້ແຈງເພີ່ມຕື່ມຈາກຜູ້ຕາງໜ້າກະຊວງ/ອົງການ ທີ່ຂຶ້ນລາຍງານ,ສສຊ ກໍໄດ້ລົງຄະແນນສຽງຮັບຮອງເອົາຮ່າງກົດໝາຍແຕ່ລະສະບັບຕາມລຳດັບ.

ກອງປະຊຸມໄດ້ດຳເນີນພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຊຶ່ງ ສສຊ ໄດ້ພິຈາລະນາລົງຄະແນນສຽງຮັບຮອງເອົາຮ່າງກົດໝາຍ ຄືດັ່ງນີ້:

1). ກົດໝາຍວ່າດ້ວຍ ອາກອນທີ່ດິນ (ສ້າງໃໝ່); 2). ກົດໝາຍວ່າດ້ວຍ ເຍົາວະຊົນລາວ (ສ້າງ ໃໝ່); 3). ກົດໝາຍວ່າດ້ວຍ ການຈັດຫາງານ (ສ້າງໃໝ່) ຊຶ່ງ ສສຊ ສ່ວນ​ໃຫຍ່​ເຫັນ​ດີ. ແນວ​ໃດ​ກໍ​ຕາມຮ່າງກົດໝາຍນີ້ແມ່ນໄດ້ຈັດໃຫ້ມີການລົງຄະແນນສຽງສະເພາະມາດຕາ 48 ກອງທຶນການຈັດຫາງານ ຊຶ່ງ ສສຊ ສ່ວນໃຫຍ່ແມ່ນບໍ່ເຫັນດີຕໍ່ມາດຕານີ້ ໂດຍລົງຄະແນນສຽງບໍ່ເຫັນດີ 87 ທ່ານ, ເຫັນດີ 51 ທ່ານ ແລະບໍ່ອອກສຽງ 3 ທ່ານ ອັນເປັນຜົນໃຫ້ມາດຕານີ້ໃນຮ່າງກົດໝາຍດັ່ງກ່າວ ຈະໄດ້ມີກອງປະຊຸມໂດຍທຸກພາກສ່ວນກ່ຽວຂ້ອງເຂົ້າຮ່ວມເພື່ອຮຽບຮຽງຄືນ ແລະພິຈາລະນາລະອຽດວ່າຈະເອົາ ຫຼືບໍ່ ແລະຈະປັບປຸງແນວໃດ; 4). ກົດໝາຍວ່າດ້ວຍ ວຽກງານສາທາລະນະສຸກ (ສ້າງໃໝ່); 5). ກົດໝາຍວ່າດ້ວຍທະນາຄານທຸລະກິດ (ປັບປຸງ).

ໃນພາກບ່າຍ, ກອງປະຊຸມຍັງສືບຕໍ່ຮັບຟັງການລາຍງານການປັບປຸງຄືນກົດໝາຍຈາກບັນດາກະຊວງ/ອົງການກ່ຽວຂ້ອງ ພ້ອມທັງພິຈາລະນາຮັບຮອງເອົາອີກ 5 ກົດໝາຍທີ່ນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອນີ້.
ທີ່ມາ: ປະຊາຊົນ

แชร์