ສາທາ 3 ແຂວງ ວາງແຜນກະກຽມຄວາມພ້ອມຕອບໂຕ້ໄພພິບັດ

ກອງປະຊຸມກະກຽມຄວາມພ້ອມ ແລະຕອບໂຕ້ໄພພິບັດໄດ້ຈັດຂຶ້ນໃນວັນທີ 13 ກໍລະກົດ 2023 ທີ່ພະແນກສາທາລະນະສຸກແຂວງສາລະວັນ, ໂດຍມີຫົວໜ້າພະແນກ-ຮອງຫົວໜ້າພະແນກສາທາລະນະສຸກແຂວງສະຫວັນນະເຂດ, ສາລະວັນ, ອັດຕະປື ພ້ອມດ້ວຍພາກສ່ວນກ່ຽວຂ້ອງ, ທັງນີ້ກໍເພື່ອເປັນການກະກຽມວາງແຜນຄວາມພ້ອມຕອບໂຕ້ກັບໄພພິບັດຕ່າງໆ ທີ່ອາດຈະເກີດຂຶ້ນຕາມລະດູການ.

ລັດຖະບານລາວໄດ້ຮັບການຊ່ວຍເຫຼືອຈາກອົງການອຸຍນີເຊັບເພື່ອຈັດຊື້ວັດຖຸ ແລະອຸປະກອນຕ່າງໆທີ່ຈຳເປັນສຳລັບມາດຕະການຕອບໂຕ້ໄພພິບັດໃນແຕ່ລະປີປະຈຳຢູ່ສາງ ໃນ 3 ພາກ ແລະ ສາງສູນກາງ. ສຳລັບພາກໃຕ້ແມ່ນຢູ່ແຂວງສາລະວັນ ເພື່ອນຳໃຊ້ໃຫ້ເກີດປະໂຫຍດໃນເວລາທີ່ເກີດໄພພິບັດທາງທຳມະຊາດເປັນຕົ້ນ: ໄພນໍ້າຖ້ວມ, ໄພແຫ້ງແລ້ງ, ດິນເຈື່ອນ, ແຜ່ນດິນໄຫວ, ພະຍາດລະບາດຕ່າງໆ ແລະອື່ນໆທີ່ອາດຈະເກີດຂຶ້ນ. ສຳລັບແຂວງທີ່ມີສາງເຄື່ອງປະຈຳຢູ່ແມ່ນຈະຕ້ອງໄດ້ເອົາໃຈໃສ່ໃນການບຳລຸງຮັກສາເກັບມ້ຽນໃຫ້ເປັນລະບຽບ, ເພື່ອຮັບປະກັນທາງດ້ານເຕັກນິກ, ກຽມຄວາມພ້ອມໃນການຮັບໃຊ້ເຂົ້າໃນວຽກງານໄພພິບັດ ແລະວຽກສຸກເສີນອື່ນໆທີ່ຈະເກີດຂຶ້ນໂດຍບໍ່ຄາດຄິດ. ເຄື່ອງດັ່ງກ່າວແມ່ນເກັບມ້ຽນໄວ້ສຳລັບແຈກຢາຍໃຫ້ບັນດາແຂວງທີ່ໃກ້ຄຽງ, ຕ້ອງໄດ້ຮັບການອະນຸມັດຈາກຂັ້ນສູນກາງ (ນໍ້າສະອາດສູນກາງ ແລະອົງການອຸຍນີເຊັບ) ກ່ອນການແຈກຢາຍໃຫ້ຜູ້ໄດ້ຮັບຜົນກະທົບຈາກໄພພິບັດຢ່າງເປັນທາງການ.

ກອງປະຊຸມໄດ້ຮັບຟັງການລາຍງານຄວາມຮູ້ພື້ນຖານກ່ຽວກັບການກະກຽມຄວາມພ້ອມ ແລະ ຕອບໂຕ້ໄພພິບັດ, ການຈັດຕັ້ງປະຕິບັດວຽກງານຄຸ້ມຄອງໄພພິບັດສາທາລະ ນະສຸກ ຕໍ່ກັບເຫດການນໍ້າຖ້ວມໃນການນຳໃຊ້ລົດຜະລິດນໍ້າດື່ມສະອາດເຄື່ອນທີ່, ສະເໜີເຄື່ອງຕອບໂຕ້ ແລະຊ່ວຍເຫຼືອຍາມມີໄພພິບັດ, ວິທີ ແລະ ຂັ້ນຕອນຂໍຄວາມຊ່ວຍເຫຼືອຍາມເກີດໄພພິບັດ. ຈາກນັ້ນກໍໄດ້ມີການປະກອບຄຳຄິດເຫັນເພື່ອເຮັດໃຫ້ວຽກງານໄດ້ຮັບຜົນສຳເລັດ.
ຂ່າວ-ພາບ: ທິດລານີ ໂຄດໂຍທາ

• 14/07/2023