ສ່ວຍສາອາກອນຄຳມ່ວນ ວາງ 12 ມາດຕະການຕ້ານການຮົ່ວໄຫຼດ້ານງົບປະມານ

ທ່ານ ເກດສະກັນ ແສງປະດິດ ຫົວໜ້າສ່ວຍສາອາກອນແຂວງຄຳມ່ວນໄດ້ໃຫ້ສຳພາດຕໍ່ສື່ມວນຊົນໃນເມື່ອບໍ່ດົນມານີ້ວ່າ: ແຂວງຄຳມ່ວນແມ່ນແຂວງໜຶ່ງທີ່ລັດຖະບານໄດ້ທົດລອງຫັນເປັນແຂວງເກີນດຸນ ແລະກຸ້ມຕົນເອງທາງດ້ານງົບປະມານຊຶ່ງໃນປີ 2023 ສ່ວຍສາອາກອນປະຈໍາແຂວງຄຳມ່ວນໄດ້ຮັບໂຕເລກແຜນການຄຸ້ມຄອງຈັດເກັບລາຍຮັບທັງໝົດ 947 ຕື້ກວ່າກີບ, ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ ສາມາດຈັດຕັ້ງປະຕິບັດໄດ້ 675 ຕື້ກວ່າກີບ ເທົ່າກັບ 71,31% ຂອງແຜນການປີ, ຖ້າທຽບໃສ່ໄລຍະດຽວກັນກັບປີຜ່ານມາ ເພີ່ມຂຶ້ນ 282,42% ເປັນເງິນຈໍານວນ 436 ຕື້ກີບ. ສຳລັບທິດທາງແຜນການໃນ 6 ເດືອນທ້າຍປີແມ່ນຈະສູ້ຊົນເກັບລາຍຮັບໃຫ້ໄດ້ 475 ຕື້ກີບ. ຄາດຄະເນໝົດປີໃຫ້ບັນລຸ 1.220 ຕື້ກີບ ຫຼືເທົ່າກັບ 125,25% ຂອງແຜນການປີ.

ເພື່ອບັນລຸເປົ້າຫມາຍດັ່ງກ່າວສ່ວຍສາອາກອນປະຈຳແຂວງໄດ້ວາງ 12 ມາດຕະການຈັດຕັ້ງປະຕິບັດຄື:
1. ສໍາຫຼວດຖານຫົວໜ່ວຍຈຸນລະວິສາຫະກິດທີ່ມີລາຍຮັບປະຈໍາປີຕໍ່າກວ່າຫ້າສິບລ້ານກີບ, ຫົວໜ່ວຍທີ່ມີລາຍຮັບແຕ່ຫ້າສິບລ້ານຫາສີ່ຮ້ອຍລ້ານກີບຕໍ່ປີ ແລະ ຫົວໜ່ວຍທີ່ມີລາຍຮັບເກີນສີ່ຮ້ອຍລ້ານກີບຕໍ່ປີເພື່ອເຂົ້າໃນລະບົບອາກອນມູນຄ່າເພີ່ມ ແລະແຈ້ງ-ມອບອາກອນດ້ວຍຕົນເອງ,
2. ຕິດຕັ້ງລະບົບການຄຸ້ມຄອງລາຍຮັບແບບທັນສະໄໝ TaxRis ໃຫ້ບັນດາສ່ວຍສາອາກອນປະຈໍາເມືອງພາຍໃນແຂວງໃຫ້ສຳເລັດ
3. ຫັນເອົາຫົວໜ່ວຍວິສາຫະກິດທີ່ຢູ່ໃນການຄຸ້ມຄອງເຂົ້າສູ່ລະບົບ TaxRis ໃຫ້ສໍາເລັດ
4. ຕິດຕາມ ກວດກາ, ຊຸກຍູ້,ອໍານວຍຄວາມສະດວກໃຫ້ຫົວໜ່ວຍວິສາຫະກິດທີ່ມີເງື່ອນໄຂເຂົ້າໃນລະບົບອາກອນມູນຄ່າເພີ່ມ ແລະປະຕິບັດມາດຕະການຕໍ່ຫົວໜ່ວຍທີ່ລະເມີດກົດໝາຍ
5. ປະສານສົມທົບກັບພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງກວດກາຄືນສໍາມະໂນຕອນດິນທີ່ມີເພື່ອຄຸ້ມຄອງຈັດເກັບລາຍຮັບໃຫ້ມີຄວາມຊັດເຈນ
6. ປະສານສົມທົບກັບພະແນກອຸດສາຫະກຳການຄ້າແຂວງສືບຕໍ່ເກັບກໍາຫົວໜ່ວຍວິສາຫະກິດທີ່ເກີດໃໝ່
7. ປະສານສົມທົບກັບພະແນກໂຍທາທິການ ແລະຂົນສົ່ງແຂວງໃນການເກັບກໍາສະຖິຕິຍານພາຫານະທີ່ຍັງນຳໃຊ້ຕົວຈິງພາຍໃນແຂວງເພື່ອເປັນພື້ນຖານໃນການເກັບຄ່າທຳນຽມທາງ
8. ແຕ່ງຕັ້ງພະນັກງານວິຊາການຂັ້ນແຂວງ, ເມືອງລົງສົມທົບກັບອົງການປົກຄອງບ້ານເພື່ອຊຸກຍູ້ວຽກງານພາສີທີ່ດິນ ແລະຄ່າທຳນຽມທາງປະຈຳປີ
9. ໂຄສະນາເຜີຍແຜ່ກົດໝາຍ, ນິຕິກຳຕ່າງໆຜ່ານລະບົບສື່ມວນຊົນ, ສື່ສັງຄົມອອນລາຍເພື່ອໃຫ້ຜູ້ປະກອບການເຂົ້າໃຈ, ເປີດຊຸດຝຶກອົບຮົມໃຫ້ພະນັກງານສ່ວຍສາອາກອນໃນທົ່ວແຂວງ
10. ປະສານສົມທົບກັບພະແນກການເງິນແຂວງກວດກາ, ຕິດຕາມລາຍຮັບວິຊາການຢູ່ບັນດາພະແນກການ (ຕິດຕາມເປັນແຕ່ລະງວດ)
11. ປະສານກັບທະນາຄານ ແລະພາກສ່ວນທີ່ກ່ຽວຂ້ອງແຕ່ຂັ້ນແຂວງຈົນຮອດຂັ້ນເມືອງເພື່ອຕັ້ງຈຸດບໍລິການເສຍຄ່າທຳນຽມທາງປະຈຳປີ 2023
12. ປະຕິບັດຕາມຂໍ້ຕົກລົງຂອງທ່ານເຈົ້າແຂວງສົມທົບກັບຂະແໜງຄຸ້ມຄອງຊັບສິນຂອງລັດຊຸກຍູ້ຕິດຕາມການແຈ້ງການມອບ ແລະເກັບກຳຂໍ້ມູນຜູ້ສະໜອງທີ່ມີພູມລຳເນົາ ແລະບໍ່ມີພູມລຳເນົາທີ່ສະໜອງສິນຄ້າ ແລະການບໍລິການໃຫ້ 23 ຫົວໜ່ວຍທີ່ໂອນມາຈາກສູນກາງເພື່ອຈັດເກັບອາກອນປະເພດຕ່າງໆຕາມກົດໝາຍກຳນົດ.
ຂ່າວ-ພາບ: ກອງຄໍາ

แชร์