ຫຼາຍພາກສ່ວນ ຮ່ວມປ່ອຍປາຄືນສູ່ທຳມະຊາດ

ຕອນເຊົ້າວັນທີ 14 ກໍລະກົດນີ້, ກົມລ້ຽງສັດ ແລະການປະມົງ, ສູນພັດທະນາ ແລະບໍລິການດ້ານກະເສດຫ້ວຍຊອນຫ້ວຍຊົ່ວ ກະຊວງກະສິກຳ ແລະປ່າໄມ້ ໄດ້ສົມທົບກັບພະແນກກະສິກຳ ແລະປ່າໄມ້ ນະຄອນຫຼວງວຽງຈັນ ແລະຫ້ອງການກະສິກຳ ແລະປ່າໄມ້ເມືອງໄຊທານີ ຈັດພິທີສະເຫລີມສະຫລອງວັນປ່ອຍປາ ແລະອະນຸລັກສັດນໍ້າ-ສັດປ່າແຫ່ງຊາດ ໂດຍເລືອກເອົາ ບ້ານທ່າສະຫວ່າງ ເມືອງໄຊທານີ ເປັນຈຸດປ່ອຍປາຄືນສູ່ທຳມະຊາດໃຫ້ກຽດເຂົ້າຮ່ວມມີທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະປ່າໄມ້, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ພ້ອມດ້ວຍພາກສ່ວນກ່ຽວຂ້ອງ.

ປາທີ່ຈະນຳມາປ່ອຍຄັ້ງນີ້ ມີທັງໝົດ 450.000 ກວ່າໂຕ ໃນນັ້ນມີປາປາກ, ປາເພັ້ຍ, ປາເໝັ້ນ, ປາກົດ, ປາເຂັງ, ປາຄໍ່, ປາສະລິດ, ປາຊວາຍ, ກົບ ແລະຊະນິດອື່ນໆ. ເຊີ່ງການປ່ອຍປາຢູ່ນະຄອນຫຼວງວຽງຈັນ ກໍ່ຈະສືບຕໍ່ໄປໃນແຕ່ລະຈຸດໂດຍກຳນົດມື້ທີ່ແຕກຕ່າງກັນຕາມເງື່ອນໄຂຂອງແຕ່ລະບ່ອນ. ສໍາລັບ ປີ 2023 ນີ້ ນະຄອນຫລວງວຽງຈັນ ມີແຜນປ່ອຍປາລົງສູ່ທໍາມະຊາດ ຈໍານວນ 9.400.000 ກວ່າໂຕ, ໃນນັ້ນຊຸມຊົນປ່ອຍເອງ 8.500.000 ໂຕ.

• 14/07/2023