ເຂດເສດຖະກິດພິເສດສາມຫຼ່ຽມຄຳ ຈະ​ບັງ​ຄັບ​ໃຊ້ກົດ​ໝາຍຢ່າງເຂັ້ມງວດ

ເມື່ອບໍ່ດົນຜ່ານມານີ້,ຄະນະຄຸ້ມຄອງ​ເຂດເສດຖະກິດພິເສດແຂວງບໍ່ແກ້ວ ຮ່ວມກັບ ກອງບັນຊາການ ປກສ ເຂດ ແລະສະພາບໍລິຫານເຂດເສດຖະກິດພິເສດສາມຫຼ່ຽມຄຳ, ໄດ້ຈັດຕັ້ງການເຜີຍແຜ່ລະບຽບການ, ການ​ຕິດ​ຕາມ, ກວດກາ ແລະປາບປາມອາຊະຍາກຳສໍ້ໂກງທາງອອນລາຍຂຶ້ນ.

ເພື່ອໃຫ້ບັນດາຫົວໜ່ວຍທຸລະກິດ, ບຸກຄົນ, ນິຕິບຸກຄົນທີ່​ດຳ​ເນີນທຸລະກິດຕ່າງໆຢູ່ເຂດເສດຖະກິດພິເສດສາມຫຼ່ຽມຄຳໄດ້ຮັບຮູ້ເຂົ້າໃຈກ່ຽວກັບການກຳນົດມາດຕະການ, ລະບຽບການ, ການຕິດຕາມ, ກວດກາ, ການສະກັດກັ້ນ ແລະການເກືອດຫ້າມສໍ້ໂກງທາງອອນລາຍ, ບັນຫາການມົ້ວສຸມສິ່ງເສບຕິດ, ສິດເສລີພາບຂອງແຮງງານ, ຫ້າມການຊື້-ຂາຍແຮງງານແບບໂອນລະຫ່ວາງບໍລິສັດນີ້ໃຫ້ບໍລິສັດອື່ນ, ການລັກລອບເຂົ້າ-ອອກເມືອງຂອງແຮງງານທີ່ບໍ່ຖືກຕ້ອງ, ການນຳໃຊ້-ພົກພາອາວຸດທີ່ບໍ່ຖືກຕ້ອງ, ບັນຫາອາຊະຍາກຳ, ຂີ້ລັກງັດແງະ​ ແລະ​ການລົງໂທດ, ປັບໃໝ ແລະດຳເນີນຄະດີຢ່າງເດັດຂາດຕໍ່ຜູ້ທີ່ລະເມີດ.

ທ່ານ ບຸນທອງ ແສງສີກອງ ຫົວໜ້າຄະນະຄຸ້ມຄອງເຂດເສດຖະກິດພິເສດແຂວງບໍ່ແກ້ວ ໄດ້ກ່າວວ່າ: ເປົ້າໝາຍຂອງການສ້າງຕັ້ງເຂດເສດຖະກິດພິເສດສາມຫຼ່ຽມຄຳ ແມ່ນການສ້າງໃຫ້ກາຍເປັນເມືອງແຫ່ງການທ່ອງທ່ຽວໃນລະດັບສາກົນ ແລະພາກພື້ນທີ່ມີຄວາມສາມັກຄີປອງດອງ, ສັງຄົມມີຄວາມສະຫງົບໝັ້ນຄົງ, ເປັນລະບຽບຮຽບຮ້ອຍ ແລະມີຄວາມກົມກຽວທາງດ້ານການລົງທຶນຂອງນັກທຸລະກິດດ້ານຕ່າງໆ.

ທ່ານ ຫວາງເອີ້ປາວ ຜູ້ອຳນວຍການໃຫຍ່ກຸ່ມບໍລິສັດດອກງິ້ວຄຳຈຳກັດ ໄດ້ຮຽກຮ້ອງມາຍັງນັກທຸລະກິດ, ຜູ້ປະກອບການທຸກພາກສ່ວນຈົ່ງໃຫ້ການຮ່ວມມືປະຕິບັດຕາມລະບຽບຢ່າງເຂັ້ມງວດ ແລະໃຫ້ການສະໜັບສະໜູນວຽກງານນິຕິກຳຕ່າງໆຂອງພັກ-ລັດ ເພື່ອປະກອບສ່ວນເຂົ້າໃນການສ້າງສາພັດທະນາເຂດເສດຖະກິດພິເສດສາມຫຼ່ຽມຄຳ ໃຫ້ມີຄວາມເຂັ້ມແຂງໂດຍບໍ່ອະນຸຍາດໃຫ້ຫົວໜ່ວຍທຸ​ລະ​ກິດ ແລະຜູ້ປະກອບການເຄື່ອນໄຫວກິດຈະການທີ່ຄັດກັບລະບຽບກົດໝາຍ ຫຼືມ້າງເພທຳລາຍຜົນງານການພັດທະນາເຂດລວມທັງປະຊາຊົນບັນດາເຜົ່າຈົ່ງໃຫ້ການຮ່ວມມື ແລະເຄື່ອນໄຫວທຸລະກິດຂອງຕົນໃຫ້ຖືກຕ້ອງສອດຄ່ອງຕາມລະບຽບການ. ທັ້ງນີ້ກໍເພື່ອແນໃສ່ເຮັດໃຫ້ເຂດເສດຖະກິດພິເສດສາມຫຼ່ຽມຄຳຂອງພວກເຮົາໄດ້ມີການພັດທະນາຕາມແນວທາງນະໂຍບາຍຂອງພັກ-ລັດ ໃຫ້ເຕີບໃຫຍ່ເຂັ້ມແຂງ ແລະມີຄວາມສີວິໄລຈະເລີນຮຸ່ງເຮືອງຂຶ້ນໄປເລື້ອຍໆ.

ແຫລ່ງຂໍ້ມູນ: ເຂດເສດຖະກິດພິເສດສາມຫລ່ຽມຄຳ

แชร์